კომპანია Commodus უკვე ოთხი წელია, რაც ქართულ ბაზარზე გამოჩნდა და მას შემდეგ დეკორატიული ნივთების მრავალფეროვან არჩევანს სთავაზობს საზოგადოებას. აქ შეგიძლიათ შეიძინოთ ან დაამზადოთ ყველაფერი, რაც თქვენს გარემოს მეტ სიმყუდროვეს შემატებს. გთავაზობთ ინტერვიუს კომპანიის დამფუძნებელ ირინა მუჯირთან, რომელიც უფრო ვრცლად გვიამბობს Commodus-ში წარმოდგენილი პროდუქციის შესახებ.
როგორ დაიბადა Commodus-ის იდეა და რამდენი ხანია რაც ქართულ ბაზარზე ოპერირებს?
კომპანია Commodus-ი უკვე მეექვსე წელია ქართულ ბაზარზე ოპერირებს, თუმცა შოურუმით სამი წლის წინ წარდგა საზოგადოების წინაშე. თავდაპირველად მე და ჩემმა ორმა მეგობარმა დავიწყეთ საზოგადოებისთვის ინტერიერის დიზაინის სერვისის შეთავაზება, რადგან ყოველთვის პრობლემა იყო სახლის ისეთი დეკორისა და ავეჯის პოვნა, როგორიც ჩვენ გვსურდა. სწორედ აქედან გამომდინარე დაიბადა იდეა მოგვეწყო სივრცე, სადაც იქნებოდა ყველაფერი სახლის ინტერიერისთვის.
დღეს ჩვენს შოურუმში შეგიძლიათ იხილოთ კერამიკის ხელნაკეთი ნივთები − როგორც ჭურჭელი, ასევე სახლის მოზრდილი დეკორაციები. ავეჯს რაც შეეხება, ვამზადებთ შეკვეთით.
რა სახის პროდუქციას სთავაზობთ საზოგადოებას?
როგორც უკვე აღვნიშნე, ჩვენთან შეგიძლიათ შეიძინოთ ან დაამზადოთ ყველაფერი სახლისთვის, რესტორნებისთვის, ასევე ვმუშაობთ კორპორაციულ შეკვეთებზე, როგორიც არის მაგალითად საახალწლო საჩუქრები, ვმუშაობთ ნებისმიერ რაოდენობაზე. ჯერჯერობით ყველაზე დიდი შეკვეთა 9 000 ერთეული გვქონდა, მაგრამ ამ ეტაპზე დაგროვილი გამოცდილებით შეგვიძლია უფრო დიდი რაოდენობის შეკვეთებსაც მოვკიდოთ ხელი.
ნიშა, რომელიც სხვებისგან გამოგარჩევთ…
რამდენად გამოვირჩევით სხვებისგან, ვერ გეტყვით, მაგრამ ჩვენთვის პრიორიტეტი ყოველთვის დამკვეთის სურვილია, რადგან გვესმის, როდესაც საცხოვრებელი სივრცის გალამაზებაზეა საუბარი, ყველა ადამიანს ინდივიდუალური სურვილები აქვს, ამიტომ ჩვენც ვცდილობთ ყველას ავუსრულოთ ეს სურვილები, როგორც შეგვიძლია.
ვინ ქმნის ნამუშევრებს? გვესაუბრეთ პროცესზე.
პროცესი ჩვენი საქმის ყველაზე საინტერესო ნაწილია. ჩვენი გუნდი შედგება 10 ადამიანისგან, მათ შორის არიან: კერამიკოსები, მხატვრები და ამომყვანი. ფორმის შექმნის სამი გზა არსებობს: ამოყვანა, ფორმაში ჩამოსხმა ან ძერწვა. შემდეგ ნივთი გამოიწვება. ერთხელ უკვე გამომწვარი ნივთი იხატება, ჭიქურდება, ისევ გამოიწვება უკვე მინიმუმ 1050 გრადუსზე და ასე ვიღებთ საბოლოო შედეგს.
სამივე შემთხვევაში პროცესი ძალიან სასიამოვნოა. წარმოიდგინეთ, ფაქტობრივად ტალახისგან შეგიძლიათ შექმნათ ნივთი, რომელიც მოგწონთ. შესახედად უფრო მარტივი ჩანს ეს ყველაფერი, რეალურად კი ხშირად გაუთვალისწინებელი პროცესები იჩენს ხოლმე თავს, რომლებიც ფორმებს აზიანებს და საბოლოო შედეგი არ გამოდის ისეთი, როგორიც გვინდა, მაგრამ ესეც ამ ცოცხალი პროცესის ნაწილია.
გვესაუბრეთ ინსპირაციაზე.
ინსპირაცია ხშირად სხვადასხვა ნიუანსიდან მოდის − შესაძლოა ეს იყოს ფილმი, ნახატი, ბუნება, სამკაული, მაგრამ ჩემი აზრით ინსპირაციის ყველაზე დიდი წყაროა მუშაობა. შრომაში იბადება ახალი იდეაც და შემართებაც.
სად არის წარმოდგენილი Commodus-ის პროდუქცია?
ჩვენ გვაქვს შოურუმი ვაშლოვანის 5 ნომერში. ასევე, გვაქვს საწარმო, სადაც ყველას შეუძლია მოვიდეს და თავად ნახოს როგორ იქმნება მათთვის სასურველი ნივთები.
როგორია თქვენი სამომავლო გეგმები?
პანდემიისგან შექმნილი ვითარების გამო ცოტა რთულია სამომავლო გეგმებზე საუბარი, მაგრამ ახლო მომავალში ვგეგმავთ „არტ თერაპიის“ დღეებს, სადაც წინასწარი ჩაწერით შეძლებთ მობრძანდეთ და ისიამოვნოთ ძერწვით, ხატვით, ამოყვანით, დააგემოვნოთ ქართული ღვინო და გაუზიაროთ ემოციები გუნდის სხვა წევრებს. ვფიქრობ საინტერესო იქნება. ბოლო დროს ძალიან მოგვაკლდა ადამიანებთან კონტაქტი და სასიამოვნო ხელსაქმე. ალბათ კარგი გზა იქნება მოვწყდეთ კომპიუტერებს და განვიტვირთოთ კარგ გარემოში.
FB: Commodus
Insta: commodus.design
www.commodus.ge
Mail: commodusgeorgia@gmail.com
Tel: 591 19 19 99
