ლიამ და ქრის ჰემსვორსები არიან ავსტრალიელი მსახიობები, რომლებიც საზოგადოებამ არამხოლოდ მათი სამსახიობო ნიჭით და გამორჩეული გარგენობით, არამედ ყველასათვის სამაგალითო ურთიერთობით შეიყვარა. ლიამი და ქრისი ხშირად საუბრობენ იმის შესახებ, რომ მათ კარიერულ წინსვლაში მათმა ურთიერთობამ ძალიან დიდი წვლილი შეიტანა. ძმები ყოველთვის ეხმარებოდნენ ერთმანეთს წისვლაში და არასდროს ხედავდნენ ერთმანეთს, როგორც კონკურენტებს კინოინდუსტრიაში წარმატების მისაღწევად გასავლელ გზაზე. წარმოგიდგენთ ძმები ჰემსვორსების ინტერვიუს, სადაც ვარსკვლავები თავიანთ ურთიერთობაზე გულახდილად საუბრობენ.
სოციალურ მედიაში ხშირად საუბრობენ იმის შესახებ, რომ თქვენი ძმობა ყველასთვის სამაგალითოა. არაერთ ინტერვიუში აღნიშნე ლიამ, რომ შენთვის ქრისი არამხოლოდ უფროსი ძმა, არამედ ინსპირაციის წყაროა.
ლიამი: მე არასდროს მინახავს ადამიანი შრომობდეს ისე, როგორც ქრისი. არ მახსოვს მას ეზარებოდეს რამის გაკეთება, როდესაც საქმე აქვს. მაქსიმალურად იხარჯება, როდესაც თავის საქმეს აკეთებს… როდესაც პირველად გადავწყვიტე ქასთინგებზე გასვლა, ყოველთვის მავარჯიშებდა, უნდოდა რომ ყველაფერი უნაკლოდ მცოდნოდა. ყოველთვის მეუბნებოდა, რომ საკუთარი თავი არ უნდა დამეზოგა და საკუთარი ოცნებისთვის თავდაუზოგავად მეშრომა.
საინტერესოა, როგორ დაიწყო ქრის თქვენი სამსახიობო კარიერა, იყავით თუ არა ბავშვობიდანვე დაინტერესებული ფილმებში მონაწილეობით და რამ მოახდინა თქვენს გადაწყვეტილებაზე ზეგავლენა?
ქრისი: პირველად მახსოვს, რომ ქასთინგი, რომელზეც მივედი იყო რეკლამის და არა ფილმის. არ მომწონდა რეკლამები, ვხვდებოდი, რომ ეს საქმე ჩემი არ იყო, მომწონდა ფილმები და უფრო მეტად მიზიდავდა ეკრანზე სხვადასხვა პერსონაჟების თამაში. ძალიან ბევრ რეკლამაში ვცადე ბედი, თუმცა წარმატებული არცერთი არ გამოდგა. პირველი სამსახური, რომელიც მივიღე იყო ავსტრალიური სატელევიზიო შოუ სახელად Neighbors.
მიუხედავად იმისა, რომ ძალიან ბევრ ფილმში მიიღეთ მონაწილეობა, ადამიანები მაინც Thor-ის სახელით გიცნობენ. ძალიან პოპულარულია ისტორია გადაღებების შესახებ, როდესაც ნატალი პორტმანის ნაცვლად თქვენს მეუღლეს აკოცეთ. შეგიძლიათ დაწვრილებით მოგვიყვეთ?
ქრისი: ჩვენ ვიყავით ჰონგ-კონგში. მახსოვს როდესაც სტუდიაში ვიყავით რეჟისორმა მითხრა, რომ ბოლო, კოცნის სცენა გვქონდა გადასაღები. ნატალი პორტმანი მაშინ ჩვენთან ერთად არ იმყოფებოდა. ამ დროს რეჟისორმა მითხრა, რომ მათ ჰყავდათ არჩეული რამდენიმე გოგონა, რომელიც დაახლოებით ნატალის სიმაღლეები იყვნენ და მე შესაფერისი უნდა ამერჩია. ამ დროს ვთქვი: “ჩემი მეუღლე აქ არის, ის ზუსტად ნატალის სიმაღლეა, თუ მომიწევს ვაკოცო ვინმეს, სჯობს ეს იყოს ჩემი მეუღლე. ასე, რომ ვინც არ იცით, Thor-ში საბოლოო კოცნა არის ჩემი და ჩემი ცოლის და არა ნატალი პორტმანის ან რომელიმე სხვა მსახიობის.
ლიამ, შენ პატარა ძმა ხარ, რომელიც ინსპირაციას ხშირად იღებს უფროსი ძმისგან, მაგრამ რა არის ის კონკრეტული მახასიათებელი, რაც შენია და რადიკალურად გამოგარჩევს სხვებისგან, როგორც შენი საკუთარი ძმისგან, ასევე სხვა მსახიობებისგან?
