მსოფლიოს სხვადასხვა ქვეყანა ტურისტებს ღირსშესანიშნაობებით, ძვირადღირებული სასტუმროებითა და კვების ობიექტებით იზიდავენ. თუმცა ნელ-ნელა იზრდება ტენდენცია, როცა მოგზაურობის მოყვარული ადამიანები განსხვავებულ და ცოტა უცნაურ სასტუმროებს ირჩევენ, სადაც ისინი ახალ შეგრძნებებს, ემოციებსა და დაუვიწყარ მოგონებებს იძენენ. სწორედ ასეთ სასტუმროებზე გვინდა მოგიყვეთ.
Treehotel − შვედეთი
Treehotel 5-ვარსკვლავიანი სასტუმროა. მისი ოთახები ულამაზეს ფიჭვის ხეებზეა განთავსებული, მიწიდან 20 მეტრის სიმაღლეზე, რაც თავს გიგანტური ჩიტის ბუდეში წარმოგადგენინებთ. ეს ადგილი ყველანაირ შესაძლებლობას გვიქმნის იმისათვის, რომ დროებით გამოვეთიშოთ გარესამყაროს და ვიპოვოთ სულიერი ჰარმონია. უჩვეულო სასტუმრო მდინარე ლულეს მახლობლად მდებარეობს და აქ დასვენება წლის ნებისმიერ სეზონზე დიდ სიამოვნებას მოგანიჭებთ.
Kakslauttanen Arctic Resort − ფინეთი
სასტუმრო ფინეთში, კეკონენის ეროვნულ პარკთან ახლოს მდებარეობს. კომპლექსი მოიცავს მინის კაბინებს, რომლებიც გარკვეული მანძილით არიან ერთმანეთისგან დაშორებული და თითოეულს თავისი დამოუკიდებელი ბაღი აქვს. ზამთარში სასტუმროს მომსახურებას ემატება თევზჭერა და თხილამურებით სრიალი, ხოლო ზაფხულში შესაძლებელია ნავებით სეირნობა და ლაშქრობების მოწყობა. სასტუმროს აქვს ეგზოტიკური კერძების 2 რესტორანი, ტრადიციული ფინური რესტორანი და საუნა.
Bryant Park Hotel, Godiva Chocolate Suite − აშშ
Godiva Chocolate Suite მცირე ზომის სასტუმროა ნიუ იორკში, რომელშიც ბევრი ჩვენგანი ინატრებდა მოხვედრას. სასტუმროს ერთ-ერთი ნომერი მთლიანად შოკოლადისგანაა შექმნილი. ავეჯი, აბაჟურები და აქსესუარები ნამდვილი ხელოვნების ნიმუშებია.
Giraffe Manor − აფრიკა
Giraffe Manor კენიაში, ნაირობისა და ნგონგის ბუნებრივ ნაკრძალს შორის მდებარეობს. სასტუმრო ნამდვილად განსაკუთრებულია როგორც მდებარეობით, ისე დიზაინით. იგი აშენებულია 1930 წელს და ამ ეპოქის არტდეკოს სტილშია გადაწყვეტილი.
სასტუმროს მისაღები და ნომრები ელეგანტური ძველებური ავეჯითაა მოწყობილი. განსაკუთრებულ გარემოს ქმნის ულამაზესი ბაღები, ტერასები და ვერანდები. სასტუმროს გარს არტყავს ულამაზესი ტყე, რომელიც სავსეა ეგზოტიკური ცხოველებითა და ფრინველებით. მათგან ყველაზე თამამები ჟირაფები არიან, რომლებიც სასტუმროს ბაღებში დასეირნობენ. მოშინაურებული ჟირაფები დამსვენებლებს საოცარ განწყობას უქმნიან. ისინი თავის ლამაზ, გრძელ კისერს ყოფენ სასტუმროს ფანჯრებში და სიამოვნებით მიირთმევენ სტუმრისგან გაწვდილ სპეციალურ საკვებს. ჟირაფები ხანდახან სტუმრებისთვის განკუთვნილ საუზმესაც მიირთმევენ.
Hotel Palacio de Sal − ბოლივია
16-ოთახიანი სასტუმრო Palacio de Sal in Uyuni მთლიანად მარილისგან არის აგებული. მარილი შეკუმშულია მრავალპროფილურ აგურად, რომელიც დამზადებულია ადგილობრივი ხელოსნების მიერ. სასტუმროს აქვს კეთილმოწყობილი საძინებლები და სხვა საჭირო ინფრასტრუქტურა. სასტუმროს მომსახურება მოიცავს ჩვენი პლანეტის ერთ-ერთი ყველაზე უჩვეულო და აუცილებლად სანახავი ადგილის მონახულებას, როგორიცაა მარილის უდაბნო Salar de Uyuni. ეს გახლავთ მინერალური მარილით დაფარული სრულიად სიურრეალისტური ადგილი, სადაც არ ცხოვრობს არცერთი ცოცხალი არსება.
Manta Resort − ტანზანია
ეს არაჩვეულებრივი სასტუმრო, სახელწოდებით Manta Resort აღმოსავლეთ აფრიკაში, ინდოეთის ოკეანის სანაპიროზე, ტანზანიაში მდებარეობს. ინდოეთის ოკეანის წყლებში მოდრეიფე მინისასტუმრო ძალიან უჩვეულო ადგილია ღამის გასათევად.
Hotel Costa Verde − კოსტა რიკა
კიდევ ერთი უჩვეული და ულამაზესი სასტუმრო Hotel Costa Verde კოსტა რიკაში მდებარეობს. ხშირად ახალდაქორწინებულები სწორედ ამ სასტუმროს ირჩევენ ქორწილის გადახდის ადგილად. არარეალური ატმოსფერო ფოტოებიდანაც აღიქმება.
მისი უნიკალურობა იმაში გამოიხატება, რომ სტუმრებს ღამის გათევა ძველ, მაგრამ ახლა უკვე განახლებულ ბოინგში შეუძლიათ, რომელიც დღეს ერთ-ერთ ყველაზე ძვირადღირებულ სასტუმროს წარმოადენს.
სასტუმრო დამსვენებლებს სთავაზობს ჯუნგლებისა და ოკეანეების საოცარ ხედებს. საძინებლები აღჭურვილია კონდიციონერით და თითოეულს აქვს საკუთარი აბაზანა.
Les Cabanes du Bois Landry − საფრანგეთი
სრულიად ექსტრაორდინარული სასტუმრო პარიზიდან 90 წუთის სავალზე − მუხის ხეებზე განთავსებული ხის ქოხები, რომლებიც ერთმანეთს კიბეებით და ხიდებით უკავშირდება. სასტუმროს მფლობელების გადაწყვეტილებით, ბუნებასთან მაქსიმალური სიახლოვის შესანარჩუნებლად, აქ არ აქვთ გაყვანილი ელექტრობა და წყლის სისტემა.
