მე თბილისში დავიბადე.
წყნარ და მწვანე ქუჩაზე ვცხოვრობდი. ყოველ გაზაფხულზე მერცხალი მოფრინდებოდა ხოლმე ჩემი საძინებლის ფანჯრის კუთხეში გაკეთებულ ბუდეში, ყოველ გაზაფხულზე საათობით ვუყურებდი აივნიდან, როგორ იშლებოდა უზარმაზარი ცხენის წაბლის ხეების თეთრი და მწვანე კვირტები.
დღესაც, როდესაც ბავშვობისდროინდელ ეზოში შევდივარ, რომლის შესასვლელში ახლა შლაგბაუმებია დაყენებული, თითქოს ყველაფერი ცოცხლდება. ამ ეზოში ცხოვრობდა ხალხი, რომელიც ერთმანეთს გზას უთმობდა, გასასვლელში კარს უჭერდა, ნაგავს სანაგვეში ყრიდა, დახვეწილად საუბრობდა და უამრავ წიგნს კითხულობდა, მერე მსჯელობდა და კამათობდა… კამათობდა მას მერე, რაც წაკითხულს გააანალიზებდა.
დღეს, თითქოს გაიოლდა ინფორმაციის მოძიება. Google-ს ყველაფრის პასუხი აქვს. მაგრამ გამოგიტყდებით, და სწორედ „გუგლში“ ვერ ვნახე ის, რასაც ვეძებდი.
რატომ ვამბობთ და რატომ გვჯერა, რომ საქართველო ისტორიულად იმ გზაზე იდგა, რომელსაც დღეს „ევროპულ გზას“ ვუწოდებთ? ამაზე პასუხს „გუგლში“ ვერ ნახავთ.
არადა, ფაქტია, რომ დღეს, როდესაც სასამართლოს დამოუკიდებლობა მიუღწეველ ამოცანად მიგვაჩნია, ჩვენ, ქართველებს, გვქონდა „დართლოს სასამართლო“ 12 ნაფიცი მსაჯულით და ქალი მოსამართლით. ისიც ფაქტია, რომ ათასწლეულის უდიდესი პროგრესი − ქრისტიანობა, ქალმა შემოიტანა საქართველოში.
როდის აქეთ შეგვეშინდა პროგრესის? როდის გამოვუთავისუფლეთ ჩვენი გონება სხვის დაუსაბუთებელ აზრებსა და პროპაგანდას? როდის გადავეჩვიეთ ფიქრს? რა თქმა უნდა, ამაზე მიზანმიმართულად იმუშავეს და ჩვენც ამოვიგლიჯეთ პროგრესისადმი ის სწრაფვა, რომელიც უპირველესად გამოგვარჩევდა მთელი ჩვენი მრავალსაუკუნოვანი არსებობის განმავლობაში.
შევაგროვეთ რამდენიმე ევროპული ისტორია.
კომპანიებს, როგორც ადამიანებს, თავიანთი ისტორიები აქვთ. PSP-ს ისტორიაც დაარსებიდან ევროპას უკავშირდება; ჯერ კიდევ 1994 წელს, ომისშემდგომ დანგრეულ ქვეყანაში, ევროპული მედიკამენტების პირველი დისტრიბუტორი გახდა. სწორედ PSP – ჩემი ოჯახის აფთიაქი, საქართველოს ფარმაციის ლიდერი, ხარისხის გარანტი, ევროპული ღირებულებების მქონე კომპანია წარმოგიდგენთ ევროპულ ისტორიებს.
რატომ უნდა ავირჩიოთ პროგრესი?
ამაზე ჩვენი ჟურნალის სტუმრები გესაუბრებიან. მიზეზი უამრავია. მე კი, მანამდე ქალივით ჩამოვჯდები კიბეზე და ზელენსკას მხარდამჭერ კამპანიას − #SitLikeAGirl შევუერთდები.
სიყვარულით,
მაიკო წერეთელი
ჟურნალ OK!-ის მთავარი რედაქტორი
