კლინიკა „დენტალ ესთეტიკსი“ 2017 წელს დაფუძნდა. ეს გახლავთ სტომატოლოგიისა და ესთეტიკის ცენტრი, სადაც მომხმარებელს შეუძლია მიიღოს როგორც სრული სტომატოლოგიური მომსახურება, ასევე სხვადასხვა კოსმეტოლოგიური, ინიექციური პროცედურები. კლინიკა დაკომპლექტებულია პროფესიონალთა გუნდით, რომელსაც შეგიძლიათ მიანდოთ საკუთარი თავი და მიიღოთ სასურველი შედეგი. ამ და სხვა საინტერესო დეტალებთან დაკავშირებით OK! კლინიკის დამფუძნებელს, ეკა ბუხრაშვილს ესაუბრა, რომელმაც უფრო დეტალურად გაგვაცნო „დენტალ ესთეტიკსის“ სპეციფიკა და მიდგომები.
ეკა, თავად რა პროფესიის ბრძანდებით და სად მიიღეთ განათლება?
ძირითადი პროფესიით ექიმი-ორთოდონტი გახლავართ, პაციენტებთან მუშაობის უკვე 11-წლიანი გამოცდილებით. დავამთავრე ი. ჯავახიშვილის სახელობის თბილისის სახელმწიფო უნივერსიტეტის სამედიცინო ფაკულტეტი. შემდეგ გავაგრძელე რეზიდენტურა ორთოდონტიაში. რეზიდენტურის შემდეგ ვმუშაობდი 17 კლინიკაში თბილისის მასშტაბით და მათ შორის, რეგიონებშიც.
2017 წელს კი უკვე გავხსენი სტომატოლოგიისა და ესთეტიკის საკუთარი ცენტრი „დენტალ ესთეტიკსი“, დაკომპლექტებული ცნობილი და მაღალკვალიფიციური პროფესიონალებით.
რეზიდენტურიდან მოყოლებული, დღემდე პერმანენტულად ხდება ჩემი პროფესიული ზრდა, სემინარების, ვებინარების, კონგრესების, მასტერკლასების მეშვეობით საქართველოსა თუ უცხოეთში.
ახლაც კი გავდივარ მოდულებს ორთოდონტიაში ერთ-ერთ უძლიერეს სპეციალისტთან. ამ პროცესისთვის ხელი არც პანდემიას შეუშლია. იყო ექიმი, ეს არის პროფესიული და პიროვნული ზრდის უწყვეტი პროცესი.
ჩემი პროფესიის მეორე განხრა, რომელშიც ასევე 2017 წლიდან ვმუშაობ, არის ესთეტიკური მედიცინა, სადაც სახის ინიექციურ პროცედურებს ვატარებ.
რა სახის პროცედურებს სთავაზობთ მომხმარებლებს და რომელია მათ შორის ყველაზე მოთხოვნადი?
მოთხოვნად პროცედურად სტომატოლოგიის განხრით გამოვყოფდი ორთოდონტიას. ესთეტიკურ მედიცინაში კი ყველაზე მოთხოვნადია ფილერებით ცხვირის მოდელირება და ტუჩის აუგმენტაცია.
ასევე მოთხოვნადია სახის გამაახალგაზრდავებელი პროცედურები: ბიორევიტალიზაცია, მეზოთერაპია, ბოტულინოტოქსინის ინიექციები, ცხვირტუჩის ნაოჭის კორექცია, სახის ოვალის მოდელირება.
ჩვენს ცენტრში ტარდება ასევე მოთხოვნადი მიკრობლეიდინგის პროცედურები. გარდა ამისა, სახის წმენდისა და სხვა კოსმეტოლოგიური პროცედურები − ლაზერული ეპილაცია, ავტორუჯი (დაფერვა).
როგორია შედეგები?
ჩვენი მთავარი მიზანია კმაყოფილი მომხმარებლების არსებობა. მყავს არაჩვეულებრივი, საკუთარი საქმის პროფესიონალთა გუნდი, რაც გარანტიაა უამრავი კმაყოფილი პაციენტისა.
რამდენად რთულია კარიერისა და პირადი ცხოვრების დაბალანსება?
სიტყვა „სირთულე“ არ მომწონს. საკუთარ თავზე მუშაობაც უწყვეტი პროცესია და ვფიქრობ, აბსოლუტურად შესაძლებელია იყო წარმატებული კარიერაში, პირად ცხოვრებაში; იყო დედა, მეუღლე, შვილი და საკუთარი „მე“. მთავარია, ჩვენთვის რა დოზითაა კომფორტული სხვადასხვა ამპლუაში ყოფნა.
არიან ქალბატონები, რომელთაც სურთ საკუთარ გარეგნობაში გარკვეული ცვლილებების შეტანა, მაგრამ სხვადასხვა მიზეზის გამო ფერხდებიან. რას ეტყოდით მათ?
ვეტყოდი, რომ მთავარია მიზანი, სურვილი მიზნის მისაღწევად და ქმედება. ასე აუცილებლად მიიღებთ საწადელს. თუ თავშეკავების მიზეზი გარკვეულ პროცედურებზე ინფორმაციის სიმწირეა, ვურჩევდი, ექიმ-სპეციალისტთან გაიარონ კონსულტაცია და არა სხვადასხვა სოციალურ ჯგუფში, არაკომპეტენტური ადამიანების მიერ გავრცელებული არასწორი ინფორმაციით იხელმძღვანელონ.
როგორია კლინიკასთან დაკავშირებული სამომავლო გეგმები?
2021 წლის შემოდგომაზე საქმიანობას ვაფართოებთ. დღესდღეობით, იმდენად დიდია მოთხოვნა, გადავწყვიტეთ სტომატოლოგია და ესთეტიკა გამოვყოთ. ესთეტიკაში ასევე დაემატება ბევრი სხვადასხვა პროცედურა – მასაჟის (გასახდომი, სარელაქსაციო და ა.შ.), ასევე იგეგმება მასაჟის სპეციალობის შემსწავლელი კურსები, წარბებისა და წამწამების ლამინირება, წამწამების დაგრძელებისა და პერმანენტული მაკიაჟის პროცედურები. ასევე, ბევრი სხვადასხვა სიახლე გვექნება დამატებული მომსახურების ამ სფეროში.
უახლოეს მომავალში კი ვაპირებთ უკვე ფილიალის გახსნას. გეგმები დიდი გვაქვს და დარწმუნებული ვარ, ჩემს გუნდთან ერთად ყველაფერი აუცილებლად განხორციელდება.
