„საქართველო ჩემი სახლია, ვიცი ახლა რა მძიმე ვითარებაა ჩვენს ქვეყანაში, მაგრამ ყველაფერი კარგად იქნება“
ასე გამოუხმაურა 2024 წლის აქციების ფოტომემატიანე ეზ გაბერი არჩევნების შემდგომ საქართველოში არსებულ ვითარებას. ეზი ქართველმა ხალხმა მას შემდეგ გაიცნო, რაც მის მიერ გადაღებული გაზაფხულის აქციის ფოტოები თუ ვიდეობი მთელს სოციალურ ქსელში ვირუსულად გავრცელდა. თუმცა ეგვიპტელი ფოტოგრაფი საქართველოში უკვე 6 წელზე მეტია იმყოფება.
32 წლის გაბერი ფოტოგრაფიით ეგვიპტეშივე იყო დაინტერესებული, თუმცა საქართველოს ულამაზესი ბუნების ნახვის შემდეგ ამ მიმართულებით კიდევ უფრო დაინტერესდა. აქციებამდე ახალგაზრდა ფოტოგრაფი სწორედ საქართველოს სხვადასხვა კუთხიდან გადაღებულ ფოტოებს ავრცელებდა და უცხოელ ტურისტებში ჩვენი ქვეყნის პოპულარიზაციას ეწეოდა. იგი ფოტოგრაფიის გარდა, ტურიზმითა და მარკეტინგითაც არის დაინტერესებული.
View this post on Instagram
გთავაზობთ OK!- ის ექსლუზიურ ინტერვიუს ეგვიპტელ ფოტოგრაფთან ეზ გაბერთან
პირველ რიგში, მოგვიყევით თქვენს შესახებ, საიდან ხართ?
მე ვარ ეზ გაბერი ეგვიპტიდან, 32 წლის. საქართველოში 2017 წელს ჩამოვედი და 6 წელზე მეტია თბილისში ვცხოვრობ. ფოტოგრაფი და ვიდეოგრაფი ვარ, ასევე ვმუშაობ მარკეტინგისა და ტურიზმის სექტორში.
როდის დაინტერესდით ფოტოგრაფიით?
ფოტოგრაფიით ეგვიპტეშივე ვიყავი დაინტერესებული, თუმცა რაც საქართველოში ჩამოვედი, უფრო მეტად გამიჩნდა ინტერესი ამ მიმართულებით, რადგან აღფრთოვანებული ვიყავი საქართველოს ბუნებით. როდესაც საქართველოს სხვადასხვა კუთხეში მივდივარ, ჩემი მიზანია, ბუნების დამალული სილამაზე ხალხს გავუზიარო და სხვა თვალით დავანახო.
რატომ საქართველო ?
ერთხელ ეგვიპტეში ქართველ ადამიანს შევხვდი. მან საქართველოს შესახებ მომიყვა და დამპატიჟა. გადავწყვიტე ჩამოვსულიყავი და საკუთარი თვალით მენახა . ყველგან სიმწვანე იყო, წყალი და მდიდარი ბუნება, ასევე უთბილესი ხალხი. საქართველოს აქვს უძველესი კულტურა და შესანიშნავი ტრადიციები, ამიტომაც გადავწყვიტე მთელი ცხოვრების აქ გატარება.
აქციების გარდა, საქართველოში კიდევ რას იღებთ?
გარდა აქციებისა, დაინტერესებული ვარ საქართველოს ბუნებისა და ღირსშესანიშნაობის გადაღებით სხვადასხვა კუთხიდან.
გიჭირთ თუ არა ფოტოების გადაღება აქციიდან?
ფოტოგრაფიას ნიჭი და კრეატიული ხედვა სჭირდება. კარგი კადრის გადასაღებად სისხარტეა საჭირო. აქციებიდან ფოტოების გადაღება ცოტა რთულია, შესაძლოა იმიტომ, რომ უცხოელი ვარ. თუმცა, ძალიან ბედნიერი ვარ, რომ ქართველები ჩემს გადაღებულ ფოტოებსა და ვიდეობზე საუბრობენ.
როგორ მოგწონთ ჩვენი კულტურა და ტრადიციები და განსაკუთრებით რომელს გამოარჩევდით?
საქართველო მდიდარი ქვეყანაა განსხვავებული კულტურის ერთიანობით. მომწონს საჭმელი და უძველესი ქართული ცეკვა. განსაკუთრებით კი, კახეთის კულტურას გამოვარჩევდი.
ქართული სამზარეულოდან რომელ კერძებს გამოარჩევდით?
შესაძლოა გაგიკვირდეთ, მაგრამ ოსტრი და ჩაქაფული საუკეთესოა.
გთავაზობთ ეგვიპტელი ფოტოგრაფის – ეზ გაბერის ფოტოებს
