რედაქტორისგან
ბოლო ხანებში ერთი სიტყვა ამეკვიატა – ორომტრიალი.
როგორი სიტყვები გვაქვს ქართველებს – ზუსტი. ჰოდა, ამ ორომტრიალში წამით შეჩერება და დაფიქრება მინდება ხოლმე. შეგიმჩნევიათ, როგორ იწელება წამი, როდესაც ფიქრობთ? როგორ ხანგრძლივად გეჩვენებათ?
თურმე დრო ისევ ისე გადის, როგორც ადრე, ბავშვობაში, ქვიშის საათის მარცვლებიც ზუსტად იმ სიჩქარით იცლება, როგორც საუკუნეების წინ. თურმე დრო გვაქვს მაშინ, როცა მას არ ვფლანგავთ, როდესაც ვტკბებით მომენტით. სულ მახსენდება ასეთ დროს – “შეჩერდი წამო, მშვენიერი ხარ”.
ახლა ზაფხულია – ჩემი და ბევრის ყველაზე საყვარელი, მზიანი და ზღვიანი დრო. დასვენების დრო. ჰოდა, დაისვენეთ მართლა – ინსტაფილტრებისა და სქროლვის გარეშე, სამაგიდო თამაშებით, ნამდვილი წიგნებითა და ფიქრით.
უთხარით ერთმანეთს ლამაზი და ნამდვილი სიტყვები, იგრძენით სიტყვის ძალა.
აქვე, შვებულებების წინ კიდევ ერთხელ გახსენებთ – შეანელეთ სვლა, მართეთ უსაფრთხოდ ავტომობილი და არ შექმნათ საფრთხე.
სიყვარულით,
მაიკო წერეთელი
ჟურნალ OK!-ის მთავარი რედაქტორი
