ლამარა აბჟანდაძე – 90 წლის, ბლოგერი
სპეციალობით პედაგოგი ვარ, მათემატიკის მასწავლებელი გახლავართ. ჩემი ყველა მოსწავლე ჩემი მეგობარია.
სულ სამი წელია, რაც კომპიუტერთან ვმეგობრობ. ჩემი პირველი სტატუსი რომ ნახა ანდრო დადიანმა, შემომთავაზა, ბლოგი დაწერე და დაგიბეჭდავო. ნამდვილად არ ველოდი, რომ ასეთი პოპულარული გახდებოდა. პირველსავე ბლოგს მილიონამდე ნახვა ჰქონდა.
ხშირად მწერენ, ძირითადად დადებითი გამოხმაურებები მაქვს, მაგრამ კრიტიკაც ბევრია, განსაკუთრებით, თუ ჰომოფობიურ საკითხებზე ვწერ.
ვწერ ყველაფერზე, რაზეც მეფიქრება. წერის გარეშე არ შემიძლია.
ადამიანმა ბარიერი საკუთარ თავს არ უნდა შეუქმნას. არ უნდა იფიქრო არცერთ ასაკში, რომ უნდა გაჩერდე − მაშინ მართლაც დამთავრდება ყველაფერი. 91 წლის ვხდები და ეს არაა ბარიერი. ვიცი, რომ კიდევ ბევრი რამის გაკეთება შემიძლია და მინდა, გავაკეთო. მე კიდევ მინდა სიცოცხლე და განვითარება.
ფოტო: ალექსეი სეროვი
