შობის წინა დღეები ის დროა, როდესაც სახლი სითბოთი, სიმყუდროვით და ახლად გამომცხვარი ნამცხვრის სურნელით ივსება. ჩვენ მთელი მსოფლიოს საუკეთესო საშობაო ორცხობილების რეცეპტები შევკრიბეთ, რომ სადღესასწაულო განწყობის შექმნაში დაგეხმაროთ.
ჯანჯაფილის საშობაო ორცხობილები
ეს სურნელოვანი ორცხობილა ფინჯან ჩაისთან ერთად თქვენი ზამთრის საღამოებს გაათბობს და გაალამაზებს. რბილი ტექსტურა, ცომის სიტკბო და ჯანჯაფილის სიცხარე ამ ორცხობილებს განუმეორებელ გემოს აძლევს.
ინგრედიენტები
ფქვილი – 250 გრ.
თაფლი – 3 ს.კ.
შაქარი – 100 გრ.
კარაქი – 100 გრ.
ფორთოხლის ცედრა – 1 ჩ.კ.
დაფქული ჯანჯაფილი – 2 ჩ.კ.
დაფქული დარიჩინი – 1 ჩ.კ.
დაფქული კარდამონი (ილი) – მახ. ჩ.კ.
გამაფხვიერებელი – ნახ. ჩ.კ.
კვერცხი – 1 ცალი,
ფორთოხლის წვენი – 1 ს.კ.
მარილი – მწიკვი.
მომზადების წესი:
- ჯამში ფორთოხლის ცედრა და შაქარი ჩაყარეთ და თითებით ოდნავ დასრისეთ.
- დაბალ ცეცხლზე გაადნეთ კარაქი, დაუმატეთ თაფლი და ერთგვაროვანი მასის მიღებამდე ურიეთ. ამის შემდეგ ცეცხლიდან გადმოდგით და ოთახის ტემპერატურამდე გააგრილეთ.
- ღრმა თასში ჩაყარეთ ფქვილი, დაფქული კოჭა, დარიჩინი, კარდამონი, გამაფხვიერებელი, მარილი და კარგად აურიეთ.
- გაგრილებულ კარაქისა და თაფლის ნარევს დაამატეთ კვერცხი, შაქარი, ფორთოხლის ცედრა და წვენი და კარგად აურიეთ.
- კარაქისა და თაფლის ნარევს თანდათან მშრალი ნარევი დაუმატეთ და რბილი ცომი მოზილეთ. ის უნდა იყოს ელასტიური, მაგრამ არა წებოვანი.
- ცომი პოლიეთილენის ფირში შეახვიეთ და მაცივარში 30 წუთით დატოვეთ, რომ გამაგრდეს. ამის შემდეგ ცომი ოდნავ ფქვილმოყრილ ზედაპირზე, 5 მმ სისქეზე გააბრტყელეთ და ფორმები ამოჭერით.
- ღუმელი 180°C-მდე გააცხელეთ. საცხობ ფორმას საცხობი ქაღალდი დააფინეთ და ორცხობილები მოათავსეთ. აცხვეთ 8-10 წუთის განმავლობაში, სანამ ოქროსფერი არ გახდება.
- ორცხობილები კარგად გააგრილეთ. მინანქრის გასაკეთებლად შაქრის პუდრა რამდენიმე წვეთ ფორთოხლის წვენს შეურიეთ და ორცხობილები სურვილისამებრ გააფორმეთ. გემრიელად მიირთვით.
დარიჩინის საშობაო ორცხობილები
თუ ამ გემრიელი ორცხობილების გაკეთებას არ დაიზარებთ, მალე ის თქვენს საყვარელ საშობაო ნუგბარად იქცევა.
ინგრედიენტები
ფქვილი – 280 გრ.
კარაქი – 120 გრ.
ყავისფერი შაქარი – 150 გრ.
კვერცხი – 1 ცალი,
არაჟანი (20%) – 2 სუფრის კოვზი,
რძე – 2 სუფრის კოვზი,
დაფქული დარიჩინი – 1 ჩაის კოვზი,
დაფქული კოჭა – 1 ჩაის კოვზი,
გამაფხვიერებელი – 1 ჩაის კოვზი,
მარილი – მწიკვი
რბილი კარამელი (ირისი) – 10 ცალი,
შაქრის პუდრა – გასაფორმებლად.
მომზადების წესი:
- დაჭერით კარამელები პატარა ნაჭრებად, პატარა ჯამში ჩაყარეთ, ერთი სუფრის კოვზი ფქვილი დააყარეთ და კარგად აურიეთ, რომ ერთმანეთს არ მიეკრას.
