ვრცლად Metrica fashion fusion foundation-ს შესახებ…
2024 წელს Metrica fashion show-ს ახალი სეზონი გაიმართება, რომელიც თავის პლატფორმაზე გააერთიანებს დიზაინერებსა და მხატვრებს მსოფლიოს რამდენიმე ქვეყნიდან. მოდის საერთაშორისო ჩვენების მხარდამჭერია შვედეთის საელჩო. აღნიშნული პროექტის შესახებ უფრო ვრცლად გვიამბობენ მისი ორგანიზატორები – ქართველი დიზაინერი, ბრენდ REM-ის დამფუძნებელი, მაია ჩხარტიშვილი და ავღანელი მოდელი, გიტა ჯავიდი, რომელიც მრავალი წლის განმავლობაში მუშაობდა ბიზნესკონსულტაციების სფეროში.
მაია, როგორ გაჩნდა საქართველოში საერთაშორისო მოდის ჩვენების ჩატარების იდეა?
(მაია ჩხარტიშვილი): საქართველოში საერთაშორისო მოდის ჩვენების ორგანიზების შესახებ იდეა 2022 წელს გაჩნდა. მიზანი იყო სხვადასხვა ქვეყნის დიზაინერებს შესძლებოდათ საკუთარი კოლექციის წარდგენა და საკუთარი თავის გაცნობა ფართო საზოგადოებისთვის. პროექტი ძალიან სწრაფად განვითარდა და 2022-2023 წლებში ორი ფართო ჩვენება ჩატარდა საკულტო ადგილას – ბადრი პატარკაციშვილის საზეიმო რიტუალების სასახლეში („არკადია“). ასევე გაიმართა ორი Pop-up გამოფენა, სადაც სტუმრებისა და ტურისტებისათვის ნაჩვენები იყო ადგილობრივი ბრენდებისა და სხვადასხვა ქვეყნის ახალგაზრდა დიზაინერების მიერ წარმოდგენილი მოდა და სტილი.
მეტრიკის მოდის ჩვენებაზე საქართველოში საკუთარი კოლექციები 18 ქვეყნის 85-მა დიზაინერმა წარადგინა. მონაწილე ქვეყნებს შორის იყო შვედეთი, საფრანგეთი, იაპონია, საქართველო, ყაზახეთი, ისრაელი, აზერბაიჯანი, უკრაინა, სომხეთი, გერმანია და ა.შ. წელსაც ვგეგმავთ, ორი fashion show-ს ჩატარებას საქართველოში.
ჩვენ აქტიურად ვთანამშრომლობთ ტურიზმის სექტორთან, რადგან მსგავსი ღონისძიებები დიდ ინტერესს იწვევს საქართველოში სხვადასხვა ქვეყნიდან ჩამოსულ ტურისტებში. ჩვენთვის ასევე მნიშვნელოვანია, რომ მოდა იყოს ინკლუზიური და ყველასთვის ხელმისაწვდომი, ამიტომ მოდის ინდუსტრიის წარმომადგენელთა გარდა, ღონისძიებას ესწრებოდნენ მოდის ინდუსტრიითა და ახალი ბრენდებით დაინტერესებული ადამიანები.
რა არის ამ პროექტის მიზანი?
(გიტა ჯავიდი): Metrica Fashion Fusion Foundation-ის მისიაა საერთაშორისო და ქართველი დიზაინერების გლობალური ცენტრის შექმნა, სადაც შემოქმედებითი ადამიანები მსოფლიოს ყველა კუთხიდან შეძლებენ გაერთიანებას, თანამშრომლობას და საკუთარი ნიჭის წარმოჩენას მსოფლიო მასშტაბით. მიხარია, რომ ჩვენ ეს გამოგვდის მოდის საერთაშორისო ჩვენებების ორგანიზებით, ახალგაზრდა დიზაინერებისთვის კონკურსების შექმნით, საერთაშორისო გამოფენებში მონაწილეობით და საერთაშორისო მოდის ბაზართან თანამშრომლობით. ჩვენ გვინდა, რომ ყველამ ნახოს ნიჭიერი დიზაინერები სხვადასხვა ქვეყნიდან!
ამასთანავე, ჩვენთვის მნიშვნელოვანი მიმართულებაა თანამშრომლობა საქართველოსა და სხვა ქვეყნების სამთავრობო ინსტიტუტებთან, საელჩოებთან, ასოციაციებსა და ბიზნესის სფეროსთან. თანამშრომლობისა და მხარდაჭერის წყალობით, ჩვენ შეგვიძლია მეტი ყურადღება მივიზიდოთ მოდის ინდუსტრიისკენ და გავძლიერდეთ საერთაშორისო ასპარეზზე.
რას უნდა ველოდოთ Metrica fashion show-ს მორიგ სეზონზე?
(მაია ჩხარტიშვილი): Metrica fashion show-ს ახალი სეზონი თავის პლატფორმაზე გააერთიანებს დიზაინერებსა და მხატვრებს მსოფლიოს რამდენიმე ქვეყნიდან. წარმოდგენილი იქნება ტანსაცმლის, სამკაულების, ფეხსაცმლის, ჩანთებისა და აქსესუარების თანამედროვე და მოდური ბრენდების ახალი კოლექციები. სტუმრები ნახავენ შთამბეჭდავ პერფორმანსებს და ჩვენებებს runway-ზე და შოურუმების ზონებში. ღონისძიების ფარგლებში ჩატარდება სხვადასხვა არტისტის წარმოდგენები.
ეს არის პლატფორმა შემოქმედებითი საზოგადოებისთვის, სადაც ჩვენ ვაშენებთ ხიდებს ნიჭიერ დიზაინერებსა და შემსყიდველებს, ჟურნალისტებს, მოდის ინდუსტრიის წამყვან კრიტიკოსებს, მხატვრებს, ბლოგერებსა და ინფლუენსერებს შორის.
ღონისძიება მასშტაბური და საჯარო ხასიათისაა. ბილეთების შეძენა შესაძლებელია ბილეთების გაყიდვის ოპერატორების მთავარ პლატფორმებზე.
სამომავლო გეგმები
წარმოვადგინოთ ქართული დიზაინერების ბრენდები ისრაელში (თელ-ავივი), ასევე, ვგეგმავთ მასშტაბურ საერთაშორისო მოდის ჩვენებას ესპანეთში. მსგავსი ღონისძიებები ეხმარება დიზაინერებს ახალი საერთაშორისო აუდიტორიის მიღწევაში.
საკონტაქტო ინფო:
Insta: instagram.com/metrica__show/
ტექსტი: სოფიო მალანია
ფოტო: გიო კოსტავა
