ახალი წლის დადგომა ყველა ქვეყანაში სხვადასხვა, უცნაურ და სიმბოლურ ტრადიციებთან ასოცირდება. სწორედ ეს განსხვავებები ქმნის თითოეული ქვეყნის უნიკალურობას. მოდით განვიხილოთ ეკვადორის უჩვეულო და სახალისო საახალწლო ტრადიცია.
ეკვადორელებს მიმავალი წლის უიღბლობის უკან ჩამოსატოვებლად დანიელებზე არანაკლებ უნიკალური საახალწლო ტრადიცია დაუმკვიდრებიათ ათწლეულების განმავლობაში. ქვეყანაში გავრცელებული წინასაახალწლო წესია ფურცლებისგან, ფიცრებისგან და ძველი ტანსაცმლისგან საფრთხობელებისა თუ კარიკატურული ფიგურების აგება და მათთვის ცნობილი პოლიტიკოსების, პოპ-კულტურის სიმბოლოებისა თუ სხვა ცნობადი სახეების ნიღბების მორგება. ამ უჩვეულო ტრადიციის მიხედვით, ახალი წლის ღამეს ფიგურებს მოქალაქეები ცეცხლს უკიდებენ, იმის ნიშნად, რომ როგორც თავად მოიხსენიებენ, „ძველი წლის“ უარყოფით მხარეებსა და სახე-ხატებს გამოემშვიდობონ. საფრთხობელებთან ერთად, ცუდ მოგონებებთან დაკავშირებული ფოტოების დაწვაც ამ ერთგვარი სიმბოლური განწმენდის განუყოფელი ნაწილია ეკვადორელებისთვის. დამატებითი იღბლისთვის რიტუალის მონაწილეები დანთებულ ცეცხლს 12-ჯერ უნდა გადაახტნენ, წელიწადის თვეების რაოდენობის შესაბამისად.
ვარაუდობენ, რომ ეს საახალწლო ტრადიცია ეკვადორის ქალაქ გუაიაკილიდან მომდინარეობს, სადაც 1895 წლის ყვითელი ცხელების ეპიდემიის დროს მოქალაქეები გარდაცვლილების ტანსაცმლით სავსე კუბოებს წვავდნენ დეზინფექციის მიზნით. კოცონებით განათებული დღესასწაული ადგილობრივი მცხოვრებლებისთვის დღემდე კულტურის უმნიშვნელოვანესი ნაწილია და საახალწლო ტრადიციების მრავალფეროვან ბუნებასაც ნამდვილად გვიდასტურებს.
