სცენაზე გატარებული 50-ზე მეტი წლის შემდეგ, საკულტო როკ-ჯგუფი Eagles ფანებთან დასამშვიდობებლად ემზადება. ფრონტმენმა დონ ჰენლიმ დაადასტურა, რომ გამოსამშვიდობებელი ტურნე ჯგუფის ისტორიაში უკანასკნელი იქნება.
ლეგენდარული ამერიკული როკ-ჯგუფი, რომელიც მსოფლიომ ჰიტით „Hotel California“ შეიყვარა, არსებობას 2026 წელს, ტურნეს — The Long Goodbye დასრულების შემდეგ შეწყვეტს.
ამის შესახებ ჯგუფის ლიდერმა, დონ ჰენლიმ, პროგრამა CBS Sunday Morning-თან ინტერვიუში ისაუბრა. მისი თქმით, გასტროლების ამჟამინდელი ეტაპი Eagles-სთვის, სავარაუდოდ, ბოლო იქნება და მუსიკოსი ამ დასასრულისთვის მორალურად მზადაა.
„მგონია, რომ მართლაც ფინალს ვუახლოვდებით და ეს ჩემთვის მისაღებია“, — აღნიშნა ჰენლიმ.
მუსიკოსმა განმარტა, რომ გადაწყვეტილება ერთხმად, ემოციების გარეშე მიიღეს. ათწლეულების განმავლობაში მუდმივი კონცერტების, მგზავრობისა და ტურნეებით ცხოვრების შემდეგ, ჯგუფის წევრებს დასვენება სურთ. ჯგუფის დაშლის შემდეგ ჰენლი აპირებს ოჯახს, მოგზაურობასა და პირად ინტერესებს მეტი დრო დაუთმოს.
მუსიკოსმა თქვა, რომ ოცნებობს მსოფლიო არა აეროპორტებისა და სასტუმროების ფანჯრებიდან, არამედ რეალურად ნახოს და შეიგრძნოს. მის გეგმებში მებაღეობაც კი შედის, რაც მისთვის შინაგანი ჰარმონიის პოვნის საშუალებაა.
Eagles-ის გამოსამშვიდობებელი ტურნე 2023 წლიდან გრძელდება. მილიონობით გულშემატკივრისთვის ეს უკანასკნელი შანსია, ცოცხლად მოუსმინოს ჯგუფს, რომელიც ეპოქის სიმბოლოდ იქცა.
ჯგუფი Eagles 1971 წელს, ლოს–ანჯელესში, კალიფორნიაში, გლენ ფრეის, დონ ჰენლის, ბერნი ლიდონის და რენდი მეისნერის მიერ ჩამოყალიბდა. ერთი წლის შემდეგ, მუსიკოსებმა სადებიუტო ალბომი გამოუშვეს.
1974 წელს გამოვიდა ალბომი On the Border. ჯგუფს გიტარისტი დონ ფელდერი შეუერთდა.
ალბომ One of These Nights -სთვის მიძღვნილი ტურნეს დასრულების შემდეგ, ჯგუფი ბერნი ლიდონმა დატოვა და მის ნაცვლად ჯო უოლში მივიდა.
1976 წლის ბოლოს, Eagles –მა გამოუშვა კარიერის ყველაზე პოპულარული ალბომი Hotel California, რომელშიც შედიოდა სიმღერები „Life in the Fast Lane“, „The Last Resort“ და „Hotel California“. ალბომი Hotel California დიდი ხანია მსოფლიო როკ-მუსიკის ოქროს ფონდშია შესული.
1998 წელს ჯგუფი როკ-ენ-როლის დიდების დარბაზში შეიყვანეს.
გლენ ფრეის გარდაცვალების შემდეგ, 2016 წელს, ჯგუფს მისი ვაჟი, დიკონი და ვინს გილი შეუერთდნენ.
ასევე დაგაინტერესებთ
#OK! Bad Bunny-ს ისტორია: როგორ მიიქცია მხოლოდ ესპანურ ენაზე მომღერალმა მთელი მსოფლიოს ყურადღება
