#OK! ევროპული სტანდარტის ქართული რძისა და ხორცპროდუქტების მაღაზია „მით ბოქსი“

დღეს, როდესაც ბაზარი გაჯერებულია ხორცის სხვადასხვა მიმწოდებლით, ნამდვილად ხარისხიანი და კარგი პროდუქციის პოვნა დიდ სირთულეს წარმოადგენს. ხშირ შემთხვევაში, მარტივი არ არის ოპტიმალური არჩევანის გაკეთება და იმის დადგენა, თუ რამდენად რეალურად ასახავს ფასი შემოთავაზებული პროდუქციის ხარისხს. სწორედ ამიტომ, დღეს გვსურს ქართული ფერმერული ხორცის, რძისა და ხორცპროდუქტების მაღაზია „მით ბოქსი“ გაგაცნოთ. კომპანიის შესახებ უფრო ვრცლად „მით ბოქსის“ მენეჯერი − ეკატერინე გოგიტიძე გვიამბობს.

გააცანით „მით ბოქსი“ და მისი სერვისი საზოგადოებას.

ჩვენი მაღაზია საქართველოს ბაზარს ექვსი წლის წინ შეუერთდა. „მით ბოქსი“, ყოველგვარი კომპრომისის გარეშე, მაღალი ხარისხის, სუფთად დამუშავებულ ნატურალურ ხორცსა და რძის პროდუქტებს გთავაზობთ. ჩვენი პროდუქცია სრულად შეესაბამება კანონით დადგენილ სტანდარტს და მომხმარებელს მაღალხარისხიან ნაწარმსა და მომსახურებას სთავაზობს. ბაზარზე ფასების ზრდის ტენდენციის მიუხედავად, ჩვენი გუნდი ცდილობს პროდუქტების ღირებულება ხელმისაწვდომი, ლოიალური და მეგობრული იყოს.

როგორ გაჩნდა „მით ბოქსის“ დაარსების იდეა?

გურმანობა, ხორცისა და რძის პროდუქტის დიდი სიყვარული, გახდა მაღაზიის გახსნის პირველი მიზეზი. სურვილი იყო, ბაზარზე გაგვეტანა ძალიან ხარისხიანი და სასარგებლო პროდუქტი. თავად შევიძინეთ ხელსაწყოები და სათანადო მაცივრები. დიდხანს, დიდი ყურადღებით ვარჩევდით ხორცის სათანადო მომწოდებლებს. ხარისხიანი პროდუქტის პოვნის შემდეგ კი საბოლოოდ გადავწყვიტეთ მაღაზიის გახსნა.

მოგვიყევით თქვენი პროდუქციის შესახებ. რას სთავაზობთ მომხმარებელს?

უპირველესად, ჩვენთან მოსულ მომხმარებელს ვთავაზობთ მაღალი ხარისხის პროდუქციასა და სერვისს. ამასთან, „მით ბოქსში“ ყოველდღიურად შეგიძლიათ შეიძინოთ ძროხის, ღორის, გოჭისა და კურდღლის ახალი ხორცი. სხვადასხვა ზომისა და შეფუთვის ქათამი, აგრეთვე − ინდაური და მწყერი, რომელთაც საგანგებოდ ვარჩევთ შიდა და ქვემო ქართლის, სამეგრელოსა და სამცხე-ჯავახეთის ფერმერულ მეურნეობებში. ასევე, ახალი ხორცისგან განსაკუთრებული რეცეპტით, ხელით დამზადებული პელმენი, ბლინები, აფხაზურა, სოსისი, ნაგეტსები, კუპატი… გვაქვს როგორც იმერული, ასევე მეგრული კუპატი. რძის პროდუქტებიდან − ყველი, ხაჭო და არაჟანი.

სად წარმოებს პროდუქცია?

