აფხაზი მოდელი, ადიცა ბერძენია პარიზის მოდის კვირეულის ფარგლებში Chanel-ის ჩვენებაში მონაწილეობს. 24 წლის მოდელმა ფრანგული მოდის სახლის კრეატიული დირექტორის, მატიე ბლაზის სადებიუტო კოლექციის ჩვენება გახსნა.
Посмотреть эту публикацию в Instagram
გოგონა აფხაზ ბლოგერთან ინტერვიუში ყვება, რომ აპრილის დასაწყისში, მოსკოვსა და სანქტ-პეტერბურგში რამდენიმე დღით, დასასვენებლად იყო ჩასულიყო, როცა Chanel-დან დაუკავშირდნენ.
ჩემმა აგენტმა მომწერა: „კასტინგზე დაბრუნდები?“ „რა თქმა უნდა, დავბრუნდები“, – ვუპასუხე მე. „მოსკოვი-სტამბოლი-ბარსელონა-პარიზი, სამი რეისი, პლუს ღამით არასდროს მძინავს. რა თქმა უნდა, საშინლად გამოვიყურებოდი“ – ამბობს მოდელი.
პირველ დღეს ადიცა მატიე ბლაზის თანაშემწემ ნახა, მეორე დღეს კი თავად მატიემ.
„ბევრი ვისაუბრეთ. ის აფხაზეთით ძალიან დაინტერესდა. მის შესახებ არავინ არაფერი იცოდა. სად არის? გერმანიაში? თურქეთში? ბრაზილიაში? რუსეთში? ცალკე სახელმწიფო? რუკა ვაჩვენე, ჩვენი წეს-ჩვეულებების შესახებ ვუამბე, უთხარი, რომ საკუთარი ენა და კულტურა გვაქვს“.
საბოლოოდ, საუბარი იმით დასრულდა, რომ ადიცას შრომითი ხელშეკრულება და ოქტომბერში ბლაზის სადებიუტო კოლექციის ჩვენებაში მონაწილეობა შესთავაზეს.
მოდის სამყარომ ადიცა ბერძენიას სახელი 2021 წელს გაიგო, როდესაც რუსული ELLE-ის ოქტომბრის გარეკანზე გამოკვეთილი ნაკვთების მქონე, ცისფერთვალება გოგონა გამოჩნდა. 2023 წელს ის ნიუ-იორკის მოდის კვირეულზე Ralph Lauren-ის კოლექციის ჩვენებაზე მიიწვიეს, რასაც მილანის მოდის კვირეული და ცნობილი ბრენდების ჩვენებები მოჰყვა.
ადიცამ აფხაზური ბლოგისთვის მიცემულ ინტერვიუში გაამხილა, თუ რატომ თქვა უარი ორი წლის წინ, მილანის მოდის კვირეულზე Diesel-ის ჩვენების გახსნაზე. მისი თქმით, ტრადიციულ ოჯახში გაიზარდა და როგორი მიმზიდველიც არ უნდა იყოს შეთავაზება, ძალიან გამჭვირვალე ან მოშიშვლებული კაბით პოდიუმზე არ გამოვა.
გოგონა თავის ინტერვიუებში ყოველთვის ხაზგასმით აღნიშნავს, რომ დამოუკიდებელ ქვეყანას წარმოადგენს და რუსი კი არა, აფხაზი მოდელია. შესაძლოა, ამით აიხსნება ის დუმილი, რომლითაც რუსული მოდის ჟურნალები ბერძენიას პარიზის მოდის კვირეულზე გამოჩენას შეხვდნენ.
ადიცა ბერძენია დროებით ოკუპირებულ აფხაზეთში, სოხუმში ცხოვრობს. მას „აფხაზეთის სახელმწიფო უნივერსიტეტის“ ეკონომიკის ფაკულტეტი აქვს დამთავრებული. გოგონას სამოდელო კარიერა სამი წლის წინ, სილამაზის კონკურსში მონაწილეობით დაიწყო. მას შემდეგ, რაც აფხაზეთის მეორე ვიცე-დედოფალი გახდა, ადიცას სამოდელო სააგენტო Avant Models-ის წარმომადგენლები დაუკავშირდნენ და ჟურნალ Elle-თვის ფოტოსესია შესთავაზეს.
ასევე დაგაინტერესებთ
#OK! გაიცანით ნასტასია ლეგრანი (ბაბლუანი) – მაღალი მოდის ახალი ვარსკვლავი
