სახლის დეკორისა და მოწყობის ტრენდები მუდმივად იცვლება. ყოველწლიურად ჩვენ ვხვდებით კარგად ნაცნობ და მოდიფიცირებულ, ან სრულიად ახალ ელემენტებს ინტერიერის დიზაინში. კლასიკური სტილის მთავარი უპირატესობა იმაში მდგომარეობს, რომ ყველა დროში აქტუალურია და არასდროს გადადის მოდიდან. ინტერიერის ტენდენციები საკმაოდ ხშირად იცვლება. ალბათ ყველას გახსოვთ რამდენიმე ათწლეულის წინანდელი დიზაინი და შემდგომი ცვლილებებიც. დიზაინერები გვირჩევენ, ბინის ან სახლის ინტერიერი მოვაწყოთ ისე, რომ მარტივად შეგვეძლოს ცვლილებების შეტანა და რაც მთავარია, ხარისხმა დროს გაუძლოს.
უპირველესად, აირჩიეთ ხარისხიანი მასალები
ყველაფერი ისე დაგეგმეთ, რომ თქვენს სახლში აღჭურვილობა და მოპირკეთება დიდი ხნის განმავლობაში შენარჩუნდეს დაუზიანებელი იერსახით. გრძელვადიანმა, გამძლე ზედაპირებმა, როგორიცაა ხე და ქვა, შეიძლება ათწლეულების განმავლობაში გაძლოს. ხარისხიან მასალებში ინვესტირებამ შესაძლოა გაზარდოს თქვენი სახლის ღირებულება, რაც მას საერთო საცხოვრებლად უკეთეს ადგილად აქცევს, ხოლო გაყიდვების მხრივ ფასსაც ასწევს.
მიკროცემენტი
ეს მასალა ბაზარზე დიდი ხანია აქტუალურია. დიზაინერები საცხოვრებელი და საზოგადოებრივი ინტერიერების გაფორმებაში მის გამოყენებას რამდენიმე მიზეზის გამო გვირჩევენ. მიკროცემენტი გამძლეა ცვეთის, ნაკაწრების, ქიმიური ნივთიერებების ზემოქმედების და სხვა ნეგატიური ფაქტორების მიმართ. მასალა ნებისმიერ ზედაპირს შეგიძლიათ წაუსვათ. ეს შეიძლება იყოს კაფელი, ბეტონი, მარმარილო, ცემენტი და ა.შ. ამასთან, მიკროცემენტს ჰერმეტული, მოცურების საწინააღმდეგო ზედაპირი აქვს. ზედაპირზე სოკო და ბაქტერიები არ ჩნდება, ამიტომ მასალა სააბაზანო ოთახის კედლების, იატაკისა და ჭერის მოსაპირკეთებლად შეგიძლიათ გამოიყენოთ.
ფრთხილად შეარჩიეთ ნივთები
თავი აარიდეთ ბევრი ტრენდული აქსესუარისა და ფერების ერთად გამოყენებას. თანამედროვე ნივთების განთავსება ძველ, მარადიულ ფონზე – ეს კლასიკური გადაწყვეტაა, რომელიც მოდიდან არასდროს გადადის. თვალი ადევნეთ არქიტექტორ-დიზაინერთა ბლოგებს ტენდენციებთან დაკავშირებით.
ნეიტრალური და ბუნებრივი ფერები
ალბათ გასაკვირი არ არის, რომ ნეიტრალური და ბუნებრივი ფერები მოდიდან არასდროს გადადის. ყველა ადამიანისთვის შინ მშვიდი გარემო უპირველესია, ამის მისაღწევად კი ნატურალური ტონების შერჩევა იდეალურია. ნაცრისფერი, ბეჟი, თეთრი და ყავისფერი − მათი სხვადასხვა ტონი აქტიურად გამოიყენება კედლის შესაღებად. ასევე, ბუნებრივი მიწიერი ფერები, რადგან ადამიანები ბუნებისგან მიღებული ჰარმონიის შეგრძნების ნაკლებობას განიცდიან. ბუნებით ინსპირირებული ფერები და ტექსტურები ჰარმონიულია როგორც ავეჯზე, ასევე, დეკორის ელემენტებზე. ყველაზე აქტიურად კი, დეკორისთვის ბუნებრივ სახლის მცენარეებს მიმართავენ, რაც საუკეთესო არჩევანია შინ ბუნების ჰარმონიის შემოსატანად.
ძვირად ღირებული ქსოვილები
ნეიტრალური და თბილი ფერების ბალანსის დასაცავად, მეტი ქსოვილის შემოტანა დაგეხმარებათ, რაც სახლს უფრო ელეგანტურსა და ესთეტიკურს გახდის. მსგავსი ეფექტის მიღება საკმაოდ მარტივად არის შესაძლებელი. საკმარისია ორი ან მეტი სხვადასხვა პატერნის პლედისა და ფერადი ბალიშების განთავსება დივანზე, რომ ზემოხსენებულ ეფექტს მოვერგოთ. სახლის კომფორტულ სივრცედ გარდასაქმნელად, ერთ-ერთი გავრცელებული გზა ისეთი ბუნებრივი ელემენტების გამოყენებაა, როგორიცაა ქსოვილი მიწის ფერებში, ან ქსოვილის ისეთი პატერნები, რომლებზეც დატანილია მდიდარი ფერები ნეიტრალურ ფონზე.
დაბოლოს, ყველაზე მთავარი კომპონენტი − როდესაც გსურთ თქვენი სახლის რეკონსტრუქცია ან ახლის აშენება, ეს არის მუშაობა პროფესიონალებთან, როგორებიც არიან არქიტექტორი, მშენებელი, დიზაინერი. პროფესიონალებთან ურთიერთობა − ეს არის გარანტი, რომ შეძლოთ ტრენდულსა და მარადიულს შორის ბალანსის ნახვა.
