ბარ-რესტორანი „პაოლო“ ქუთაისში ისტორიულ ადგილას მდებარეობს. დამფუძნებელ- დირექტორი მზეო კინწურაშვილი და დამფუძნებელი ირინა ასათიანი დეტალურად გვიამბობენ „პაოლოს“ შექმნის ისტორიას და წარმატების ფორმულის საიდუმლოსაც გაგვიმხელენ.
ბარ-რესტორანი მასპინძლების გაოცებას საინტერესო გარემოთი, ქართულ-ევროპული კერძებით და სასიამოვნო მუსიკით ყოველთვის ახერხებს.
ირინა ასათიანი: წლების წინ სხვადასხვა ქვეყანაში მიწევდა ყოფნა. თუმცა საქართველოში როცა დავბრუნდი, მივხვდი, სიახლე იყო აუცილებელი. მე და მზეომ ერთობლივად გადავწყვიტეთ საერთო საქმის გაკეთება. ჩვენ დიდი ხნის მეგობრები ვართ და სულ რაღაც სამ თვეში ადგილიც ვიპოვეთ, იდეებიც გავცვალეთ და დავაარსეთ „პაოლო“ . ამ საქმეში ჩვენთან ერთად დიდი წვლილი მიუძღვის შალვა ხეცურიანსა და მის მეუღლეს ესმა ხეცურიანს. სულის ჩადგმა ერთობლივად მოხდა. უკვე ექვსი წელია ბაზარზე წარმატებით ვსაქმიანობთ.
მზეო კინწურაშვილი: მიუხედავად იმისა, რომ ამ სფეროში გამოცდილება არ გვქონდა, გავბედეთ და ქალაქს სიახლე შევთავაზეთ, რომელმაც, ვფიქრობ, გაამართლა.
ირინა: ქალაქმა ძალიან კარგად მიგვიღო, მათთვის „პაოლო“ საყვარელ ადგილად იქცა და ჩვენს მომხმარებლებს აქ მოსვლა სიამოვნებთ. მიხარია, რომ ისეთი ლამაზი კუთხე შევქმენით, სადაც მოდიან, იკრიბებიან. ვცდილობთ განსხვავებული იყოს გარემო, კერძები, გაფორმება, სერვირება. ზოგადად სილამაზე ძალიან მიყვარს. გვაქვს ორი, ქვედა და ზედა სივრცე, სიმყუდროვე და თბილი გარემო.
კერძებისა და სამზარეულოს შესახებ გვიამბეთ
ირინა: სიგემრიელე და განსხვავებული გემოები ძალიან მნიშვნელოვანია. ვთვლი, რომ ქართული კერძები გემოებით გამორჩეულია. ასევე ევროპული სამზარეულოც, იმიტომ, რომ ზუსტად იმავენაირადაა მიწოდებული, როგორც ევროპაში.
მზეო: ძალიან მნიშვნელოვანია ხარისხი და ეკოლოგიურად სუფთა პროდუქტი. ყველა ეტაპზე ვვითარდებით. სხვადასხვა ქვეყნიდან ტურისტები ჩამოდიან, ვცდილობთ სტუმრებს ახლოს გავაცნოთ ქართული სამზარეულო. ქუთაისში, მოგეხსენებათ, ბევრი კარგი ბარ-რესტორანია, მაგრამ ჩვენ ჩვენი კონცეფცია გვაქვს, რომელსაც ვიცავთ და აბსოლუტურად განსხვავებულია სხვისგან. უგემრიელესი კერძებიდან ერთ -ერთი გამორჩეულია კალმახი მჭადში, რომელიც ქართული კერძია და ევროპულადაა მიწოდებული. იდეა სწორედ ეს იყო, ძველი ქართული გემოების გაცოცხლება, რომელიც ვროპულადაა შეთავაზებული.
აქ ისეთ კერძებს დააგემოვნებთ, ბებოს მიერ მომზადებულ გემოებს რომ გაგახსენებთ, მათ შორისაა სიგემრიელით გამორჩეული „შქმერული“.
