სადღესასწაულო კომპანია Event Room სალომე ბასილაძემ დააფუძნა და უკვე სამი წელია, რაც ქუთაისის ბაზარზე ოპერირებს. სალომეს თქმით, ყოველი ადამიანი საკუთარი წარმატების ისტორიას თავად წერს. ერთ-ერთი მათგანი თვითონაა. ოჯახის დახმარებითა და გვერდში დგომით ბიზნესი განავითარა. მრავალფეროვნების მოყვარული, თავისი ხელწერით გამოირჩევა და სიახლის მუდმივ ძიებაშია. „ივენთ რუმის“ საქმიანობის შესახებ სალომე უფრო ვრცლად და დეტალურად გვესაუბრა.
გვიამბეთ Event Room -ის შექმნის შესახებ.
სამი წლის წინ შევქმენი ივენთ კომპანია. ბავშვობიდან მოყოლებული, ყოველთვის მიყვარდა სილამაზეების შექმნა, გატაცებული ვიყავი ხელსაქმით. მიყვარდა ღონისძიებების მოწყობა. მქონდა ორგანიზატორობის უნარიც. თუმცა, დღეს რასაც ვაკეთებ, ამაში დიდი წვლილი მიუძღვის ჩემს შვილს, სესილიას, რომელიც თავად არის ამ იდეის განხორციელების შთაგონების წყარო.
4 წლის წინ, როდესაც პირველი დაბადების დღე აღვნიშნეთ, სწორედ მაშინ გაჩნდა ჩემს გონებაში იდეა, დამეარსებინა სადღესასწაულო კომპანია. სახელწოდებაც „ივენთ რუმი“ (Event Room) უცებ დაიბადა… ახლაც მახსოვს პირველი ივენთი, როდესაც საოცრად ვღელავდი, მაგრამ არ მავიწყდება კმაყოფილი მომხმარებლის საოცრად თბილი სიტყვები. მინდა აღვნიშნო, რომ მას შემდეგ ამ ადამიანის ყოველი მნიშვნელოვანი დღე ჩვენთან აღინიშნება.
რა სახის მომსახურებას სთავაზობს Event Room მომხმარებელს?
კომპანია „ივენთ რუმი“ მომხმარებელს სთავაზობს ნებისმიერი ივენთის სრულ ორგანიზებას, როგორც ტექნიკური, ასევე მუსიკალური კუთხით. თავად მიმყავს ხელის მოწერის ცერემონიალი. არ მიყვარს ერთფეროვნება და ყოველთვის ვეძებ სიახლეს, ვცდილობ, ჩემი არცერთი დიზაინი არ ჰგავდეს ერთმანეთს. თითოეულ დეტალზე ვფიქრობ.
რით არის Event Room სხვებისგან გამორჩეული? რა არის თქვენი ნიშა?
ყველა ადამიანს თავისი ხელწერა აქვს. ალბათ, მეც მაქვს რაღაც ნიშა, რომელიც მხოლოდ ჩემია და სხვებისგან გამომარჩევს.
ვინ არიან გუნდის წევრები?
ჩემი ბიზნესის განვითარებაში გვერდით მიდგას ჩემი დიდი ოჯახი. თითოეულ სილამაზეს ვქმნით მე, ჩემი მეუღლე და შვილები. ჩემი ოთხი წლის გოგოც კი არის ჩართული ამ საქმეში. იმდენად მსიამოვნებს ეს საქმე, რომ არ ვიღლები. პირიქით, უშრეტი ენერგიით ვივსები.
სალომე, რა არის თქვენი წარმატების ფორმულა?
ჩემთვის წარმატების ფორმულა საკუთარი თავის შესაძლებლობების მაქსიმუმის გამოყენებაა. მე მაქვს მიზანი, სურვილი, რომელსაც აუცილებლად მივაღწევ!
როგორია სამომავლო გეგმები და მიზნები?
ვინაიდან, ახლა მხოლოდ სოციალური ქსელის საშუალებით ვმუშაობ, მომავალში მინდა მქონდეს ჩემი სივრცე, ჩემი მეორე სახლი, სადაც კიდევ უფრო დიდ და მრავალფეროვან გეგმებს განვახორციელებ!
ტექსტი: მარიამ ირემაძე
ფოტო: ლანა ვახტანგაძე
