მე გახლავართ ჰოლისტურ ცენტრ BLOOMIN-ის დამფუძნებელი. BLOOMIN-ის მიზანია, იყოს ადამიანების მეგზური თვითშემეცნებისა და გამთლიანების გზაზე, რასაც საზოგადოებისთვის ჰოლისტური ჯანმრთელობის შესახებ სანდო, გამარტივებული ინფორმაციისა და სერვისების მიწოდებით ვახორციელებთ.
პროფესიით ვარ ჰოლისტური მენტალური ჯანმრთელობის სპეციალისტი/ფსიქოთერაპევტი. განათლება მივიღე კოლორადოს შტატის უნივერსიტეტში (აშშ), ხოლო პრაქტიკა − ორ სხვადასხვა ინტეგრირებულ (ჰოლისტურ) ჯანმრთელობის ცენტრში. ასევე, 9 წელია ვარ იოგას პრაქტიკოსი.
დღეს, განსაკუთრებით სოც. მედიის პოპულარიზაციის პირობებში, ხშირად, „ჯანმრთელად“ მოვიაზრებთ გამხდარ, ასე ვთქვათ „ფორმაში მყოფ“ ადამიანებს, რომლებიც დღევანდელ სილამაზის სტანდარტს აკმაყოფილებენ. სინამდვილეში, ასეთ გარეგნობას შესაძლოა საერთოდ არაფერი ჰქონდეს ჯანმრთელობასთან, არამედ იყოს უბრალოდ გარკვეული გენეტიკის, ჯანმრთელობისთვის დამაზიანებელი და სახიფათო ჩვევების (შიმშილი, სახიფათო დიეტები, გადამეტებული პლასტიკური ქირურგიული ჩარევა) ან სულაც ფოტოშოპის/სოც. მედიის ფილტრების შედეგი.
იმისათვის, რომ ჯანმრთელობა ცხოვრების წესი გავხადოთ, ჯერ უნდა გვესმოდეს მისი არსი: ჯანმრთელობა არა მხოლოდ ჩვენს ფიზიკურ მდგომარეობაზე ზრუნვას, არამედ, ჰოლისტურად (მთლიანობაში) ჩვენი ფიზიკური, მენტალური, სოციალური თუ გარემოებრივი მდგომარეობების ერთობას მოიაზრებს. ჯანსაღი ცხოვრების წესის მიზანს კი წარმოადგენს არა სილამაზის არარეალურ სტანდარტზე მორგება, არამედ შინაგანი სიმშვიდისა და სრულფასოვნების მიღწევა.
ძილის ჰიგიენა, საკვებთან ურთიერთობა, ფიზიკური აქტიურობის როლი ჩვენს ცხოვრებაში, რამდენად ჯანსაღია ჩვენი ურთიერთობები, რამდენად კარგად შეგვიძლია სტრესთან გამკლავება, როგორი დამოკიდებულება გვაქვს საკუთარ თავთან, რამდენად თანხვედრაშია ჩვენი ცხოვრება/კარიერა/მიზნები ჩვენს შინაგან ღირებულებებთან, რამდენად ჯანსაღია ჩვენი გარემო, ა.შ. ეს და სხვა მრავალი ფაქტორი უდიდეს გავლენას ახდენს როგორც ერთმანეთზე, ისე ჩვენს ჯანმრთელობასა და კეთილდღეობაზე. მხოლოდ ამ ყველაფრის გააზრების შემდეგ შეგვიძლია დავიწყოთ ამის დანერგვა ჩვენს ცხოვრებაში.
ფოტო: თამუნა ბერაძე
