Couchsurfing − ეს არის აპლიკაცია, რომლის საშუალებითაც მოგზაურობის დროს შეგვიძლია უფასოდ ვიპოვოთ ღამის გასათევი, რაც იმას ნიშნავს, რომ სასტუმროში ფულის გადახდა არ გვიწევს და ვზოგავთ ჩვენს ფინანსებს. ამ დროს რჩები ადგილობრივებთან, იძენ ახალ ნაცნობებს და მათი დახმარებით სიღრმისეულად ათვალიერებ ქალაქს, რაც უფრო უკეთ გაზიარებს ამა თუ იმ ქვეყნის კულტურას და ხდები მისი ნაწილი. აპლიკაცია მთელ მსოფლიოში დიდი პოპულარობით სარგებლობს და მას ქართველი მოქალაქეებიც საკმაოდ აქტიურად იყენებენ. OK! მარკეტერს, ლექტორსა და ბლოგერს, გურამ შეროზიას ესაუბრა, რომელიც საკუთარ გამოცდილელებას გაგვიზიარებს Couchsurfing‑თან დაკავშირებით.
გურამ, რა არის და რაში გვეხმარება აპლიკაცია Couchsurfing?
Couchsurfing არის აპლიკაცია, რომლის საშუალებითაც, მსოფლიოს ნებისმიერ წერტილში შესაძლებელია იპოვო მასპინძლები და დარჩე მათთან უფასოდ. აღსანიშნავია, რომ დარჩენა არ გულისხმობს მხოლოდ ღამის გათევას − ოჯახში ხარ სტუმრად, ხშირ შემთხვევაში გიმზადებენ სადილს, მოგყვებიან ქალაქის დასათვალიერებლად და თავს ძალიან კომფორტულად გაგრძნობინებენ. ანუ ეს არის ადგილობრივებთან შეხვედრის, კომუნიკაციის, კულტურისა და ქალაქის სულის ბოლომდე შეგრძნების ძალიან კარგი საშუალება.
რა დადებითი მხარეები აქვს ამ აპლიკაციას?
როგორც უკვე აღვნიშნე, დადებითი აქვს ის, რომ რჩები უფასოდ, გაიცნობ ძალიან კარგ ადამიანებს, საშუალება გაქვს მოხვდე Local Party-ზე და გახდე მათი სამეგობროს ნაწილი. გარდა ამისა, ადგილობრივებმა რასაკვირველია კიდევ უფრო უკეთ იციან ქალაქის სანახაობები და ისეთ ადგილებს დაათვალიერებ, რომელიც რუკაზე შესაძლოა საერთოდ არ იყოს. თუმცა მთავარი უპირატესობა მაინც ახალი ნაცნობები არიან. ყველა ქვეყანაში, სადაც კი მიმოგზაურია, ამ აპლიკაციის მეშვეობით შეძენილი მყავს რამდენიმე მეგობარი და ვფიქრობ, ძალიან ძლიერი ვარ ამ კონტაქტებით.
როგორ ხდება აპლიკაციის გამოყენება?
გამოყენება ძალიან მარტივია − გაქვს Profile, რომლის მეშვეობითაც წერ Couch request-ს. მაგალითად, რომელიღაც პიროვნებას პარიზში უგზავნი შეტყობინებას შენ შესახებ, აცნობ საკუთარ თავს, უხსნი, თუ რატომ გინდა მასთან დარჩენა. იმ შემთხვევაში, თუ დაგიდასტურებს, ეს ნიშნავს იმას, რომ თანახმაა მასთან დარჩე. დაცულია უსაფრთხოების ნორმები review-ით, რაც იმას ნიშნავს, რომ მე თუ ვინმესთან დავრჩები, ვუტოვებ კომენტარს და ეს გავლენას ახდენს იმ ადამიანებზე, რომლებიც მომავალში გადაწყვეტენ მასთან დარჩენას.
თქვენ რამდენად ხშირად იყენებთ აპლიკაციას?
პანდემიის პერიოდში ვეღარ ვმოგზაურობ. ვინაიდან ჩემი ტურისტული კომპანია მაქვს, ზოგჯერ გუნდებთან ერთად მიწევს სიარული, მაგრამ როცა მარტო ან წყვილში ვმოგზაურობ, ძალიან ხშირად ვიყენებ ამ აპლიკაციას და საოცარი მეგობრები მყავს შეძენილი ამ კუთხით. ვმასპინძლობდი კიდეც და პანდემიის გადავლის შემდეგ, კვლავ გავაგრძელებ მის გამოყენებას.
