Georgian New Style ძალიან საინტერესო და მრავალფეროვანი ქართული ბრენდია, რომელიც საზოგადოებას ქალბატონების სამოსს სთავაზობს. ბრენდი უკვე რამდენიმე წელია, რაც ბაზარზე გამოჩნდა და ამ დრომდე უამრავი ერთგული მომხმარებელი გაიჩინა. როგორია სამუშაო პროცესი, რა სახის პროდუქციას სთავაზობს საზოგადოებას, რა არის ბრენდის უპირატესობა… ამ და სხვა საინტერესო შეკითხვებზე ბრენდის დამფუძნებელი და დიზაინერი − თამარ მარგველაშვილი გვიპასუხებს.
რამდენი ხანია, რაც ბრენდი Georgian New Style ბაზარზე გამოჩნდა და როგორ დაიბადა იდეა?
ბრენდის დაარსების იდეა ოთხი წლის წინ დაიბადა. უკვე ორი წელია, რაც Georgian New Style ბაზარზე ოფიციალურად გამოჩნდა და გაიცნო საზოგადოებამ. თუმცა, უნდა ითქვას, რომ ეს არ იყო ჩვენი პირველი გამოჩენა, რადგან მანამდეც გვქონდა საკუთარი სამკერვალო, რომელსაც გარკვეული პერიოდის განმავლობაში შეწყვეტილი ჰქონდა მუშაობის პროცესი. გადავწყვიტეთ აღგვედგინა და უფრო სერიოზული სახით წარვმდგარიყავით მომხმარებლის წინაშე.
რა სახის პროდუქციას სთავაზობთ მომხმარებელს?
ჩვენ ვაწარმოებთ მხოლოდ ქალბატონის სამოსს, თუმცა ვთავაზობთ ყველაფერს, რაც კი შეიძლება მისთვის სასურველი იყოს, მათ შორის: შარვლებს, მაისურებს, პიჯაკებს, კაბებს და ა.შ. ვცდილობთ Georgian New Style იყოს მრავალფეროვანი და მომხმარებლისთვის საინტერესო, მისი წარმოებითა და შეთავაზებული სამოსით.
პროფესიით იურისტი ვარ, მაგრამ ჩემი საქმიანობა დიზაინერობას დავუკავშირე და დღეს Georgian New Style-ში ყველაფერი ჩემი დიზაინით იქმნება. მიუხედავად ამისა, ვფიქრობ, რომ კარგად გამომდის ეს საქმე და ამას ჩვენი მომხმარებლების განწყობაც მიდასტურებს. ეს კი მაძლევს უფრო დიდ მოტივაციას, შევთავაზო მათ რაც შეიძლება მრავალფეროვანი კოლექცია.
როგორია სამუშაო პროცესი?
მაშინ, როდესაც ავარჩევ ამა თუ იმ დიზაინს, ესკიზს ვუგზავნი ჩვენი ბრენდის კონსტრუქტორს, რომელიც აკეთებს თარგს. შემდეგ ვიწყებთ მის შეკერვაზე მუშაობას და საბოლოო ჯამში, გარკვეული ცვლილებების შეტანით მივდივართ სასურველ შედეგამდე.
რა სახის მასალებს იყენებთ სამოსის შეკერვისას?
ძირითადად, ვიყენებთ სეზონურ მასალას. ჩვენთვის უმთავრესია ხარისხი და მუდმივად მის გაუმჯობესებასა და საზოგადოებისთვის უკეთესის შეთავაზებაზე ვმუშაობთ.
რა მიგაჩნიათ ბრენდის უპირატესობად?
მიმაჩნია, რომ ყველა ბრენდს აქვს მხოლოდ მისთვის დამახასიათებელი ნიშა და მიმართულება. შესაბამისად, ვფიქრობ, რომ ჩვენც საკუთარი ინდივიდუალური სტილით დავიმკვიდრეთ თავი, რომელიც არც მომხმარებელს დარჩენია შეუმჩნეველი. ამას კი მათი დამოკიდებულება და განწყობა გვიდასტურებს.
გარდა ამისა, ვფიქრობ, მომხმარებლისთვის ძალიან მნიშვნელოვანი და სასიამოვნოა ჩვენი მომსახურება, რადგან პროდუქციას ყოველთვის დროულად ვაწვდით და ფასებიც ყველა სეგმენტზე გვაქვს მორგებული.
სად შეგვიძლია პროდუქციის შეძენა?
ამ ეტაპზე, გვაქვს ონლაინმომსახურება. მომხმარებელს შეუძლია ჩვენს ფეისბუქ და ინსტაგრამ-გვერდებზე შეარჩიოს მისთვის სასურველი პროდუქცია და უახლოეს დღეებში კურიერი მიაწვდის საქართველოს მასშტაბით, ნებისმიერ ადგილას.
რატომ Georgian New Style?
მინდოდა, ქართულთან ყოფილიყო დაკავშირებული და სწორედ ამიტომ გადავწყვიტეთ ეს სახელწოდება.
რა სახის სიახლეებს სთავაზობთ მომხმარებლებს შემოდგომის სეზონისთვის?
ჩვენ არა მხოლოდ შემოდგომისთვის, არამედ მუდმივად სიახლის ძიებაში ვართ და საკუთარ მომხმარებლებს ყოველთვის ვანებივრებთ სეზონური სიახლეებით.
სამომავლო გეგმებზე გვესაუბრეთ.
მომხმარებლების დიდი მოთხოვნიდან გამომდინარე, სამომავლოდ აუცილებლად ვგეგმავთ მაღაზიის გახსნას.
