ქუთაისი ჩვენი ქვეყნის ერთ-ერთი ულამაზესი და გამორჩეული ქალაქია თავისი ღირსშესანიშნაობებით, სტუმარმასპინძლობითა და უგემრიელესი სამზარეულოთი. ამის ნათელი მაგალითია სასტუმრო Hill Hotel Kutaisi, რომელიც ნებისმიერ სტუმარს თავს ისე აგრძნობინებს, როგორც საკუთარ სახლში და ამავდროულად უგემრიელესი კერძებით უმასპინძლდება. თავიდან იყო ჩანაფიქრი, რომ ტიპურ, ძველი სტილის სახლში ახალგაზრდა ცოლ-ქმარს და სამ შვილს ეცხოვრათ. თუმცა სახლის ადგილზე ლამაზი, სამსართულიანი სასტუმრო გაჩნდა.
14 ოთახი გემოვნებიანი და დახვეწილი დიზაინით, დიდი ტერასა ქუთაისის უმშვენიერესი ხედებით, კომფორტული და მყუდრო გარემო, ბაგრატის ტაძარი გვირგვინივით რომ ადგას თავზე და შორიდან გელათიც ფონს ულამაზებს, მართლაც ულამაზესია ნებისმიერი ტიპის წვეულებისთვის, არ ინანებთ, თუ ეწვევით.
ყველაზე მნიშვნელოვანი, რაც სასტუმრო „ჰილს“ სხვებისგან გამოარჩევს და თვალში მოგხვდებათ, არის ის, რომ იგი სრულად ადაპტირებულია შშმ პირებზე, მათ შორის ნომერში სველი წერტილით.
მასპინძლები მაგდა და შოთა ექიმები არიან, სამი შვილი ჰყავთ და საზღვარგარეთ სწავლის შემდეგ მშობლიურ ქალაქში დაბრუნდნენ. ერთი სიტყვით, ბევრი რომ არ გავაგრძელოთ, OK! Decor Book-ი სასტუმროს დამფუძნებელს, შოთა ოჩიგავას პირადად ესაუბრა.
ბატონო შოთა, უპირველესად სასტუმრო Hill Hotel Kutaisi-ს დაფუძნების ისტორია გაგვაცანით.
რამდენიმე წლის განმავლობაში საზღვარგარეთ ვცხოვრობდი ოჯახთან ერთად. დაბრუნების შემდეგ კი შევიძინეთ სახლი, სადაც გვსურდა, რომ ოჯახს ერთად გვეცხოვრა. თუმცა გაჩნდა იდეა, გაგვეკეთებინა საოჯახი ტიპის სასტუმრო, სადაც ამავდროულად ვიცხოვრებდით. თუმცა მოგვიანებით გადავწყვიტეთ ამ იდეისთვის უფრო ფართო გზა მიგვეცა და მეგობრების რჩევით მივედით ბანკში, დაფინანსების შემდეგ კი ავაშენეთ სასტუმრო, რომელიც საზოგადოების წინაშე Hill Hotel Kutaisi-ს სახელით 2022 წლის მაისიდან წარდგა.
რამდენ ოთახს მოიცავს სასტუმრო?
სასტუმრო შედგება 14 ოთახისგან, მათ შორისაა შშმ-პირებისთვის ადაპტირებული ნომერიც. სრულად ვიღებთ 31 ადამიანს.
ჩვენს მომსახურებაში ასევე შედის საუზმე, რომელიც შედგება შვედური კერძებისგან, მალე დაგვემატება ვახშამიც. ყველა ოთახი მოიცავს სველ წერტილსა და აივნებს. სტუმრებს ასევე ხვდებათ პირადი ჰიგიენური მოხმარების ნივთები, ასე რომ, ჩვენთან ყველაფერია, რაც კომფორტული დასვენებისთვის აუცილებელია.
სასტუმრო ასევე მოიცავს 150 კვ.მ. ტერასას, რომელიც გადაჰყურებს ქალაქის ულამაზეს ხედებს, ბაგრატს, გელათს. აქ ძალიან მალე მოეწყობა კაფე-ბარი, რადგან სასტუმროში ჩვენი სტუმრებისთვის ეს ერთ-ერთი ყველაზე საყვარელი ადგილია. აქ უკვე შევთავაზებთ ტრადიციულ ქართულ კერძებსა და ღვინოსთან დასაგემოვნებელ დაფებს.
სასტუმროს ინტერიერზეც გვიამბეთ.
თავდაპირველად მინდა ვახსენო, რომ სასტუმრო არის სამვარსკვლავიანი. პირველ სართულზე მდებარეობს რესეფშენი, სამზარეულო, სასადილო, მოსაცდელი სივრცე სტუმრებისთვის, ოთახები, სადაც ჩვენი სტუმრები განთავსდებიან და ტერასა, რომელიც, როგორც აღვნიშნე, გულგრილს არავის ტოვებს თავისი ულამაზესი ხედებით.
სად მდებარეობს სასტუმრო?
სასტუმრო მდებარეობს გორაზე, ვაჟა ფშაველას 40 ნომერში.
როგორია სასტუმროს სამომავლო გეგმები?
სულ მალე დასრულდება მარნის მშენებლობა და ძალიან ხშირად გავმართავთ ღვინის დეგუსტაციებს. ასევე, როგორც აღვნიშნე, გვექნება კაფე-ბარი ტერასის ტერიტორიაზე, რომელიც სტუმრებს უგემრელესი კერძებითა და სასმელებით უმასპინძლებს.
