ადრეული ასაკიდან ვიყავი აქტიურად დაკავებული სპორტული ცხოვრებით, ფეხბურთზე დავდიოდი დაახლოებით 10 წელი. თუმცა, ბავშვობაში ბოლომდე ვერ ვხვდებოდი ჯანსაღი ცხოვრების წესის მნიშვნელობას.
სკოლის ბოლო წლები და ბაკალავრიატი გავატარე ინგლისში. დატვირთული გრაფიკის მიუხედავად, ყოველთვის ვცილობდი დრო დამეთმო სპორტული ცხოვრებისთვის და ვიყავი უნივერსიტეტის რაგბის გუნდის წევრი. ფიზიკურ აქტივობას ვახერხებდი, თუმცა ობიექტური მიზეზების გამო, სტუდენტური წლების პერიოდში ვერ ვუთმობდი სათანადო დროს საკუთარი კვების რაციონს.
ამ პერიოდში, ჩემს ცხოვრებაში მოხდა გარკვეული ღირებულებების გადაფასება და ძალიან დამაინტერესა ვეგეტარიანულმა დიეტამ. ამასთან ერთად, დედაჩემი უკვე 30 წელი იყო, რაც ვეგეტარიანელი გახლდათ და თბილისში ჩამოსვლისას გამიღვივდა კვების მიმართ ინტერესი. შინ ყოველთვის მზადდებოდა მრავალფეროვანი და დაბალანსებული ჯანსაღი, ვეგეტარიანული საჭმელი, რაც აუცილებელი იყო, რათა არ მიგვეღო კონკრეტული ვიტამინებისა და მინერალების ნაკლებობა ორგანიზმში. რეალურად, საკმაოდ გამიადვილდა რაციონიდან ხორცის სრულად ამოღება. თვითონაც დავიწყე სხვადასხვა კერძის მომზადება და საინტერესო რეცეპტების აღმოჩენა. მივხვდი, რომ ეს უბრალოდ დიეტა არ იყო და ჩემი ცხოვრების განუყოფელი ნაწილი გახდა.
ვეგეტარიანული დიეტის გარშემო არსებობს ბევრი არასწორი თეორია და მითი. პირად გამოცდილებაზე დაყრდნობით შემიძლია გითხრათ ვეგეტარიანული დიეტის უამრავი დადებითი თვისების შესახებ. ერთმნიშვნელოვნად გამოვყოფდი ენერგიის საგრძნობ მატებას. თავისუფლად ვახერხებ სხვადასხვა სპორტული აქტივობით დაკავებას − იქნება ეს თხილამურებით სრიალი, სხვადასხვა საბრძოლო ხელოვნების ვარჯიში, დარბაზში სიარული, ლაშქრობა თუ სხვა.
