ბოლო დროის ერთ-ერთი ყველაზე პოპულარული რომანტიკული კომედიის Emily In Paris-ის ვარსკვლავები ლილი კოლინსი და ლუკას ბრავო პაპარაცებმა რამდენიმე საათის წინ სერიალის მეორე სეზონის გადაღებებზე საფრანგეთის სახრეთ ნაწილში შენიშნეს.
გლობალური პანდემიის გამო მსოფლიოში არსებული რთული ვითარების ჟამს Netflix-ის ახალი სერიალი „ემილი პარიზში“ მაყურებლისთვის შესანიშნავი განსატვირთი საშუალება აღმოჩნდა.
მაყურებლის უამრავმა გამოხმაურებამ და დადებითმა შეფასებამ კი სერიალის შემოქმედებით ჯგუფს მეორე სეზონის გადაღებების დაწყება მალევე “აიძულა”.
კომპანია, რომელშიც სერიალის მთავარი გმილი ემილი კუპერი მუშაობს, ნაკლებად კეთილგანწყობილი თანამშრომლებითაა სავსე, რომლებიც მას ფრანგული ენის არცოდნის გამო კიდევ უფრო მეტ პრობლემას უქმნიან. პირველი სეზონის განმავლობაში ემილი ცდილობს ფრანგულ მარკეტინგულ ფირმაში მომუშავე პერსონალს საკუთარი გამოცდილება გაუზიაროს და ამერიკულ კულტურასთან შერწყმით მათ სამუშაოს სიახლე შესძინოს.
ემილის ახალი ცხოვრება თავგადასავლებითა და გამოწვევებითაა სავსე. მიუხედავად ბევრი წინააღმდეგობისა, ის ფარხმალს არ ყრის და საკუთარ პოზიციას ყოველთვის მყარად იცავს, ემილი გამუდმებით სამსახურზე ფიქრობს და კომპანიისთვის სოციალური მედიის სტრატეგიის შექმნას ცდილობს. მას სურს კარგი შთაბეჭდილება მოახდინოს უფროსზე და ფრანგული მარკეტინგული ფირმის მოდერნიზაციისთვის ახალ იდეებზე მუშაობს.
