1997 წლის 31 აგვისტოს ტრაგიკულ ღამეს, როდესაც უელსის პრინცესა დიანა პარიზში, ავტოკატასტროფაში დაიღუპა, პრინცი ჰარი მხოლოდ 12 წლის იყო. თავის ინტერვიუებში ის ხშირად აღნიშნავს, რომ მცირე ასაკის გამო დედასთან დაკავშირებით, ძალიან ცოტა მოგონება აქვს. წლების შემდეგ პრინცმა ამის გამოსწორება და მოგონებების აღსადგენად სენსორული თერაპიის ჩატარება გადაწყვიტა.
„მთელი ცხოვრება ვეუბნებოდი ხალხს, რომ წარსული და დედაჩემი არ მახსოვდა, მაგრამ ყველაფერი არასდროს არავისთვის მითქვამს. ჩემი მეხსიერება მკვდარი იყო, რამდენიმეთვიანი თერაპიის შემდეგ კი ნელ-ნელა გაცოცხლდა. ხანდახან თვალებს ვახელდი და ვხედავდი დედას, რომელიც ჩემს წინ იდგა. ჩემს მეხსიერებას ათასობით სურათი დაბრუნდა.. ზოგი იმდენად ცოცხალი და ნათელი იყო, რომ ჰოლოგრამას ჰგავდა“ – წერდა პრინცი თავის წიგნში „სათადარიგო“.
ფსიქოლოგმა ჰარის ურჩია, რომ მეხსიერების გასაცოცხლებლად თერაპიის სეანსზე დედის საყვარელი სუნამო – First of Van Cleef and Arpel მიეტანა. ნაცნობმა სურნელმა, რომელსაც ჰარი აკრძალული ნივთიერების აბს ადარებდა, ჰარის თითქმის მაშინვე კენსინგტონის სასახლეში, დედის ოთახებში გატარებული მხიარული წუთები გაახსენა.
თავის მემუარებში ჰარი იხსენებს, რომ დიანას წყლის ლოგინი ჰქონდა, რომელზეც ძმასთან ერთად ხტუნაობდა.
„მე და უილი წყლის ლოგინზე ვხტუნაობდით, ვყვიროდით და ვიცინოდით“ – წერს ჰარი თავის მოგონებების წიგნში.
პრინცი იხსენებს, რომ დილის საუზმეზე დიანას ჩაის ან ყავის ნაცვლად, გრეიფრუტისა და ლიჩის ჭამა უყვარდა. ჰარიმ ასევე გაიხსენა, რომ დედასთან და ძმასთან ერთად მსოფლიოში ცნობილ მოდელებს კრისტი ტარლინგტონს, კლაუდია შიფერს და სინდი კროუფორდს შეხვდა.
„ეს ძალიან უცნაური იყო. განსაკუთრებით ორი მორცხვი ბიჭისთვის, რომლებიც დაახლოებით თინეიჯერულ ასაკში არიან“ – აღნიშნა მან.
ერთ-ერთ დოკუმენტურ ფილმში ჰარიმ გაიხსენა, რომ სკოლიდან დაბრუნებულს სახლში სამი ულლამაზესი მოდელი დახვდა.
„ამ დროს ალბათ 12 ან 13 წლის ვიქნებოდი და კედელზე მათი პლაკატები მეკიდა. მათ დანახვაზე გავწითლდი, არ ვიცოდი რა მეთქვა და კინაღამ კიბეებიდან დავგორდი. სრულიად გაოგნებული ვიყავი, მაგრამ ეს ძალიან სახალისო მოგონება იყო, რომელიც სამუდამოდ ჩემში დარჩა“ – თქვა პრინცმა.
დიანა საზოგადოებაში ცნობილი იყო თავისი სიკეთითა და თანაგრძნობის უნარით, სახლში კი მის გამორჩეულ იუმორსაც ძალიან აფასებდნენ. პრინცი ჰარი დედას „ დიდ ბავშვს“ ადარებდა და იხსენებდა, რომ დედამისი სახლში კონცერტებს მართავდა და ჰარის წინდაში კანფეტებს უდებდა, მიუხედავად იმისა, რომ ბავშვებს სკოლაში ტკბილეულის მოტანა ეკრძალებოდათ.
„მახსოვს, ორივე ვიცინოდით, როდესაც კანფეტებს წინდაში ვმალავდით“ – იხსენებს ჰარი.
სასექსის პრინცი ასევე იხსენებს, თუ როგორ ეშმაკობდა დიანა, რომ პრესის ყურადღება თავიდან აეცილებინა. 1990 წლის აპრილში, უელსის გარდაცვლილი პრინცესა შვილებთან ერთად ნეკერის კუნძულზე გაემგზავრა, რომ მშვიდი და განმარტოებული დასვენება მოეწყო. როგორც კი კუნძულზე ჟურნალისტები გამოჩნდნენ, დიანამ საინტერესო გეგმა შეიმუშავა.
„დედამ სასწრაფოდ ბუშტები გაბერა და სამ თვლაზე ეს ბუშტები ფოტოგრაფებს თავზე დავაყარეთ“ – იხსენებს ჰარი. სამეფო დაცვის წევრის თქმით, ბიჭებს ასეთი ოინები ძალიან მოსწონდათ და დედით ამაყობდნენ.
ასევე დაგაინტერესებთ
#OK! პრინცი ჰარი დაბადების დღეს აღნიშნავს – 41 წელი ფოტოებში
