„მოდა ხელოვნებაა“ (Fashion Is Art) – წლევანდელი Met Gala-ს თემა ოფიციალურა გამოცხადდა. ღონისძიებას კოსტიუმების ინსტიტუტის გამოფენა „კოსტიუმების ხელოვნება“ (Costume Art) გახსნის, რომელიც სამოსს, როგორც დამოუკიდებელ მხატვრულ ობიექტს, ისე წარმოაჩენს.
მეტროპოლიტენის მუზეუმის წარმომადგენლის თქმით, Met Gala-ს თემა სტუმრებს სთავაზობს „გამოხატონ საკუთარი დამოკიდებულება მოდის, როგორც ხელოვნების ფორმის მიმართ და პატივი მიაგონ ხელოვნების ისტორიაში შემოსილი სხეულის მრავალფეროვან გამოსახულებებს“.
ექსპოზიცია მოდის სამყაროს მეტროპოლიტენ-მუზეუმის კოლექციებში დაცულ ფერწერასა და სკულპტურასთან გააერთიანებს. კოსტიუმების ინსტიტუტის კურატორმა, ენდრიუ ბოლტონმა აღნიშნა, რომ პროექტი იკვლევს, თუ როგორ აყალიბებდა ტანსაცმელი სხვადასხვა ეპოქაში წარმოდგენებს სხეულსა და სოციალურ სტატუსზე.
გამოფენაზე წარმოდგენილი იქნება როგორც ისტორიული კოსტიუმები, ისე მუზეუმის კოლექციის ხელოვნების ნიმუშები. ექსპოზიცია რამდენიმე ძირითად ქვეთემად დაიყოფა:
- „შიშველი სხეული“
- „კლასიკური სხეული“
- „აბსტრაქტული სხეული“
- „ორსული სხეული“
თითოეული სექციისთვის ექსპონატები განსაკუთრებული სიზუსტით შეირჩევა.
„მსურდა ყურადღება შემოსილი სხეულის ცენტრალურ როლზე გამემახვილებინა, ერთმანეთთან დამეკავშირებინა სხეულის მხატვრული რეპრეზენტაცია და მოდა, როგორც ხელოვნების განსახიერებული ფორმა. იმის ნაცვლად, რომ უპირატესობა მხოლოდ მოდის ვიზუალურ მხარეს მივანიჭოთ, Costume Art ხაზს უსვამს მის მატერიალურობას და იმ განუყოფელ კავშირს, რომელიც ჩვენს სხეულსა და სამოსს შორის არსებობს“— ამბობს ენდრიუ ბოლტონი.
ღონისძიებას თანათავმჯდომარეების რანგში დაესწრებიან ბიონსე, ნიკოლ კიდმანი, ვენუს უილიამსი და რა თქმა უნდა, ანა ვინტური. ღონისძიება 4 მაისს გაიმართება, მისი სპონსორები კი ჯეფ ბეზოსი და მისი მეუღლე ლორენ სანჩესი არიან.
გამოფენის სამზადისის ფარგლებში უკვე რამდენიმე ნიჭიერი დიზაინერის კაბა წარადგინეს, რომელიც, სავარაუდოდ, ექსპოზიციის ნაწილი გახდება.
ვარაუდობენ, რომ წელს Met Gala-ზე დიზაინერები ყურადღებას არა მარტო ლამაზ კაბებზე, არამედ კონცეპტუალურ მოდაზე გაამახვილებენ. მოსალოდნელია ისეთი ბრენდების წამოწევა, რომლებიც ხელოვნებასთან ასოცირდებიან.
პირველი შემთხვევაა, როცა Met Gala-ს ექსპოზიციაში ორსულობას ცალკე სექცია ეთმობა. ეს მიმართულება იკვლევს, თუ როგორ იცვლებოდა ისტორიის მანძილზე ორსული ქალის სხეულის აღქმა ხელოვნებასა და მოდაში – კორსეტებით დამალვიდან მის ხაზგასმამდე და გაღმერთებამდე.
გავრცელებული ინფორმაციით, გამოფენაზე გამოყენებული იქნება AI და ჰოლოგრამები, რათა ის ისტორიული ნახატები გაცოცხლდეს, რომლებმაც კონკრეტულ კოსტიუმებზე გავლენა მოახდინეს. მაგალითად, შესაძლოა ვიხილოთ რენესანსის პერიოდის ტილო, რომელიც თანდათან თანამედროვე მაღალი მოდის კაბად გარდაიქმნა.
ბიონსე Met Gala-ს ათწლეულის განმავლობაში პირველად ესწრება. მისი ჩართულობა იმის გარანტია, რომ მუსიკისა და ვიზუალური ხელოვნების სინთეზს განსაკუთრებული ყურადღება დაეთმობა.
ასევე დაგაინტერესებთ
#OK! მამაკაცების გამორჩეული მაკიაჟი “მეტ გალას” გასული წლების ღონისძიებებიდან