გზა, რომელიც გაიარეთ
ირინა: რთული გზა გავიარეთ. მაქსიმუმს ვდებთ და მაღალი ხარისხი გამოგვდის. სტუმრის რჩევებს, შენიშვნებსაც ყურადღებას ვაქცევდით და ვითვალისწინებდით, სად რა იყო გამოსასწორებელი. ასეა დღესაც, თითოეული სტუმრის შეფასებას ყურადღებას ვაქცევთ. ჩვენი დიდი სურვილია, მომხმარებლის სურვილი დავაკმაყოფილოთ.
ასევე რთული იყო პანდემიის პერიოდი. შეიძლება ითქვას, ახალი ფურცელი გადავშალეთ და ყველაფერი ნულიდან დავიწყეთ. ვეცადეთ ფეხზე დავმდგარიყავით. და ასე მყარად რომ გავაგრძელეთ, ბადრი კაკაბიძის დამსახურებაა, მადლობა მას. ასევე ძალიან კარგი ახალი მეპატრონეები გვყავს და ბევრი გეგმაც დავსახეთ.
რაში მდგომარეობს „პაოლოს“ გამორჩეულობა?
მზეო: სხვადასხვა საკითხში. მოგეხსენებათ, საქართველოში ბევრი მარანია. შესაბამისად, სტუმარს კარგ კერძზე მიწოდებული კარგი ღვინო მოსწონს, რასაც დიდ ყურადღებას ვაქცევთ. ასევე ვმართავთ საღამოებს, ჩამოგვყავს მოწვეული სტუმრები და მომღერლები. ამავდროულად, სხვადასხვა სფეროს წარმომადგენლები პრეზენტაციებს მართავენ. ეს არის ადგილი, სადაც სიამოვნების მიღება მრავალმხრივ შეუძლიათ. უცხოელებს, სხვადასხვა ტურისტულ ჯგუფებს ბევრჯერ აურჩევიათ და ირჩევენ ამ გარემოს, აღნიშნავენ, რომ მოსწონთ.
როგორია გუნდურობა?
ირინა: პირველ რიგში, კარგი ადამიანებისგან შემდგარი გუნდი გვყავს. ვითარდებიან, იზრდებიან და ისევ ,,პაოლოში“ აგრძელებენ.
ეს არის თითოეულის სახლი. როგორც საკუთარ სახლში მინდა ყველაფერი მოწესრიგებული და საუკეთესო იყოს, ზუსტად ისეა აქ. ნებისმიერი სტუმარი თანაბარი ყურადღებითა და მომსახურების მაღალი ხარისხით უნდა მივიღოთ, თითოეულმა კომფორტულ პერსონად უნდა იგრძნოს თავი. ქართველები სტუმართმოყვარე ერი ვართ, შესაბამისად, აქ მოსულმა სტუმარმა ეს ყველაფერი უნდა შეიგრძნოს.
ქუთაისსა და ქუთაისელ მომხმარებელზე რას იტყვით?
ირინა: ქუთაისში დავიბადე და გავიზარდე. მეამაყება ეს ქალაქი. ქუთაისელები კრიტიკოსები და სწორად შემფასებლები არიან. მხოლოდ ბიზნესი არაა გადამწყვეტი. ყველაფერი, რაც ირგვლივაა, ფასეული, ძვირფასია და პატივი უნდა ვცეთ.
მზეო: ისტორიულ უბანში ვართ და ძალიან მიყვარს „პაოლო“, ბევრი შეხვედრის, ურთიერთობების ადგილია. ასევე ვართ შპს „ცისფერყანწელები“. ბევრი ქუთაისელი მოდის. მიხარია, თითოეული მათგანის ნდობა რომ გავამართლეთ, ბოლო სტუმარის წასვლამდე აქ ვართ. თითოეულ მათგანს ვიღებთ ისე, როგორც საკუთარ სახლში.
სამომავლოდ რა გეგმები გაქვთ?
ქალაქთან ახლოს მომხმარებლებისთვის გარე სივრცის შეთავაზებას ვაპირებთ. ასევე ტაილანდურ სამზარეულოზე ვიწყებთ მუშაობას, რომლის პრეზენტაცია სულ მალე გაიმართება. მომხმარებლებს ვთავაზობთ ქართულ, ევროპულ, აზიურ და უკვე კონკრეტულად – ტაილანდურ კერძებს.
ტექსტი: ნანა კუკულავა
ფოტო: ლანა ვახტანგაძე
