OK! გაესაუბრა renew-ს დამფუძნებელსა და მხატვარს, თეკლე ხახუბიას. რესპონდენტმა ინტერვიუში გაიხსენა დრო, როდესაც პირველ ნაბიჯებს დგამდა თავის საქმიანობაში. თეკლემ ასევე ისაუბრა ნამუშევრების შექმნის პროცესისა და სამომავლო გეგმების შესახებ.
ხატვით პირველად როდის დაინტერესდით?
ბავშვობიდან მიყვარდა ხატვა, თუმცა პირველი წარმატება 15 წლის ასაკში მქონდა, როდესაც მოსკოვში ზურაბ წერეთლის გალერეაში გამართულ საერთაშორისო გამოფენაზე გავიმარჯვე. სკოლის დასრულების შემდეგ კი გადავწყვიტე გამეგრძელებინა ჩემი ჰობი და მისთვის საქმიანობის სახე შემეძინა, რის შედეგადაც დავიწყე მომზადება და გამოცდები ჩავაბარე სამხატვრო აკადემიაში, არქიტექტურის მიმართულებით. ვხატავდი ცნობილი მხატვრების მიერ შესრულებული ნახატების ასლებს, რომლებიც იყიდებოდა ბაქოში. ამის შემდეგ, დიდი ხნის განმავლობაში აღარაფერი დამიხატავს, რადგან ჩემი ბრენდის − renew-ს ფეხზე დაყენებას დიდი ენერგია და შრომა სჭირდებოდა. ახლა კი, დიდი სიხარულით მინდა გითხრათ, რომ 2-3 თვეა, რაც კვლავ მივუბრუნდი ჩემს საყვარელ საქმიანობას.
რამდენად ძლიერი გავლენა ჰქონდა თქვენს სამომავლო საქმიანობაზე თქვენსავე ჰობის?
ვფიქრობ, დიდი გავლენა იქონია, ვინაიდან ყოველთვის მიყვარდა და მაბედნიერებდა ის, რასაც ვაკეთებდი. ამას დაემატა ისიც, რომ მქონდა ხედვა, გემოვნება, ფერების აღქმა და ა.შ. სწორედ ამ ყველაფრის დამსახურებაა ის, რომ 7 წლის წინ შევქმენი საკუთარი ბრენდი renew, რომელზეც სულ მალე საზოგადოების მხრიდან საკმაოდ დიდი მოთხოვნა გაჩნდა. აქ წარმოდგენილია ქალის ტანსაცმლისა და აქსესუარების ხაზი.
ყველაზე ბედნიერი მომენტი მუშაობისას…
renew-ს პროდუქციის მსგავსად, როდესაც ნახატი იმაზე ლამაზი გამოდის, ვიდრე წარმომედგინა, ძალიან გახარებული ვარ. ასევე, მინდა აღვნიშნო ისიც, რომ პირველი ადამიანი, ვისაც ჩემს ახალ ნამუშევარს ვაჩვენებ, ჩემი უფროსი ვაჟიშვილი სანდროა, რომელიც ყოველთვის მხარში მიდგას.
სამომავლო გეგმები…
სურვილი მაქვს, ჩემი ნახატები ისეთივე ცნობადი და მოთხოვნადი გახდეს, როგორიცაა renew. ასევე, ვაპირებ ჩემი ნახატების ქვეყნის გარეთ გატანას, რადგან მათზე იქ უფრო დიდია მოთხოვნა.
