ჰელენ მირენი ინგლისელი მსახიობია, რომელმაც ფილმში „დედოფალი“ (The Queen) ელისაბედ II -ის როლის შესრულებისთვის „ოსკარი“ მიიღო. 80 წლის მსახიობმა ჟურნალთან Elle იმ გადაწყვეტილებაზე ისაუბრა, რომლის მიღებაც ნახევარ საუკუნეზე მეტი ხნის წინ მოუხდა.
„ჩემზე ზეწოლა არავის მოუხდენია, უბრალოდ, ერთმა რეჟისორმა მითხრა, რომ ცხვირის ოპერაციის გარეშე კარიერას ვერასდროს ავაწყობდი, მე კი უარი ვთქვი. გადავწყვიტე, ნაკლებად ლამაზი ვყოფილიყავი“, – განაცხადა მირენმა.
მსახიობმა აღნიშნა, რომ ახალგაზრდობაში პლასტიკური ოპერაციების გაკეთება „საშინელი შეცდომაა“, თუმცა სხვების არჩევანს არ განსჯის.
„მიმაჩნია, რომ 20 წლის ასაკში პლასტიკური ოპერაციის გაკეთება საშინელი შეცდომაა, რადგან შენი სახე ჯერ კიდევ იცვლება და ყალიბდება. არ მიყვარს ადამიანების კრიტიკა იმის გამო, რაც მათ ბედნიერებას ანიჭებს, მაგრამ მცდელობა, სხვა ადამიანს დაემსგავსო, საშინელებაა. პლასტიკური ქირურგიის წინააღმდეგი არ ვარ და მინდა, ეს მკაფიოდ დავაფიქსირო. თუ ვინმე ამით თავს უკეთ იგრძნობს, რატომაც არა? სიცოცხლე ძალიან ხანმოკლეა იმისთვის, რომ საკუთარი სახის ნაკვთების გამო ინერვიულო“ – აღნიშნა მსახიობმა.
ჰელენ მირენის თქმით, ამ შემთხვევაში საუკეთესო რჩევა კარგი განათებაა:
„სანამ რამეს გააკეთებთ, აბაზანაში კარგი განათება დააყენეთ – ისეთი, რომ სარკეში ჩახედვისას კარგად იყოთ განათებული. ამის შემდეგ ყველაფერი მეორეხარისხოვანი გახდება. უბრალოდ უყურებთ საკუთარ ანარეკლს და ფიქრობთ: „ოჰ, არაჩვეულებრივად გამოვიყურები“. სულ ესაა. ეს გაცილებით იაფია, ვიდრე სახის გადაჭიმვა“ – გაიხუმრა მან.
ჰელენ მირენი ერთადერთი ვარსკვლავი არ არის, რომელიც პლასტიკური ოპერაციების უარყოფითი შედეგების შესახებ გვაფრთხილებს. ცოტა ხნის წინ ჰოლივუდი სილამაზის არარეალური სტანდარტების დანერგვის გამო ქეით უინსლეტმაც გააკრიტიკა და ამას „ნამდვილი ქაოსი“ უწოდა.
„ჩემს სიტყვებს არავინ უსმენს, რადგან ყველა შეპყრობილია სრულყოფილების იდეით, რათა ინსტაგრამზე მეტი მოწონება დააგროვოს“, – აღნიშნა მან. გასულ ზაფხულს მსგავსი პოზიცია დააფიქსირა ჯეიმი ლი კერტისმაც.
„თუ სახე ერთხელ დაიზიანე, მას ვეღარ დაიბრუნებ“ – განაცხადა მსახიობმა.
ასევე დაგაინტერესებთ
