#OK! დიდი ეპოქის დასასრული – დონატელამ VERSACE-ს შემოქმედებითი ხელმძღვანელის პოზიცია დატოვა

დონატელა ვერსაჩე VERSACE-ის შემოქმედებითი ხელმძღვანელის პოსტი დატოვა. ინფორმაცია 13 მარტს გახდა საზოგადოებისთვის ცნობილი და ამ ფაქტმა ბევრი მითქმა-მოთქმა გამოიწვია. დონატელა შემოქმედებითი ხელმძღვანელის პოსტს 28 წლის განმავლობაში იკავებდა, ამ გადაწყვეტილების შემდეგ ის ვერსაჩეს ბრენდ ამბასადორი გახდება, მის პოზიციას კი იტალიელი დიზაინერი, MIU MIU-ის ყოფილი იმიჯ დირექტორი დარიო ვიტალი აპრილში დაიკავებს.

„ჩემთვის უდიდესი პატივი იყო, ჩემი ძმის მემკვიდრეობა გამეგრძელებინა“-განაცხადა დონატელა ვერსაჩემ და ამასთანავე, აღნიშნა – „დიზაინერების ახალი თაობის მხარდაჭერა ყოველთვის მნიშვნელოვანი იყო ჩემთვის, მიხარია, რომ დარიო ვიტალი ვერსაჩეს ნაწილი გახდება და მოუთმენლად ველი ვნახო ახალი თვალით დანახული ბრენდი. VESRACE-ს გულმხურვალე გულშემატკივარი დავრჩები ახლა უკვე როგორც ბრენდ ამბასადორი,“.

ამასთანავე, დიზაინერი თავისი ახალი სტატუსით აპირებს ფოკუსირდეს ფილანტროპიულ და საქველმოქმედო საქმიანობაზე, მათ შორის ვერსაჩეს ფონდზე. დონატელა ვერსაჩეს ახალ ინფორმაციასთან დაკავშირებით კომენტარის გაკეთებისას არც თავისი გუნდი გამორჩენია და მადლობა გადაუხადა მათ იმისათვის, რომ სამი ათეული წლის მანძილზე ერთად ქმნიდნენ ახალ ნამუშევრებს.

როგორც ჩანს, F/W 2025 დონატელას ბოლო შოუ აღმოჩნდა VERSACE-ში. ახლა, კი 69 წლის დონატელა ვერსაჩე 1978 წელს ძმის, ჯანის მიერ დაარსებული ბრენდის ახალგაზრდა დიზაინერს ანდობს. მის ამ გადაწყვეტილებასთან დაკავშირებით, ონლაინ მედიაში არაერთი საინტერესო მოსაზრება გამოითქვა. მსოფლიო პრესა წერს, რომ ვერსაჩეს მომავალი გაურკვეველია, დონატელას ქმედება კი ბრენდის წარსულთან კავშირის გაწყვეტას ნიშნავს, რამაც შესაძლოა რადიკალურად გარდაქმნას ბრენდი.

 

 

რაც შეეხება ვერსაჩეს ახალ შემოქმედებით ხელმძღვანელს, 41 წლის დარიო ვიტალი უკვე ფართოდ არის აღიარებული, როგორც ერთ-ერთი ყველაზე კრეატიული და ინოვაციური იდეების მქონე ახალგაზრდა დიზაინერი. ის მუშაობდა ისეთ ბრენდებთან, როგორებიცაა Dsquared2, Bottega Veneta, 2010 წლიდან კი ის შეუერთდა miu miu-ს გუნდს, სადაც საკმაოდ ნაყოფიერი და წარმატებული კარიერა ჰქონდა. 1 აპრილიდან კი ის ვერსაჩეს გუნდს შეუერთდება.

ბრენდის ხელმძღვანელად მისი კანდიდატურის გამოცხადების შემდეგ ვიტალიმ მადლობა გადაუხადა დონატელას და აღნიშნა, რომ მისთვის დიდი პატივია გახდეს ვერსაჩეს გუნდის ნაწილი და შეუერთდეს ჯგუფს, როგორც შემოქმედებითი ხელმძღვანელი. როგორც აღნიშნავს, ეს მისთვის პრივილეგიაა, რომ წვლილი შეიტანოს ბრენდის კიდევ უფრო მეტ წარმატებასა და გლობალური მასშტაბით ზრდაში.

 

 

შეგახსენებთ, დონატელა ვერსაჩე VERSACE-ს დიზაინის ხელმძღვანელი 1997 წელს გახდა, მას შემდეგ რაც მისი ძმა, ჯანი ტრაგიკულად მოკლეს. 28 წლის მანძილზე დიზაინერმა არაერთი საინტერესო, განსაკუთრებული და დასამახსოვრებელი შოუ და გამორჩეული დიზაინები შექმნა, რომლებიც მოდის ინდუსტრიაში კვლავ დიდი პოპულარობით სარგებლობს. მნიშვნელოვანია, ისიც, რომ ვერსაჩეს მთავარი დიზაინერი თავისი ექსტრავაგანტური გარეგნობითა და პლასტიკური ქირურგიების ისტორიით არაერთხელ გახვეულა კრიტიკის ქარცეცხლში.