ქართველმა ტოპ მოდელმა, 22 წლის მატილდა გვარლიანმა მსოფლიო მოდის ინდუსტრია კიდევ ერთხელ დაიპყრო.
2025 წლის შემოდგომა-ზამთრის მოდის კვირეულის ფარგლებში მატილდამ კვლავ აალაპარაკა მსოფლიო თავისი განსაკუთრებული და ყველასაგან გამორჩეული სვანური სილამაზით. მოდელი პოდიუმზე გამოვიდა ისეთი გავლენიანი და ცნობილი მოდის სახლებისთვის, როგორებიცაა: AMI, Dior, Chanel, LOUIS VUITTON, DOLCE & GABBANA, Victoria Beckham.
მოდელის ცხოვრებასა და კარიერაში გარდამტეხ მომენტად იქცა Victoria Secret-ის შოუში გამოჩენა. თამამად შეიძლება ითქვას, რომ მატილდას ჯადოსნური ზღაპარი რეალობად იქცა-გოგონა, რომელიც ეკრანიდან ადევნებდა თვალს ანგელოზების პოდიუმზე გამოსვლას და დედის ქუსლიანი ფეხსაცმელებით თავს ანგელოზების ერთ-ერთ წევრად წარმოიდგენდა, სულ მალე მართლაც გახდა ამ საოცნებო შოუს ნაწილი, მატილდა 2024 წელს ვიქტორია სეკრეტის შოუზე გამოჩნდა. „ეს არ ყოფილა ოცნება, ეს იყო მიზანი“-აღნიშნა მოდელმა ამ ფაქტთან დაკავშირებით.
შეგვიძლია ვთქვათ, რომ წამყვანი მოდის სახლების პოდიუმზე მატილდას აქტიურად გამოჩენა მეტწილად სწორედ ამ ფაქტმა განაპირობა, რადგან Victoria Secret -ის შოუზე გამოსვლა თითოეული მოდელის კარიერაში უდიდეს ტრამპლინად ითვლება წარმატებისაკენ მიმავალ გზაზე. ასე მოხდა მატილდას შემთხვევაშიც, შოუში გამოჩენამ მოუტანა მას 17 ტოპ გამოსვლა სეზონზე, ასევე, მოდელმა პირველად დახურა Dolce&Gabbana-ის 2025 FW ჩვენება.
მატილდას უდიდესი წარმატების, მის მიმართ მუდმივად მზარდი ინტერესისა და მაღალი მოდის სახლებთან აქტიურად თანამშრომლობის მიუხედავად, ძალიან გულდასაწყვეტი ფაქტია, განსაკუთრებით ქართველებისთვის, რომ გოგონა, რომელიც პირველი ქართველი მოდელი გახდა, რომელიც Vogue-ის გარეკანზე გამოჩნდა, პირველი ქართველი VS-ის ანგელოზი და მოდის სახლების საყვარელი მოდელი ჯერ არ გვინახავს BALENCIAGA –სა და Blumarine-ის, იმ ბრენდების ჩვენებებზე, რომელთა სათავეშიც ორი მნიშვნელოვანი ქართველი დიზაინერი- დემნა გვასალია და დავიდ კომა არიან. ეს ფაქტი მატილდას გულშემატკივრებში ხშირად გულისწყრომას იმსახურებს დასახელებული ბრენდების მიმართ, რაც კარგად ჩანს სოციალურ ქსელებში.
მატილდა გვარლიანმა სამოდელო კარიერა 14 წლის ასაკში Look Models Management-ში დაიწყო და დღეს ჩვენს წინაშე ის მსოფლიო მოდის კაშკაშა ვარსკვლავად იქცა. მისი პირველი მნიშვნელოვანი საერთაშორისო ჩვენება Dolce & Gabbana-ს 2020 წლის გაზაფხული/ზაფხულის სეზონის შოუა. ამასთანავე, ის ვიხილეთ Valentino-ის, Chanel-ის, Dior-ის და Lacoste-ის კამპანიებში და ისეთი მოდის სახლების ჩვენებებზე, როგორებიცაა: Louis Vuitton-ი, Gucci, Valentino, Dolce&Gabbana, Ralph Lauren-ი, Diesel-ი, Vivienne Westwood-ი,Chanel-ის, Dior-ის, Fendi-ს, Carolina Herrera .
დარწმუნებულები ვართ, რომ პირველი ქართველი ანგელოზი სამოდელო სამყაროს კიდევ არაერთხელ აალაპარაკებს თავისი განსაკუთრებული ვიზუალით, მიზანდასახულობითა და ქარიზმატულობით.
