ფოტოგრაფი თორნიკე სააკაძე ცდილობს ადამიანების ყველაზე ბედნიერი წუთები კამერით დააფიქსიროს. როგორც თორნიკე აღნიშნავს, ის ემოციები, გულწრფელი ღიმილი და ციმციმა თვალები ყველაზე დიდი მოტივაციაა მისთვის. თუ რა არის ფოტოგრაფია მისთვის და რისგან იღებს შთაგონებას, ამ ყველაფერზე უფრო დეტალურად თორნიკე ჟურნალ OK!-ის ესაუბრა.
პირველად როდის დაინტერესდით ფოტოგრაფიით?
10 წლის წინ ჩემი მეგობრის სტუდიაში ვმუშაობდი ვიდეოოპერატორად. ახლა უკვე Global cinema production-ის ფოტოგრაფი ვარ. იმ პერიოდში ბევრ ფოტოგრაფთან მქონდა შეხება და ვხედავდი მათი მუშაობის პროცესს, მივხვდი, რომ ფოტოგრაფია მაინტერესებდა. შევიძინე შესაბამისი ტექნიკა და დავიწყე ფოტოგრაფიის საფუძვლიანად შესწავლა.
უკვე 8 წელია რაც ამ სფეროში ვარ. ამ ხნის განმავლობაში უამრავი ქორწილი თუ ღონისძიება მაქვს გადაღებული. ყველა მათგანი ჩემთვის ძალიან მნიშვნელოვანი და ძვირფასია, რადგან ამ საქმისთვის საკუთარი დრო და ენერგია მაქსიმალურად მაქვს დახარჯული. ასე გახდა ფოტოგრაფია ჩემი ცხოვრების ნაწილი, რის გარეშე ცხოვრება ვერ წარმომიდგენია.
ფოტოგრაფიის რომელ მიმართულებაში გრძნობთ თავს ყველაზე კომფორტულად?
ფოტოგრაფიის ყველა სფერო საინტერესოა, თუმცა მე გადავწყვიტე საქორწილო მიმართულებით წავსულიყავი. აქ თავს უფრო კომფორტულად ვგრძნობ, რადგან მომწონს წყვილებთან ურთიერთობა. საოცარი ემოციით ვიმუხტები, როდესაც ვხედავ ბედნიერ სახეებს. ამ ყველაფერთან ერთად კი ჩემი საქმე დაკავშირებულია უდიდეს პასუხისმგებლობასთან − ეს ადამიანები მე მენდობიან და მათთვის უმნიშვნელოვანესი დღის აღბეჭდვას მთხოვენ, რა თქმა უნდა, ვცდილობ არასოდეს გავუცრუო მათ იმედი.
რის შენახვა შეუძლია კადრს?
როცა კადრს ვიღებ, არ ვფიქრობ, ღირებული გამოვა თუ არა ის − უბრალოდ, ვიღებ სიამოვნებას გადაღების პროცესით. კადრს შეუძლია ზუსტად აღბეჭდოს წამიერი ემოცია, რომელსაც განიცდის ესა თუ ის ადამიანი. სწორედ კადრი ინახავს ბედნიერ წუთებს ჩვენი ცხოვრებიდან. წლების შემდეგ კი შეგიძლია დაათვალიერო ფოტოები, რომლებიც ალბათ ღიმილსაც მოგგვრით და გაგახსენებთ იმ შეგრძნებებსა და წუთებს.
რაში მდგომარეობს შთაგონებისა და ასევე, განვითარების საიდუმლო ფოტოგრაფიაში?
როგორც უკვე აღვნიშნე, ძალიან მიყვარს მუშაობის პროცესი და მისგან ვიღებ ძალიან დიდ სიამოვნებას. ასევე, როდესაც ვხედავ კმაყოფილ ადამიანებს, თუ რამხელა ბედნიერება მოაქვს თითოეულ კადრს მათთვის, ამისგან ვიღებ დიდ შთაგონებას და მოტივაციასაც, უფრო და უფრო ბევრი და საინტერესო ფოტო გადავიღო, სადაც იქნება გულწრფელი ემოცია ასახული.
სამომავლო გეგმები…
გეგმები ბევრია, თუმცა ერთ-ერთს აღვნიშნავ: მინდა ამ სფეროში უფრო და უფრო განვვითარდე და შევისწავლო ფოტოგრაფიის სხვადასხვა მიმართულება.
საკონტაქტო ინფორმაცია:
სტუდია: Global Cinema Production
ფოტოს გვერდი: Saakadze photographer
ინსტაგრამის გვერდი: Saakadze_Photographer
ტექსტი: სოფიო მალანია
