ინგა ელიაშვილი პროფესიით ლაზეროთერაპევტი და ესთეტიკური ცენტრის, „მედინის“ დამფუძნებელია. მედიცინა ჯერ კიდევ მცირეწლოვანს იტაცებდა, ამიტომ გადაწყვიტა, ბავშვობის ოცნება აესრულებინა და პროფესიული საქმიანობაც ამ სფეროს დაუკავშირა. მიაჩნია, რომ კარიერული თვალსაზრისით წარმატების მიღწევის მთავარი მექანიზმი საქმისადმი უანგარო სიყვარულია. უფრო მეტ ინფორმაციას OK! -სთან ინტერვიუში გაეცნობით.
ინგა, როგორი ბავშვობა გქონდათ და რაზე ოცნებობდით?
ჩემთვის ბავშვობის წლები დაკავშირებულია ქუთაისთან. ცხოვრების ეს პერიოდი ძალიან ბედნიერი, ფერადი და უზრუნველი იყო. ჯერ კიდევ მაშინ ვოცნებობდი, ექიმი გავმხდარიყავი. ეს სურვილი იმდენად ძლიერი და შეუცვლელი აღმოჩნდა, რომ უკვე გააზრებულ ასაკში, სკოლის პერიოდში, გადავწყვიტე ჩამებარებინა სამედიცინოზე და ჩემი დაჟინებული სურვილი ამეხდინა.
როდის მიხვდით, რომ მედიცინის სფეროში საკუთარი თავი იპოვეთ?
სწავლის პროცესში, როცა გავდიოდი პრაქტიკის კურსებს, ამ სფეროსთან უშუალო შეხებამ მიმახვედრა, რომ ერთ კონკრეტულ სფეროს უნდა გავყოლოდი და ავირჩიე კარდიოლოგია, თუმცა ეს არ აღმოჩნდა ჩემი მუდმივი ინტერესის საგანი და გადავწყვიტე, კოსმეტოლოგიისა და ლაზეროთერაპიის მიმართულებით გამეგრძელებინა საქმიანობა. ამ სფეროში ჩემს პროფესიონალად ჩამოყალიბებაში უდიდესი როლი ითამაშა ესთეტიკურმა ცენტრმა „საკურამ“, სადაც 6 წელი ვიმუშავე და შევიძინე ის უნარები, რაც პროფესიულ ზრდაში დამეხმარა. ამ საქმისადმი დიდმა სიყვარულმა შემდგომში მიბიძგა, დამოუკიდებლად განვვითარებულიყავი და ესთეტიკური ცენტრი „მედინი“ დავაფუძნე.
რა მიგაჩნიათ თქვენი პროფესიის მთავარ სირთულედ?
ჩემი პროფესია დაკავშირებულია უდიდეს პასუხისმგებლობასთან, რაც პაციენტთან სწორად კომუნიკაციაში გამოიხატება. გადამწყვეტი მნიშვნელობა აქვს ამ სფეროში განათლებას, ცოდნას და გამოცდილებას. პროფესიონალიზმი გულისხმობს იმას, რომ შენთან მოსულ თითოეულ ადამიანს ჰქონდეს განცდა, რომ მათ მდგომარეობას შენც ისევე იზიარებ და გრძნობ, როგორც ისინი. ემოციური მხარდაჭერა ძალიან მნიშვნელოვანია, რასაც მომხმარებელი ყოველთვის ამჩნევს.
პროფესიის გარდა გაქვთ თუ არა ჰობი, რომელსაც სიამოვნებით აკეთებთ?
ჩემი ბოლოდროინდელი გატაცება არის ხატვა, რაც უდიდეს სიამოვნებასა და სიმშვიდეს მანიჭებს, ემოციების უკეთ გამოხატვაში მეხმარება. ხატვის პროცესის დროს მოწყვეტილი ვარ რეალობას და თავს ჩემს სამყაროში ვგრძნობ. სამწუხაროდ, ამის ფუფუნება ხშირად არ მაქვს, მაგრამ ვცდილობ თავისუფალ დროს დიდი ყურადღება დავუთმო ხატვას, რაც ერთგვარი თერაპიაა ჩემთვის.
რატომ გაგიჩნდათ ესთეტიკური ცენტრის დაარსების სურვილი?
ეს იყო ძალიან დიდი სიყვარულის შედეგი ამ პროფესიისადმი. ჩემს მოსწავლეებს ყოველთვის ვეუბნები, რომ თუ მხოლოდ ფინანსურად დაინტერესდებიან საქმეში, წარმატებას ვერ მიაღწევენ. ჩემს შემთხვევაში ყველაფერი ისე განვითარდა, რომ ბედნიერი ვიყავი, როცა პაციენტებისგან კმაყოფილებას ვგრძნობდი. შეიძლება ითქვას, ეს დამოკიდებულება „მედინის“ ერთგვარი წარმატების ფორმულაცაა, რომელიც წლებია აქტიურად ჩანს ბაზარზე.
რა სერვისებს სთავაზობს „მედინი“ მომხმარებელს?
აღსანიშნავია ის ფაქტი, რომ „მედინის“ პირველი ფილიალი 5 წლის წინ ქუთაისში გაიხსნა და შემდეგ უკვე ფართო ბაზარზეც განვვითარდით ბათუმსა და ფოთში. ქუთაისის „მედინი“ მომხმარებელს სთავაზობს: კოსმეტოლოგიის სრულ მომსახურებას, ფრჩხილის მოვლის პროცედურებსა და ლაზერს. ჩვენთან მომხმარებელს შეუძლია სახის მოვლის ნებისმიერი პროცედურა ჩაიტაროს, რადგან „მედინიში“ ამ კუთხით მრავალფეროვანი მომსახურებაა ხელმისაწვდომი.
დაბოლოს, რას ეტყოდით ქალბატონებს…
უპირველეს ყოვლისა, ყველა ქალს ვეტყოდი, რომ თავდაუზოგავად იშრომონ საკუთარი ოცნებებისთვის, დაისახონ მიზნები და იარონ წინ, არ გაჩერდნენ და შეშინდნენ, რომ რაღაც არ გამოუვათ, გამოიმუშაონ სიძლიერე და სიმტკიცე, რაც ყოველთვის დაეხმარებათ ნებისმიერ სფეროსა თუ საქმეში. დაგროვილმა გამოცდილებებმა დამარწმუნა, რომ თუ არსებობს დიდი სურვილი და მონდომება, შეუძლებელი არაფერია.
ტექსტი: მაკუნა შავგულიძე
ფოტო: გიორგი კალანდაძე
ლოკაცია: 10 Inn boutique hotel batumi
