დღევანდელი ჩვენი რესპონდენტი ბავშვობიდან ხელოვნებით იყო გატაცებული. მიუხედავად ხატვისა და მუსიკის დიდი სიყვარულისა, პროფესიად სტომატოლოგია აირჩია. მოგვიანებით კი ხელოვნების დანაკლისი ახალი სფეროთი – ესთეტიკური მედიცინით შეივსო. „ესეც ხომ ერთგვარი ხელოვნებაა?“- აღნიშნავს ჩვენთან საუბარში ესთეტიკური მედიცინის ექიმი ნატა მაღალაშვილი, რომლისთვისაც საქმისადმი დიდ სიყვარულსა და მუდმივი განვითარებისკენ სწრაფვას გადამწყვეტი მნიშვნელობა აქვს.
ნატა, როდის დაინტერესდით პირველად ესთეტიკური მედიცინით?
მუსიკოსებისა და ექიმების გარემოცვაში გავიზარდე, შესაბამისად, ხელოვნების მიმართ ჩემი ინტერესი დიდი იყო – ვხატავდი, ვცეკვავდი, მუსიკალურ სასწავლებელში ვსწავლობდი, თუმცა სკოლის დამთავრების შემდეგ სტომატოლოგიურზე ჩავაბარე. მახსოვს, ის პერიოდი სულ იმაზე ვფიქრობდი, როგორ ამომევსო ის სიცარიელე, რაც ხელოვნებამ დამიტოვა.
წლების განმავლობაში მოსკოვში მომიწია ცხოვრება, ხოლო როცა საქართველოში დავბრუნდი, ქ-ნ მაია მამალაძეს შევხვდი, რომელმაც ნათლად დამანახვა, რომ ესთეტიკური მედიცინაც ერთგვარი ხელოვნებაა და ის ადამიანებს აბედნიერებს. მისი დიდი დახმარებითა და თანადგომით მოვედი აქამდე, რისთვისაც დიდი მადლობა მინდა გადავუხადო მას.
რა სახის მომსახურებებს სთავაზობთ დაინტერესებულ ადამიანებს?
ამჟამად ვმუშაობ სილამაზის ცენტრ La Paris-სა და კლინიკა Welkin-ში. პაციენტებს ვთავაზობ როგორც ესთეტიკურ, ასევე აპარატურულ და ინიექციურ კოსმეტოლოგიას, კონკრეტულად: სახის გაწმენდა, სხვადასხვა სახის მასაჟები, პილინგები, აკნეს და პოსტაკნეს მკურნალობა, ბიორევიტალიზაცია, მეზოთერაპია და კონტურული პლასტიკა. ასევე, კლინიკა Welkin-ში – ტანისა და სახის აპარატურულ პროცედურებს: Fotona 4D, ცელულიტის მკურნალობა, ზედმეტი ცხიმის მოცილება და კუნთების სტიმულაცია.
რომელი პროცედურაა ყევლაზე მოთხოვნადი?
ბოლო პერიოდში ძალიან მოთხოვნადი და პოპულარულია სახის მასაჟი. აქვე აღვნიშნავ, რომ თქვენი ჯანმრთელობის უსაფრთხოების მიზნით და სასურველი შედეგის მისაღებად აუცილებელია სპეციალისტმა სწორად შეარჩიოს, თუ რა სახის მასაჟი სჭირდება პაციენტს.
აღნიშნული მეთოდით რამდენიმე წლის წინ დავინტერესდი, შევისწავლე და ვარ პროფესიონალური მასაჟის ასოციაციის სერტიფიცირებული წევრი, სადაც მუდმივად გვეძლევა საშუალება, ავიმაღლოთ კვალიფიკაცია, ვისწავლოთ მსოფლიო დონის წამყვან სპეციალისტებთან და გავეცნოთ დარგის სიახლეებს.
მნიშვნელოვანია სპეციალისტს ენდობოდე, როგორ შეძელით ნდობის მოპოვება?
ვფიქრობ, პროფესიონალიზმთან ერთად, სიყვარული არის ის, რაც წარმატებისთვის და, არა მხოლოდ, ზოგადად ყველაფერში მთავარია, საქმისა და ადამიანების სიყვარული. როდესაც მთელი არსებით ხარ ჩართული შენს საქმიანობაში, პაციენტებიც გრძნობენ ამას და აქედან იწყება ნდობა, ურთიერთობა და შედეგი.
აუცილებელია ყველა ადამიანთან ინდივიდუალური მიდგომა, უნდა მოუსმინო პაციენტს, გაიგო – რა სურს და ამის შემდეგ ერთად გადაწყდეს, თუ რა სახის მკურნალობა უნდა ჩატარდეს. თავის მხრივ, ეს ძალიან დიდი პასუხისმგებლობაა და ვცდილობ ეს ნდობა გავამართლო.
სამომავლო გეგმები
ჩემთვის მნიშვნელოვანია კმაყოფილი მომხმარებელი, რომელსაც განაპირობებს ესთეტიკური მედიცინის პროცედურების ხარისხი. სწორედ ამიტომ ამ სფეროში აუცილებელია სიახლეებს არ ჩამოვრჩე და მუდმივად განვვითარდე.
ტექსტი: სოფიო მალანია
ფოტო: ალექსეი სეროვი