- ათქვიფეთ დარბილებული კარაქი ყავისფერ შაქართან ერთად, სანამ ფაფუკი არ გახდება. დაუმატეთ კვერცხი, არაჟანი და რძე და ერთგვაროვანი მასის მიღებამდე ურიეთ.
- სხვა თასში აურიეთ ფქვილი, დარიჩინი, დაფქული კოჭა, გამაფხვიერებელი და მარილი. თანდათანობით შეურიეთ მშრალი ნარევი კარაქის ნარევს და რბილი, ელასტიური ცომის მიღებამდე ზილეთ.
- გაყავით ცომი დაახლოებით კაკლის ზომის ნაჭრებად და მრგვლად გააბრტყელეთ. ცომის თითოეულ ნაჭერს ჩაღრმავება გაუკეთეთ, კარამელის ნაჭერი ჩადეთ და ცომი შეკარით.
- გააცხელეთ ღუმელი 180°C-მდე. საცხობ ფირფიტაზე საცხობი ქაღალდი დააფინეთ და ორცხობილები მოათავსეთ. აცხვეთ 12-15 წუთის განმავლობაში, სანამ ოდნავ ოქროსფერი არ გახდება.
- როგორც კი ორცხობილები გაგრილდება, შაქრის პუდრა მოაფრქვიეთ, რომ „თოვლის“ ეფექტი შექმნათ. გემრიელად მიირთვით.
ნაძვის ხის ორცხობილები
სასურველია, რომ ეს ორცხობილები ბავშვებთან ერთად მოამზადოთ – მათ ცომიდან ფორმების ამოჭრა და მორთვა ძალიან მოეწონებათ. თუ ორცხობილებში პატარა ნახვრეტებს გააკეთებთ, მათ ნაძვის ხეზე დაკიდებას შეძლებთ
ინგრედიენტები
ფქვილი – 300 გრ.
კარაქი – 150 გრ.
შაქარი – 100 გრ.
დაფქული მუსკატის კაკალი – ნახ. ჩაის კოვზი,
დაფქული მიხაკი – ¼ ჩაის კოვზი,
დაფქული დარიჩინი – 1 ჩაის კოვზი,
კვერცხი -1 ცალი,
მანდარინის წვენი – 2 სუფრის კოვზი
გამაფხვიერებელი – 1 ჩაის კოვზი,
მარილი – მწიკვი,
მწვანე საკონდიტრო საღებავი
მოსართავები.
მომზადების წესი:
- დაბალ ცეცხლზე გაადნეთ კარაქი, დაუმატეთ მუსკატის კაკალი, დაფქული მიხაკი და დარიჩინი, აურიეთ და გააგრილეთ კარაქი ოთახის ტემპერატურამდე.
- ღრმა თასში კარგად ათქვიფეთ კვერცხი შაქართან ერთად ერთგვაროვანი მასის მიღებამდე. დაამატეთ გამდნარი კარაქი, მანდარინის წვენი და კარგად აურიეთ.
- კარაქიან მასას თანდათან დაუმატეთ გაცრილი ფქვილი, გამაფხვიერებელი და მარილი. მოზილეთ რბილი, ელასტიური ცომი და დაუმატეთ რამდენიმე წვეთი მწვანე საკონდიტრო საღებავი.
- ცომი შეახვიეთ პოლიეთილენის ფირში და 30 წუთით მაცივარში შედგით.
- გაგრილებული ცომი ოდნავ ფქვილმოყრილ ზედაპირზე 0.5–0.7 სმ სისქეზე გააბრტყელეთ. ნაძვის ხის ფორმები სპეციალური საჭრელით ან ჩვეულებრივი დანის წვერით ამოჭერით.
- გააცხელეთ ღუმელი 180°C-ზე. საცხობ ფირფიტაზე დააფინეთ საცხობი ქაღალდი და ორცხობილები ერთმანეთისგან 2 სმ დაშორებით მოათავსეთ. აცხვეთ 12–15 წუთის განმავლობაში.
- როგორც კი ორცხობილა გაცივდება, მორთეთ. მინანქრის მოსამზადებლად შაქრის პუდრა მანდარინის წვენს შეურიეთ და შესქელებამდე თქვიფეთ.
- მინანქრის დახმარებით შეიძლება ფიფქები ან ვარსკვლავები დახატოთ. ყველაფერი თქვენს მონდომებასა და ფანტაზიაზეა დამოკიდებული.
გემრიელად მიირთვით.