პროდუქციის მოწოდება ყოველდღიურად ხდება. ხორცს გვაწვდიან კახეთიდან და თბილისთან ახლოს არსებული კასპის მუნიციპალიტეტიდან. რძის პროდუქტის მომწოდებლები ძირითადად მეგრელები არიან, რომლებსაც თბილისის შემოგარენში აქვთ ფერმები. ვინაიდან სულგუნის დამზადება ძალიან სპეციფიკურია, გვსურდა ეს პროდუქტი ნამდვილი მეგრული ტექნოლოგიით დამზადებულიყო, ხოლო რაც შეეხება იმერულ ყველს, მისი მომწოდებლები ზესტაფონელი ფერმერები არიან.

როგორ ახერხებთ მუდმივი მომხმარებლის შენარჩუნებას?

მიმაჩნია, რომ ენერგია და ყურადღება, რომელსაც ხორცის შერჩევას ვუთმობთ, ჩვენი პროდუქციის ხარისხზეა ასახული. ბუნებრივია, ამას მომხმარებელიც ამჩნევს. ჩვენი მომწოდებლები საქონელს ბუნებრივი კვებით ზრდიან, საქონლის დაკვლა და გასუფთავება თანამედროვედ აღჭურვილ სასაკლაოზე ხდება, შემდეგ უტარდება ვეტერინარული შემოწმება. საბოლოოდ, ჩვენამდე აღწევს სრულფასოვანი ხორცი. ამასთან, ჩვენ მიერ წარმოებულ პროდუქტს აწერია შემადგენლობა, რათა მომხმარებელი იყოს ინფორმირებული და ყოველთვის ჰქონდეს მაღალი ხარისხის იმედი. მომხმარებლებს ვინარჩუნებთ მუდმივი და სტანდარტული ხარისხით. გვირჩევნია გვქონდეს მიზერული მოგება და ჩვენი სერვისისა და პროდუქციის დონე იყოს მაღალი. სწორედ ამაზეა ჩვენი ბრენდის მთელი ფილოსოფია აგებული. თუმცა მინდა აღვნიშნო, რომ ეს ჩვენი კომპანიის მაქსიმუმი არ არის და ყოველდღიურად ვცდილობთ ხარისხი და სერვისი გავაუმჯობესოთ.

რით განსხვავდება თქვენი პროდუქცია სხვა მსხვილი მწარმოებლებისგან?

ჩვენი მაღაზიის მთავარი განმასხვავებელი ისაა, რომ ჩვენ მიერ დამზადებული ყველა პროდუქტი ხელით არის შექმნილი. გვყავს მოწვეული სპეციალისტები, რომლებიც ზემოთ ნახსენებ პროდუქტებს თავად ამზადებენ, ყოველგვარი დამატებითი ხელსაწყოს გარეშე. უმნიშვნელოვანესი განმასხვავებელი კი არის ის, რომ საკვებს ვამზადებთ განსაკუთრებული და ნატურალური გემოებით.

გაგვაცანით თქვენი სამომავლო გეგმები.

როგორც იცით, ჯერჯერობით, მხოლოდ ერთ ფილიალს ვფლობთ. მიუხედავად იმისა, რომ გვაქვს მიწოდების სერვისიც, გვსურს უფრო გავფართოვდეთ და გავიზარდოთ, როგორც კომპანია. სამომავლო გეგმების განხორციელებაში, სამწუხაროდ, პანდემიამ შეგვიშალა ხელი. სურვილი გვქონდა ყველა უბანში მსგავსი ტიპის მაღაზია გაგვეხსნა, თუმცა ჩვენს გეგმებზე უარი არ გვითქვამს და განხორციელებაზე ვმუშაობთ. ამასთან, ვართ მზა საკვების შექმნისა და მოდერირების პროცესშიც. გვსურს მომხმარებელს რაც შეიძლება მრავალფეროვანი, გურმანებისათვის მიმზიდველი პროდუქცია შევთავაზოთ.