ივენთ კომპანია Laka, რომელსაც ჟურნალი OK! -ს მკითხველი სხვადასხვა მიმართულებით (Laka Wedding, Laka Elité Club, Laka Dance Therapy) იცნობს, 11 წელია წარმატებით ოპერირებს ბაზარზე. ის ახალ საავტორო პროგრამას გვთავაზობს – ეს არის Laka Ètiquette. ეტიკეტის ისტორია, როლი და პრაქტიკული ინფორმაციის ცოდნა ცხოვრებას მეტად უკონფლიქტოს და საინტერესოს ხდის. უფრო ვრცლად მისი დამფუძნებელი ლაკა წერეთელი გვესაუბრა.
როგორ გაჩნდა ამ პროგრამის შექმნის იდეა?
ნებისმიერი ურთიერთობა ოჯახში, სამსახურსა თუ საზოგადოებრივ სივრცეში, დამოკიდებულია იმაზე, თუ როგორ ვიცავთ საზღვრებს, ვუსმენთ ერთმანეთს და ვავლენთ პატივისცემას. 11-წლიანმა გამოცდილებამ მაჩვენა, რომ ამ თემაზე საუბარი სასიკეთოა. ძალიან გამიმართლა და ეტიკეტი ბავშვობაში, სკოლაში ვისწავლე. მაშინვე მივხვდი, რომ ეს იყო ღრმა, საინტერესო და საჭირო სფერო. წლების განმავლობაში ვიკვლევდი, ვაგროვებდი ინფორმაციას და ამ ყველაფრის პარალელურად სურვილი გამიჩნდა, რომ ეს გამოცდილება ჩვენი მომხმარებლისთვის ხელმისაწვდომი გამეხადა. ასე დაიბადა საავტორო პროგრამა. სივრცე, სადაც წესრიგი, გემოვნება და ზრუნვა ერთიანდება – ეს კი ადამიანებს ცხოვრების ხარისხის გაუმჯობესების შანსს აძლევს.
რას სთავაზობს „ეტიკეტის“ პროგრამა საზოგადოებას?
საზოგადოებას ვთავაზობთ ახალ სერვისს – „ეტიკეტის“ შესწავლას. იქიდან გამომდინარე, რომ კომპანიის მომხმარებლები სხვადასხვა ასაკობრივ კატეგორიას წარმოადგენენ, პროგრამა გაწერილია ბავშვების, მოზარდებისა და ზრდასრულებისთვის.
პროგრამის ფარგლებში თქვენ გაეცნობით ისეთ თემებს, როგორიცაა:
- ეტიკეტის განმარტება, მნიშვნელობა და როლი თანამედროვე ცხოვრებაში;
- ეტიკეტის ისტორია – როგორ და რატომ გახდა საჭირო სხვადასხვა წესის დამკვიდრება;
- რატომ არის მნიშვნელოვანი ეტიკეტი პირად და პროფესიულ ცხოვრებაში;
- კომუნიკაციის წესები და საკუთარი თავის წარდგენა;
- სუფრის ეტიკეტი – სუფრასთან ქცევის, მირთმევისა და სერვირების წესები;
- ციფრული ეტიკეტი – მიმოწერისა და კომუნიკაციის წესები სოციალურ ქსელებში;
- სხეულის ენა;
- როგორ შევარჩიოთ განსხვავებული სამოსი და, ამავდროულად, დავიცვათ დრესკოდი;
- პრაქტიკული ტექნიკები.
სასწავლო პროგრამა ინდივიდუალურად იწერება, ნებისმიერი სახის მოთხოვნიდან გამომდინარე – წყვილის, ოჯახისა თუ რომელიმე პროფესიული გუნდისთვის.
რატომ გადაწყვიტეთ კურსში სხეულის ენის დამატება?
სხეულის ენა კურსში ჩემი წარსული გამოცდილებიდან გამომდინარე ჩავამატე. წლების წინ ვმუშაობდი საგამოძიებო დეპარტამენტში, სადაც თითოეული ჟესტი და მზერა ინფორმაციის ძალიან მნიშვნელოვან ნაწილს შეიცავდა. მაშინ გავიაზრე, რომ სხეულის ენა არის „ჩუმი დიალოგი“, რომელმაც შესაძლოა გაცილებით მეტი გვითხრას. ჩემი პროგრამის ფარგლებში მსმენელები სწავლობენ, როგორ ამოიცნონ სხვისი განწყობა ან დამოკიდებულება არავერბალური ქცევიდან გამომდინარე და პარალელურად, როგორ მართონ საკუთარი სხეული.
როგორ იმოქმედებს ეს პროგრამა მონაწილეების ყოველდღიურ ცხოვრებაზე?
ჩვენ უკვე ჩავატარეთ ინდივიდუალური და კოლექტიური მასტერკლასი, რამაც დიდი მოწონება დაიმსახურა. საინტერესოა დაკვირვება, თუ როგორ გარდაიქმნება ადამიანის ყოველდღიური ჩვევები და დამოკიდებულებები მას შემდეგ, რაც ის ჩაუღრმავდება ეტიკეტის კულტურას. მჯერა, რომ პროგრამის მონაწილეები ბევრად თავდაჯერებულები გახდებიან ნებისმიერ გარემოში, ეს იქნება პროფესიული შეხვედრა თუ ოჯახური თავშეყრა. რაც მთავარია, ისწავლიან სხვა ადამიანის მოსმენასა და მათი ემოციების პატივისცემას.
მნიშვნელოვანია, რომ ეტიკეტის სწავლა ადრეული ასაკიდან ან თინეიჯერობიდან იწყებოდეს. ამ ასაკში მიღებული ცოდნა საფუძველს უყრის ემპათიური პიროვნების ჩამოყალიბებას.
დღეს, როცა საზოგადოება მუდმივად იცვლება და სოციალური ნორმები ყოველდღიურად ახალ ფორმას იღებს, განსაკუთრებით მნიშვნელოვანია, რომ ადამიანებმა საკუთარი ინდივიდუალობის შენარჩუნების პარალელურად, სხვისი საზღვრების პატივისცემა შეძლონ. სწორედ ამიტომ, „ეტიკეტის“ სწავლება აღარ არის მხოლოდ ელიტური წრის პრივილეგია, როგორც საუკუნეების წინ იყო. ის ყოველდღიურობის ნაწილად იქცევა და საკუთარ თავთან, სხვებთან და საზოგადოებასთან ჰარმონიული ურთიერთობის საფუძველს შექმნის.
როგორც ვიცი, ცხოვრებაში ბევრი პროფესიული საწყისი გქონიათ. რა კარიერულ რჩევებს მისცემდით 40+ ასაკის ქალბატონებს?
ვურჩევდი, რომ თამამად გადადგან ნაბიჯები ოცნებისკენ მიმავალ გზაზე, იმიტომ, რომ ცხოვრება ხელოვნებაა.
ტექსტი: მარიამ ჩოქური
ფოტო: თამარა გონჯილაშვილი
