ჰოლივუდში ბევრი ლამაზი ისტორიაა, მაგრამ ეს დიდი ხანია ლეგენდად იქცა. 2013 წელს სამეცნიერო ფანტასტიკური თრილერის, „გრავიტაცია“-ს წარმატებული გაქირავების შემდეგ ოსკაროსანმა მსახიობმა, ჯორჯ კლუნიმ, რომელმაც ფილმში მთავარი როლი შეასრულა, სახლში 14 უახლოესი მეგობარი შეკრიბა – ეს ადამიანები იმ დროიდან უჭერდნენ მხარს, როცა მსახიობს ახლობელი ადამიანების გარდა, არავინ იცნობდა.
როდესაც ყველა ადგილზე იყო, კლუნიმ მაგიდაზე 14 ჩემოდანი დადო – თითოეულში ზუსტად ერთი მილიონი დოლარი იდო. იმ დროს მსახიობი 52 წლის და დაუქორწინებელი იყო. მან გადაწყვიტა, რომ მეგობრები, რომლებიც ათწლეულების მანძილზე უპირობოდ უჭერდნენ მხარს, გულუხვ საჩუქარს იმსახურებდნენ. ასევე დაამატა, რომ თუ ვინმე საჩუქარზე უარს იტყოდა, სხვებიც ვერაფერს მიიღებდნენ.
ეს ამბავი 2017 წელს გახდა ცნობილი, როდესაც ერთ-ერთმა მეგობარმა, ბიზნესმენმა რენდე გერბერმა კლუნის გულუხვობის შესახებ საჯაროდ მოყვა.
თავიდან მსახიობმა მომხდარი არც უარყო და არც დაადასტურა, ახლახან კი აღიარა, რომ ასეთი ფაქტი ნამდვილად მოხდა. როგორც კლუნიმ განმარტა, ფილმში „გრავიტაცია“ მონაწილეობით საკმაოდ დიდი თანხა გამოიმუშავა. პროდიუსერებმა, რომლებიც ასეთ წარმატებას არ ელოდნენ, მსახიობებს ხელფასის ნაცვლად, შემოსავლის გარკვეული პროცენტი შესთავაზეს.
„მათ გარეშე ხომ ეს ყველაფერი არ მექნებოდა. ავტობუსი რომ დამეჯახოს, ისინი ჩემს ანდერძში აუცილებლად იქნებიან, მაშინ რატომ უნდა ველოდო ავტობუსის დაჯახებას?“ – თქვა მსახიობმა და 14 ჩემოდანი გაამზადა.
სამეცნიერო ფანტასტიკური თრილერი „გრავიტაცია“, რომლის რეჟისორი, თანაპროდიუსერი, თანამონტაჟისტი და თანასცენარისტი ალფონსო კუარონია, ეკრანებზე 2013 წელს გამოვიდა. ფილმის მთავარი გმირები, რომლებსაც სანდრა ბულოკი და ჯორჯ კლუნი განასახიერებენ, ამერიკელი ასტრონავტები არიან, რომლებიც შატლის აფეთქების შემდეგ შუაგულ კოსმოსში აღმოჩნდებიან. ფილმის პრემიერა ვენეციის კინოფესტივალზე შედგა და მაღალი შეფასებები დაიმსახურა. „გრავიტაცია“, რომლის შემოსავალმა 723 მილიონ დოლარს მიაღწია, 2013 წლის მეშვიდე ყველაზე შემოსავლიანი ფილმია. ის ოსკარის 10 ნომინაციაში წარადგინეს, საიდანაც 7 მოიგო. პროექტს ასევე ექვსი BAFTA და ოქროს გლობუსის 1 ჯილდო გადაეცა.
ასევე დაგაინტერესებთ
#OK! “მეგობრობა, რომელსაც წლებმა ვერაფერი დააკლო” – ჯორჯ კლუნი და ჯულია რობერტსი
