უკვე ორი წელია, რაც ონლაინპლატფორმა „ლუმბა“ დაარსდა და რამდენიმე თვეა წარმატებით ოპერირებს ბაზარზე, ქართველ მომხმარებელს აწვდის სასარგებლო და სანდო ინფორმაციას ჯანსაღი კვების შესახებ და ამავდროულად, სთავაზობს სრულიად ჯანსაღ, 100%-ით ნატურალური შემადგენლობის პროდუქციას. „ლუმბაზე“ სასაუბროდ თავად ბრენდის დამფუძნებლებს − ნანიკო კლდიაშვილს და მაშო იოსელიანს შევხვდით, რომელთაც უფრო კარგად გაგვაცნეს „ლუმბა“, გვიამბეს, რამხელა შრომას ახარჯავენ თითოეულ დეტალს და სიღრმისეულად აგვიხსნეს, გაგვანდეს მათი პროდუქციის მაღალი ხარისხის საიდუმლო.
ნანიკო, მაშო, როგორ გაჩნდა „ლუმბას“ იდეა?
(ნანიკო): საფრანგეთში Le Cordon Bleu ინსტიტუტში გავიარე კულინარიის ყოვლისმომცველი, ინტენსიური კურსი, რომელშიც შედიოდა როგორც კულინარია, ასევე, კონდიტერია, და დავიწყე ფიქრი, რომ ეს სფერო ჩემი საქმიანობა გამხდარიყო. მსოფლიო ტენდენციებიდან და საკუთარი ცხოვრების წესიდან გამომდინარე, ჯერ მოყვარულად, ხოლო შემდეგ პროფესიულად დავინტერესდი ნუტრიციოლოგიით. გავიარე რამდენიმე კურსი სტენფორდისა და ინტეგრალური ნუტრიციოლოგიის ინსტიტუტში, რის შედეგადაც გამიჩნდა იდეა და სურვილი, რომ მიღებული ცოდნა საქმიანობაში გამომეყენებინა.
ამ დროს, მაშო სწავლობდა შოტლანდიაში, სხვა მიმართულებით, ეკონომიკისა და ფილოსოფიის ფაკულტეტზე, თუმცა მის ცხოვრებაში ყოველთვის დიდი მნიშვნელობა ენიჭებოდა ჯანსაღი ცხოვრებს წესს და ჩემი დიდი მრჩეველი იყო ყოველთვის ამ საკითხებში. როცა პარტნიორზე ფიქრი დავიწყე, უპირველესად მაშო გამახსენდა. მივედი, გავუზიარე ჩემი იდეები და შევთავაზე, ერთად დაგვეწყო ეს საქმე.
(მაშო): ამ დროს უკვე სერიოზულად ვფიქრობდი პროფესიის შეცვლაზე და ნუტრიციოლოგიის პროფესიულად შესწავლაზე. ნანიკომ რომ იდეები გამიზიარა, მახსოვს, როგორი ბედნიერი ვიყავი, რადგან ჩემი დიდი ხნის ოცნება იყო ამ სფეროში საქმიანობა. ძალიან გამიხარდა, რომ ჩვენი აზრები და მიზნები ერთმანეთს დაემთხვა.
რამდენად რთული აღმოჩნდა იდეის განხორციელება?
(ნანიკო): ორი წლის წინ დავაფუძნეთ ჩვენი კომპანია და მას შემდეგ სრული დატვირთვით ვმუშაობთ. ეს გაცილებით გრძელი და რთული გზა აღმოჩნდა, ვიდრე წარმოგვედგინა. ამ პერიოდის განმავლობაში ბევრი სირთულე გამოვიარეთ − იქნებოდა ეს ღამის გათენება, ლაბორატორიებში სირბილი თუ ტექნოლოგებთან მუშაობა.
(მაშო): საკვებთან შეხება საკმაოდ სარისკო და საპასუხისმგებლოა, რადგან საქმე ადამიანის ჯანმრთელობას ეხება. რადგან ჩვენი პროდუქცია არ შეიცავს კონსერვანტებს, ემულგატორებს და ხელოვნურ დანამატებს, კიდევ უფრო რთული იყო სრულყოფილი პროდუქტი შეგვექმნა. ყველა დეტალს დიდი სიფრთხილით გავდივართ და წარმოების ყოველ ეტაპში თანაბრად ვართ ჩართულნი.
გვითხარით, რას სთავაზობს კომპანია „ლუმბა“ მომხმარებლებს?
(მაშო): „ლუმბა“ ჯანსაღი ცხოვრების წესზე ორიენტირებულ ონლაინპლატფორმას წარმოადგენს, რომლის მისია სხვადასხვა გზით ამ თემის წახალისება, საზოგადოებრივი ცნობიერების ამაღლება და ჯანსაღი საკვების წარმოებაა. „ლუმბა“ მომხმარებელს სთავაზობს ნატურალურ, უშაქრო, ულაქტოზო და ასევე, უგლუტენო პროდუქტს.
რა სახის პროდუქციის შეძენა არის შესაძლებელი თქვენს კომპანიაში?
