თანამედროვე სტომატოლოგიის სტანდარტების შესაბამისი სერვისი, ინდივიდუალური მიდგომა და მაღალი ხარისხის ტექნოლოგიები — სწორედ ამ ღირებულებების გარშემო ერთიანდება სტომატოლოგიური კლინიკა „დენტალ ლაუნჯი“, რომელიც ბათუმში, ნურეთინ ჩარმიქლის 5 ნომერში მდებარეობს. აქ, კომფორტულ გარემოში, თქვენ შეძლებთ მიიღოთ სტომატოლოგიური მომსახურების სრული სპექტრი. ჩვენი სტუმარი კლინიკის დამფუძნებელი სტომატოლოგი, ორთოპედ-იმპლანტოლოგი დავით მუსერიძეა, რომელიც დენტალური იმპლანტაციისა და „დენტალ ლაუნჯის“ შესახებ გვესაუბრა.
რამ განაპირობა თქვენი პროფესიული არჩევანი?
დავით მუსერიძე სტომატოლოგი, ორთოპედ-იმპლანტოლოგი: მთელი ბავშვობა იტალიურ ეზოში გავატარე, იქ, სადაც სტომატოლოგიური კლინიკა მდებარეობდა. ხშირად ვინტერესდებოდი მათი საქმიანობით, მუდმივად მქონდა კომუნიკაცია იქ მომუშავე სპეციალისტებთან. აქედან გამომდინარე, ამ პროფესიამ იმდენად დიდი შთაბეჭდილება მოახდინა ჩემზე, რომ სხვა პროფესიას არც კი განვიხილავდი.
რა უნდა იცოდეს პაციენტმა დენტალური იმპლანტაციისას?
პირველ რიგში უნდა გაითვალისწინოს, რომ დენტალური იმპლანტაცია ხანგრძლივი პროცესია – დაწყებული იმპლანტაციის დაგეგმვით და დამთავრებული გვირგვინის ჩასმით, რაც მხოლოდ იმპლანტაციიდან 4-6 თვის შემდეგ ხდება. გარდა ამისა, არის შემთხვევები, როდესაც ყბის ძვლის სისქე არ გვაძლევს საშუალებას ჩავსვათ იმპლანტი. შესაძლოა პაციენტს დასჭირდეს სინუს ლიფტინგი, იგივე ხელოვნური ძვლის დამატება, რაც კიდევ უფრო ახანგრძლივებს პროცესს. ამასთანავე, მნიშვნელოვანია ფინანსური მზაობა. მიუხედავად იმისა, რომ ვმუშაობთ სხვადასხვა ბრენდისა და ბიუჯეტის იმპლანტებზე, პაციენტს მკურნალობის სრული კურსი მაინც საკმაოდ სოლიდური თანხა უჯდება.
რა უპირატესობები აქვს დენტალურ იმპლანტაციას სხვა მეთოდებთან შედარებით?
დენტალური იმპლანტი ისე არის ყბის ძვალში მოთავსებული, რომ ქმნის ბუნებრივი კბილის იმიტაციას, რაც უზრუნველყოფს სიმტკიცეს და სტაბილურობას, განსხვავებით გვირგვინის ხიდებისგან. იმპლანტები გამოირჩევიან იმითაც, რომ კარგად ერგებიან პირის ღრუს მორფოლოგიას, რის გამოც გვირგვინის მონაწილეობა ღეჭვის პროცესში მსგავსია ბუნებრივი კბილის ფუნქციონირებისა. ასევე მნიშვნელოვანი ფაქტორია, მათი სიცოცხლის ხანგრძლივობა, რაც მოიცავს 15 წელსა და მეტს (სწორი მოვლის შემთხვევაში).
ასევე, დენტალური იმპლანტის დროს არ ზიანდება კბილები, რადგან, ხიდთან შედარებით, არ საჭიროებს გვერდითა კბილების დახეხვას. იმპლანტზე მიმაგრებული გვირგვინი არის ცალკე ერთეული, რომელიც მაგრდება უშუალოდ იმპლანტზე.
როგორია Dental Lounge-ის შექმნის ისტორია?
თავდაპირველად, ჩემ მიერ დაარსებულ კლინიკას „დავიდ დენტი“ ერქვა, რომელმაც 2009 წლის 7 სექტემბრიდან დაიწყო ფუნქციონირება. მსურდა შემექმნა მაღალი დონის სტომატოლოგიური სერვისი, სადაც პრიორიტეტი იქნებოდა ხარისხი და ადამიანური ურთიერთობები. ასეთმა მიდგომამ მომცა საშუალება გამეგრძელებინა ჩემი მოღვაწეობა ბათუმში, სადაც ბევრი ერთგული და კმაყოფილი პაციენტი შევიძინე. წლებთან ერთად, ჩემს გუნდს სულ უფრო მეტი პროფესიონალი შეემატა, რის გამოც გადავწყვიტე გავფართოებულიყავით და გაგვეკეთებინა კოლოსალური რებრენდინგი, სადაც, გარდა ჩვენი ზემოთ აღნიშნული პრიორიტეტებისა, დაემატებოდა კომფორტი და თანამედროვეობა. სწორედ ასე, 2021 წლის თებერვალში, გავხსენით დიდი და თანამედროვე კლინიკა „დენტალ ლაუნჯი“, სადაც გაერთიანებულია სტომატოლოგიური მომსახურების სრული სპექტრი.
რას სთავაზობთ საზოგადოებას?
ჩვენს კლინიკაში პაციენტს შეუძლია მიიღოს შემდეგი მომსახურება: თერაპიული სტომატოლოგია (პროფესიული წმენდა, კარიესის მკურნალობა, კბილების პროფესიული გათეთრება, კომპოზიტური რესტავრაცია); ენდოდონტიური მკურნალობა მიკროსკოპის ქვეშ; ორთოდონტიული მკურნალობა (ამერიკული მეტალის ბრეკეტ სისტემა, თვითლიგირებადი ბრეკეტ სისტემა, ელაინერები); ქირურგიული მკურნალობა, მათ შორის, სინუს ლიფტინგიც; 5 ორთოპედიული მკურნალობა(გვირგვინები,ვინირები,ხიდები); დენტალური იმპლანტოლოგია და ყბა-სახის კომპიუტერული 3D ტომოგრაფია.
რა გამოარჩევს Dental Lounge-ს ბაზარზე?
ჩვენთვის პრიორიტეტი ყოველთვის პაციენტებთან ურთიერთობა იყო და ასეც დარჩება. მათი კმაყოფილება და ნდობა ყველაზე მნიშვნელოვანია. თითოეულთან გვაქვს პერსონალური მიდგომა, ვისმენთ მათ მოთხოვნებს და წინასწარ განვიხილავთ მკურნალობის გეგმას. ასევე, ჩვენი კლინიკა ცდილობს ყოველთვის გააუმჯობესოს და დანერგოს თანამედროვე მიდგომები, ტექნოლოგიები და მოწყობილობები. ბოლოს კი, რა თქმა უნდა, კომფორტული და ლამაზი გარემო, რასაც ხშირად აღნიშნავენ პაციენტები.
ტექსტი: სოფიო მალანია
ფოტო: გიორგი კალანდაძე