ვნება, სურვილი და მონდომება. რაც მაინტერესებს ყოველთვის ყველაზე მნიშვნელოვანია ჩემთვის და არსდროს მეზარება მისი გაკეთება. სკოლაშიც ასეთი დამოკიდებულება ყველაფრის მიმართ, ადრეული ასაკიდანვე ვიცოდი, რომ რაც მინდოდა იმაზე უარს არ ვიტყოდი. ყოველთვის მომწონდა ფილმები, განსაკუთრებით მომწონდა იმის იდეა, რომ მათში მონაწილეობას მივიღებდი. რთული წარმოსადგენი იყო ჩემთვის მემუშავა 5-დან 9 საათამდე სამსახურში, რომელიც არ მაინტერესებდა, ან რომელსაც ვერ ვიტანდი. ჩემი აზრით, ეს არის მიზეზი, რატომაც გავხდი წარმატებული. მე ყოველთვის ვიცი, რომ საქმე, რომელსაც ვაკეთებ მიყვარს და სიამოვნებას მანიჭებს. თუ ოდესმე ინტერესს დავკარგავ, სხვა საქმეს გავაკეთებ.
რამდენად გრძნობდით მხარდაჭერას მშობლებისგან, გქონდათ თუ არა ბავშვობიდანვე არჩევანის თავისუფლება?
ლიამი: ჩვენმა მშობლებმა გვასწავლეს, რომ ყოველთვის უნდა გამოვხატოთ საკუთარი აზრი, არ აქვს მნიშვნელობა, რას ფიქრობენ სხვა ადამიანები. მათ გვასწავლეს გვეკეთებინა ცხოვრებაში ის, რაც გვიყვარდა და სიამოვნებას გვანიჭებდა. ჩემი აზრით, ეს ყველაზე დიდი საჩუქარი იყო მათგან, რასაც მეც აუცილებლად გავუკეთებ ჩემს შვილებს.
როდესაც უკან იხედებით, ხედავთ თქვენს განვლილ გზას. რა არის ის პატარა მაგრამ ძალიან მნიშვნელოვანი მომენტები, რითაც პირადად თქვენ კმაყოფილი ხართ?
ლიამი: როდესაც ინდუსტრიაში ხარ და თან წარმატებული მსახიობიც ხარ, ნიშნავს, რომ შეგიძლია დაეხმარო შენს მეგობრებსა და ოჯახის წევრებს. არის ძალიან ბევრი საქველმოქმედო საქმე, რომლის გაკეთებაში გეხმარება შენი შემოსავლები და სანაცნობო წრე. სხვების დახმარება ყოველთვის სასიამოვნოა ჩემთვის.
გამოარჩევდით თუ არა რეჟისორს, რომელთან მუშაობაც თქვენთვის განსაკუთრებულად მნიშვნელოვანი იყო?
ლიამი: ტაიკა ვაიტიტი. თითოეული ფილმი, რომელიც მან შექმნა არის შესანიშნავი. მას აქვს ნიჭი ისტორიის შესანიშნავად მოყოლის, არავის შეუძლია გადაიღოს მისნაირი კომედიური ფილმი, მისი ფილმები არამხოლოდ გაცინებს, არამედ გატირებს კიდეც. მას შემდეგ, რაც ჩემმა ძმამ ქრისმა მასთან ერთად იმუშავა, ის ოჯახისთვის ძალიან მნიშვნელოვანი ადამიანი და მეგობარი გახდა. მე ის ძალიან მიყვარს.
ქრის, შენ ლიამთან შედარებით ასაკით დიდი ხარ. მალე 40 წლის გახდები რას ფიქრობ ასაკის მატებასთან დაკავშირებით?
ქრისი: ბოლო რამდენიმე წლის განმავლობაში მივხვდი, რომ ეს რეალობაა და მას არ უნდა გავექცეთ. აქამდე მეგონა, რომ “გაუნადგურებელი” ვიყავი და სამუდამოდ ვიცხოვრებდი. რა თქმა უნდა, ყველამ ვიცით, რომ ეს ასე არ არის, თუმცა, როდესაც ასაკი გემატება ამას უფრო სხვანაირად აცნობიერებ, განსაკუთრებით მაშინ, როდესაც ბავშვები გყავს. 39 წლის ვარ და ისეთი შეგრძნება მაქვს, თითქოს კვლავ 12 წლის ვარ. როდესაც ადრეულ ასაკში ვიყავი სხვა რაღაცებს ვაქცევდი ყურადღებას, მაგალითად იმას, თუ როგორ გამოვიყურებოდი. ამჟამად უფრო მნიშვნელოვანი რაღაცებით ვინტერესდები, რადგან ცხოვრებაში დრო ძალიან სწრაფად გადის.
გიყვართ თუ არა რომელიმეს სახის კანის მოვლა და გაქვთ თუ არა კონკრეტული რუტინა, რომელსაც ყოველდღიურად იცავთ?
ქრისი: რომ გითხრათ, რომ განსაკუთრებულად ვუვლით თავს მოგატყუებთ, მაგრამ ალბათ უფრო მე ვარ ამით დაინტერესებული ვიდრე ლიამი. საკუთარ მეუღლეს ვპარავ ხოლმე დამატენიანებელ კრემს და მზისგან დამცავ გელს. ჩემი რჩევა იქნება, ყველამ გამოიყენოთ მზისგან დამცავი საშუალებები, მზის სხივებისგან აუცილებლად უნდა დაიცვათ თავი, განსაკუთრებით ზაფხულში.
