იაპონიის ჯანმრთელობის, შრომისა და სოციალური უზრუნველყოფის სამინისტროს ინფორმაციით, 1 სექტემბრის მდგომარეობით, ამ ქვეყანაში 100 წლის და მეტი ასაკის ადამიანთა რიცხვმა 99 763-ს მიაღწია, რაც ზედიზედ 55-ე რეკორდია. წელს ხანდაზმულთა რაოდენობა 4 644-ით მეტია, ვიდრე გასულ წელს, აქედან ქალები 87 784-ს შეადგენენ, რაც საერთო რაოდენობის დაახლოებით 88%-ია.
1963 წელს, როდესაც იაპონიაში ხანდაზმულთა სტატისტიკის წარმოება დაიწყო, 100 წლისა და მეტი ასაკის მხოლოდ 153 ადამიანი ცხოვრობდა. 1981 წელს ამ რიცხვმა 1 000-ს გადააჭარბა, ხოლო 1998 წელს – 10 000-ს. 2012 წელს ქვეყანაში 50 000-ზე მეტი ხანდაზმული ცხოვრობდა, 2022 წელს – 90 000, ხოლო წელს უკვე ეს რიცხვი 100 000-ს მიუახლოვდა.
იაპონიაში 100 წლის და მეტი ასაკის ადამიანთა რიცხვი ყოველ 100 000 მოსახლეზე 80,58-ს შეადგენს. პრეფექტურების მიხედვით, პირველ ადგილზეა სიმანე – 168,69, რომელიც მე-13 წელია, ლიდერობს. მას მოჰყვებიან კოჩი (157,16) და ტოტორი (144,63). ხანდაზმულთა ყველაზე დაბალი მაჩვენებელი საიტამაში (48,50), აიჩიში (53,00) და ოსაკაში (55,44) დაფიქსირდა.
ქვეყნის ყველაზე ხანდაზმულ ქალად 114 წლის კაგავა შიგეკო ითვლება, ხოლო ყველაზე ხანდაზმულ მამაკაცად – 111 წლის მიძუნო კიოტაკა. ცნობისთვის, ესაკი რეონა, რომელმაც 1973 წელს ნობელის პრემია მიიღო ფიზიკაში, ახლახან 100 წლის გახდა.
წელს იაპონიაში ასი წლის იუბილეს 52 310 ადამიანი იზეიმებს. ყველა მათგანს მილოცვის სიგელები და ვერცხლის თასები გადაეცემა.
სპეციალისტების თქმით, იაპონელთა ხანგრძლივ სიცოცხლეს ხელს უწყობს ჯანსაღი კვება, ფიზიკური აქტივობა და სიმსუქნის დაბალი მაჩვენებელი.
აღსანიშნავია, რომ იაპონელი მკვლევრები ინოვაციურ გენეტიკურ ტექნოლოგიებზე მუშაობენ, რომლებსაც დაუნის სინდრომთან დაკავშირებული 21-ე ქრომოსომის შემცირება ან მთლიანად გაქრობა შეუძლიათ.
მიუხედავად იმისა, რომ შედეგები ჯერ კიდევ ექსპერიმენტულ სტადიაშია და ჯერჯერობით, ტექნოლოგიების ადამიანზე გამოყენება შეუძლებელია, ინფორმაციამ დიდი დისკუსიები გამოიწვია.
ზოგი ამას გენეტიკური დაავადებების პრევენციისკენ გადადგმულ რევოლუციურ ნაბიჯად მიიჩნევს, სხვები კი იმ ეთიკურ პრობლემებზე გვაფრთხილებენ, რომლებიც ადამიანის ემბრიონის ცვლილებას უკავშირდება.
ცნობისთვის, დაუნის სინდრომი ყველაზე გავრცელებული ქრომოსომული გენეტიკური ცვლილებაა, რომლის დროსაც 46 ქრომოსომის ნაცვლად, გვხვდება დამატებით ერთი ქრომოსომა 21-ე წყვილში. დაუნის სინდრომს სწორედ ეს დამატებითი ნაწილი იწვევს.
