რა არის საჭირო კარგი ფოტოს გადასაღებად? რა თქმა უნდა, კარგი ფოტოაპარატი, პროფესიონალი ფოტოგრაფი, ლამაზი ადგილი და ემოციები. სწორედ ამ ყველაფრის ერთობლიობას გთავაზობთ „მემო სტუდია“, სივრცე, სადაც დაგხვდებათ კომფორტული გარემო, რათა გამოხატოთ თქვენი ნამდვილი ემოციები, რომელიც სამუდამოდ აღიბეჭდება და კადრზე დარჩება. ამასთანავე, მომხმარებელს შეუძლია სარგებლობა გარე პროფესიონალური ფოტოების გადაღებითაც. ფოტოგრაფიასა და სამომავლო გეგმებზე „მემო სტუდიას“ დამფუძნებელი გვანცა ზარქუა გვესაუბრა.
გვანცა, რატომ გადაწყვიტეთ „მემო სტუდიის“ შექმნა?
ფოტოგრაფია ჩემთვის მხოლოდ პროფესია არ არის, ეს უწყვეტი გატაცებაა. ვცდილობ, კამერის საშუალებით გადმოვცე ჩემი ხედვა, ასევე, გავაცოცხლო კადრზე არსებული ემოციები, ის წუთები, რომლებიც სხვაგვარად შეიძლება შეუმჩნეველი დარჩეს. ვიზუალურ თხრობაში უნიკალური ძალაა. ემოციების გადმოცემა, ნარატივებისა და რეაქციების გამოწვევა ერთი კადრის საშუალებით არის ის, რაც ყველაზე ამაღელვებლად მიმაჩნია. ეს არ არის მხოლოდ სურათების გადაღება, ეს არის ვიზუალური ენის შექმნა, რომელიც უნივერსალურად ლაპარაკობს. შესაბამისად, „მემო სტუდიის“ შექმნის მთავარი მიზეზი და მიზანი ფოტოგრაფიისადმი დიდი სიყვარული იყო, რომლის საშუალებითაც ვცდილობ სხვებს გამორჩეული მოგონებები ვაჩუქო.
რას სთავაზობს „მემო სტუდია“ საზოგადოებას?
ჩვენ გთავაზობთ როგორც სტუდიურ, ასევე გარე პროფესიონალური ფოტოების გადაღებებს, ისეთი განსაკუთრებული შემთხვევებისთვის, როგორიცაა ოჯახური შეკრება, დაბადების დღე, ნათლობა. ასევე პროფესიულ და სადღესასწაულო ფოტოსესიებს, მსურველთა სურვილისა და მოთხოვნების გათვალისწინებით. ასევე, გვაქვს განახლებადი, სხვადასხვა დეკორით წარმოდგენილი სივრცე.
როგორ ფიქრობთ, რა გამოგარჩევთ ბაზარზე?
დამეთანხმებით, ალბათ, რომ ბაზარზე საკმაოდ დიდი კონკურენციაა, ბევრი კარგი ფოტოსტუდიაა, რომლებიც ნამდვილად იმსახურებენ პატივისცემას. ამასთან, იმედია არავის ეწყინება, თუმცა ვფიქრობ, რომ „მემო სტუდიას“ სხვებისგან გამოარჩევს კრეატიულობისკენ მუდმივი სწრაფვა, სრულყოფილი კომპოზიციის პოვნა და იდეის ვიზუალურ ნამუშევრად თარგმნა, რაც ჩემთვის ყოველი ფოტოსესიისთვის ახალი გამოწვევის და ახალი პერსპექტივების შესწავლის შესაძლებლობაა.
ძალიან დიდი პასუხისმგებლობა უნდა იყოს ბევრისთვის ცხოვრების ყველაზე მნიშვნელოვანი დღის კადრებად აღბეჭდვა… გვესაუბრეთ თქვენს მიდგომაზე…
როგორც უკვე აღვნიშნე, ეს არის მუდმივი მოგზაურობა საკუთარი თავის აღმოჩენისა და შემოქმედებითი ძიებისკენ და პარალელურად იმის გააზრება, რომ ჩვენი ნამუშევრებით ადამიანებს სასიამოვნო მოგონებების „დამახსოვრებაში“ ვეხმარებით. ვცდილობთ ჩვენი მომხმარებლებისთვის შევქმნათ მაქსიმალურად კომფორტული გარემო, რომ მოეხსნათ დაძაბულობა და საშუალება მიეცეთ, გამოხატონ მათი ბუნებრივი ემოციები, სურვილები, რაც სამუდამოდ აღიბეჭდება და დარჩება კადრზე.
რის შენახვა შეუძლია კადრს?
კადრს ძალიან ბევრი რამის შენახვა და ასევე, სხვადასხვა ემოციის, გრძნობის თუ სურვილის გაღვიძება შეუძლია, იქნება ეს ნოსტალგია, ძლიერი მესიჯის გადმოცემა, თუ, უბრალოდ, სიხარულის მომტანი, სასიამოვნო მოგონებები. ფოტოგრაფიას აქვს უნარი, დააკავშიროს ადამიანები ღრმა დონეზე, გადალახოს ენობრივი და კულტურული ბარიერები და წამიერად ამოგზაუროს ისინი სხვადასხვა დროსა თუ გარემოში.
სამომავლო გეგმები…
სამომავლოდ გვინდა საზოგადოებას ახალი და ბევრად საინტერესო სერვისები შევთავაზოთ, რაზეც ამჟამად აქტიურად ვმუშაობთ და იმედი გვაქვს, მალე განვახორციელებთ.
ტექსტი: სოფიო მალანია
ფოტო: ნინი უხურგუნაშვილი
