კომპანია „ჯორჯიან მანგანეზმა“ დაიწყო ქალაქ ჭიათურის უმთავრესი ღირსშესანიშნაობის − ჭიათურის სახალხო-სამგზავრო საბაგიროსა და ისტორიული სადგურის აღდგენითი სამუშაოები, რომელსაც კულტურული მემკვიდრეობის ძეგლის სტატუსი აქვს და მართლაც, ქალაქის სავიზიტო ბარათია.
სამგზავრო საბაგირო პირველად სწორედ ჭიათურაში, 1954 წელს აშენდა, გამოჩენილი ქართველი ინჟინრის, გიორგი ფანცულაიას ხელმძღვანელობით. ის 65 წლის განმავლობაში ერთგულად ემსახურებოდა ქალაქსა და მის მიმდებარე სოფლებს, და არცერთხელ არ უღალატია. საბაგიროს ფუნქციონირება ბოლო პერიოდში მწყობრიდან გამოსვლისა და უსაფრთხოების რისკის არსებობის გამო შეჩერდა. თუმცა, აქაური რელიეფის გათვალისწინებით, საბაგიროები დღესაც ოპტიმალური საშუალებაა გადაადგილებისთვის და აუცილებელია მისი დროულად აღდგენა.
„საბაგიროს ამ ქალაქისთვის, გარდა ფუნქციურისა, კულტურული დატვირთვაც აქვს. პროექტის დასრულების შემდეგ, ჭიათურა დაიბრუნებს თავის სავიზიტო ბარათს და, დარწმუნებული ვარ, მის სანახავად აქ ძალიან ბევრი ადამიანი ჩამოვა. მოგეხსენებათ, საბაგიროები, როგორც საინტერესო ატრაქცია, განსაკუთრებულად იზიდავს ადგილობრივ თუ საერთაშორისო ტურისტებს და ამ მხრივაც ქალაქი სულ უფრო მეტად გამოცოცხლდება“, − განაცხადა „ჯორჯიან მანგანეზის“ სპეციალურმა მმართველმა ნიკოლოზ ჩიქოვანმა.
ფოტო: რამაზ მაჭავარიანი