(ნანიკო): ამჟამად სამი ტიპის პროდუქტი გვაქვს − ენერგიის ბურთები, რომლებიც მდიდარია უჯრედისით, შეიცავს პროტეინის, სასარგებლო ნახშირწყლებისა და ჯანსაღი ცხიმების ნაერთს. მათ ვამზადებთ სხვადასხვა თხილით, ფინიკით და უშაქრო ჩირებით, კონსერვანტებისა და რაფინირებული შაქრის გარეშე. თითოეულ შეკვრას აქვს 79-106 კალორია, ინგრედიენტების მიხედვით. ენერგიის ბურთები ხელს უწყობს კუნთოვანი მასის სწორ ზრდას, ჯანსაღი წონის შენარჩუნებას და აწესრიგებს კუჭ-ნაწლავის მოქმედებას, რადგან მათში ცხიმების, პროტეინებისა და ნახშირწყლების დაბალანსებული კონცენტრაციაა, არ იწვევს სისხლში შაქრის მკვეთრ მომატებას და შესაბამისად, ხელს უწყობს ენერგიის სტაბილურ შენარჩუნებას დღის განმავლობაში. ასევე, გვაქვს შვრიის ბარები, რომლებიც ყველა ინგრედიენტს შეიცავს, რაც დილის ფაფაში უნდა იყოს − ზეითუნის ზეთს, თაფლს, და მცენარეულ ომეგა-3-ს სელის ან ჩიას სახით. შვრიის ბარი იდეალურია საუზმეზე მისართმევად, რადგან საკმაოდ დიდხანს ტოვებს დანაყრების შეგრძნებას. ამასთანავე, შეიცავს მკვებავი ნივთიერებების დღიურ დოზას და ხელს უწყობს მომნელებელი სისტემის გამართულ მუშაობას. გარდა ამისა, გვაქვს შვრიისა და მწვანე ბიოწიწიბურას გრანოლები. იმისათვის, რომ წიწიბურა მარტივად აითვისოს ჩვენმა ორგანიზმმა და შეინარჩუნოს დადებითი თვისებები, მას ჯერ ვაღვივებთ და შემდეგ ვაშრობთ 42 გრადუსზე. კიდევ სხვა ახალი პროდუქტები გვაქვს სატესტო რეჟიმში და გვინდა როგორც საზღვრებს გარეთ გასვლა, ასევე ლოკალურად განვითარება.
(მაშო): ვაწარმოებთ ბლოგს, რომლის საშუალებით ბევრ სასარგებლო ინფორმაციას ვაწვდით ადამიანებს სწორ კვებასა და ჯანსაღი ცხოვრების წესზე. ეს არის ერთგვარი საგანმანათლებლო-საინფორმაციო პლატფორმა, საიდანაც მნიშვნელოვან და სასარგებლო, მეცნიერულ ინფორმაციას მიიღებენ ადამიანები, რაც მთავარია − გასაგებ ენაზე. ეს ინფორმაცია თანამედროვე კვლევებითა და მეცნიერული მიდგომებით გახლავთ გამყარებული და არ არის სხვადასხვა ვებგვერდიდან აღებული ინფორმაციის ნაკრები.
რამდენადაც ვიცით, „ლუმბას“ რეცეპტები უნიკალურია. თავად ადგენთ რეცეპტებს?
(ნანიკო): რადგან „ლუმბას“ პროდუქცია მხოლოდ ნატურალური პროდუქტისგან მზადდება, დიდი დრო ეთმობა უნიკალური რეცეპტების შემუშავებას. ზედმიწევნით ვარჩევთ ყველა ინგრედიენტს და მათ კომბინაციებს, რათა სასურველ გემოს მივაღწიოთ და საზოგადოებას ვაჩვენოთ, რომ ჯანსაღი საკვები ძალიან გემრიელი შეიძლება იყოს.
(მაშო): ჩვენი მთავარი მიზანია, „ლუმბას“ პროდუქცია გემრიელთან ერთად იყოს ნუტრიციულად დაბალანსებული და შეიცავდეს ჯანსაღ ცხიმებს, ცილას, უჯრედისს, ვიტამინებსა და მინერალებს.
რა გზით არის შესაძლებელი „ლუმბას“ პროდუქციის შეძენა?
(ნანიკო): ჯერჯერობით მხოლოდ „ვოლტის“ აპლიკაციაზე ვართ, მაგრამ ძალიან მალე შევალთ მაღაზიებში, სავარჯიშო დარბაზებში და სხვა მრავალ ადგილას.
(მაშო): უახლოეს მომავალში ჩვენს ინსტაგრამ-გვერდზე (Loomba Food Lab) განვათავსებთ იმ მაღაზიებისა და ობიექტების სრულ სიას, სადაც იქნება შესაძლებელი „ლუმბას“ პროდუქციის შეძენა. ასევე, სულ მალე გვექნება ვებგვერდი, საიდანაც გაიყიდება პროდუქცია და შეძლებთ ჩვენი ბლოგის უფრო ვრცლად წაკითხვას.
ტექსტი: თაკო გვაზავა
ფოტო: მასუ მწარიაშვილი
