მოდის სამყაროში სილამაზე წარმავალი ტენდენციაა, რომელიც განსაზღვრავს როგორი უნდა იყოს „იდეალური“ სახე და სხეული, თუმცა, ისტორიამ უმრავი მაგალითი იცის, როდესაც დიდი ცხვირის ან ყურების, ჭორფლის ან კანის დეფექტის მქონე მოდელმა პოდიუმები დაიპყრო და მილიონების კერპი გახდა.
ლილი კოული
ქათქათა კანისა და ცეცხლოვანი თმების მქონე გოგონა საკუთარ გარეგნობას უპირატესობად არასოდეს მიიჩნევდა. ყველაფერი მაშინ შეიცვალა, როდესაც თექვსმეტი წლის ლილი ლონდონის სავაჭრო ცენტრში ბრიტანელმა მსახიობმა ბენჯამინ ჰარტმა შენიშნა. მან გოგონას ურჩია, რომ ძალები მოდელობაში მოესინჯა და ეს საბედისწერო რჩევა აღმოჩნდა. ცნობილ ფოტოგრაფ სტივენ მეიზელთან გადაღებას ბრიტანულ Vogue-თან შრომითი ხელშეკრულება მოჰყვა. რამდენიმე თვეში ლილი კოული უჩვეულო გარეგნობის წითური გოგონასგან მსოფლიო დონის ვარსკვლავად გადაიქცა, რაც ამტკიცებს, რომ სილამაზე შეიძლება უცნაური და მარადიული იყოს.
მოლი ბეარი
მოლი ბეარის ისტორია ჰოლივუდურ სცენარს ჰგავს. ჩვიდმეტი წლის ამერიკელს დიდი, ღრმად ჩასმული თვალებით, მაღალი ღაწვებით და გამოწეული ყურებით, მოდელის კარიერაზე არასდროს უფიქრია. ნიუ-იორკში, სკოლის ექსკურსიის დროს, ის სამოდელო სააგენტოს თანამშრომელმა შენიშნა და მოდელად მუშაობა შესთავაზა. მოლი შეთავაზების მიმართ სკეპტიკურად იყო განწყობილი, მაგრამ სააგენტომ დაიყოლია, რომ ბედი ეცადა.
საბედისწერო შეხვედრიდან სულ რაღაც ერთი კვირის შემდეგ, მოლის სახე ბრიტანული და გერმანული ჟურნალების გარეკანებზე გამოჩნდა. მოდის ინდუსტრიამ მისი მოქნილობა და ცოცხალ მანეკენად გამოჩენის უნარი, რითიც დიზაინერების ყველაზე გიჟურ ფანტაზიებს განასახიერებდა, ღირსეულად დააფასა. ისეთ გიგანტებთან თანამშრომლობამ, როგორებიცაა Chanel, Prada და Fendi, მოლი ბეარის, როგორც თაობის ერთ-ერთი ყველაზე მოთხოვნადი მოდელის სტატუსი, განამტკიცა.
ქეით მოსი
ქეით მოსის ფენომენმა მოდელების იმიჯის აღქმა ათასწლეულის მიჯნაზე რადიკალურად შეცვალა. მაღალი და ტანადი სუპერმოდელების ეპოქაში, მისი სუსტი ფიგურა და ნაკვთები, რომლებიც კლასიკურ სტანდარტებს ეწინააღმდეგებოდა გაოცებას იწვევდა. თუმცა, გლამურისგან დაცლილი გარეგნობა, იდეალურად ერგებოდა გრანჟის სტილს, რომელიც ძალას იკრეფდა.
ის ახალ ტენდენციებს არა მარტო მოერგო, არამედ მათი სიმბოლო გახდა. დროთა განმავლობაში, მისი გამორჩეული სილამაზე, რომელმაც ოდესღაც ამდენი დავა გამოიწვია, მისაბაძი გახდა, რამაც არასტანდარტული გარეგნობის უამრავ გოგონას აღმოსავლეთ ევროპიდან და აზიიდან პოდიუმისკენ გზა გაუხსნა.
ვინი ჰარლოუ
კანადელმა მოდელმა ვინი ჰარლოუმ მოდის სამყაროში ჯანმრთელობის მდგომარეობასთან დაკავშირებული უნიკალურობის თემა შემოიტანა. ვიტილიგომ, რომელიც კანის პიგმენტაციის ცვლილებებს და ღია ფერის ლაქებს იწვევს, სკოლის წლებში სასტიკი დაცინვის სამიზნედ აქცია. მის ცხოვრებაში გარდამტეხი მომენტი 2014 წელს, შოუში „ტოპ მოდელი ამერიკულად“ მონაწილეობის შემდეგ დადგა, სადაც ტაირა ბენქსმა მიიწვია.მიუხედავად იმისა, რომ ვინიმ ვერ გაიმარჯვა, მან თავისი „ნაკლი“ უნიკალურ მახასიათებლად აქცია და საერთაშორისო ყურადღება ვიტილიგოსკენ მიმართა. შოუს დასრულებისთანავე ვინის კარიერამ სწრაფი აღმავლობა დაიწყო. მალე ის Desigual სახე გახდა და შემდეგ სხვა მსხვილ კომპანიებთან, მათ შორის Diesel-თან და Swarovski-სთან, თანამშრომლობა დაიწყო. მოდელმა არაერთხელ აღნიშნა, რომ ფიზიკური მახასიათებელი არ უნდა გახდეს დაბრკოლება მიზნის მისაღწევის გზაზე.
როზი ჰანტინგტონ უიტლი
როზი თხუთმეტი წლის იყო, როდესაც თავისი ფოტოები ყველა სამოდელო სააგენტოს გაუგზავნა. თავიდან მოდის ინდუსტრიის რეაქცია თავშეკავებული იყო – ერთ-ერთმა გოგონა მხოლოდ ერთკვირიან სტაჟირებაზე ასისტენტად და არა მოდელად მიიწვია, თუმცა, იმ კვირის ბოლოს უკვე მასთან შრომითი ხელშეკრულება დადო. სააგენტომ როზის პოტენციალი შენიშნა და პირველი პროფესიონალური ფოტოები გადაიღო.
მისი პრერაფაელიტების მსგავსი სახე და სავსე ტუჩები, რომლის გამოც სკოლაში დასცინოდნენ, მოდის სამყაროში შესასვლელი ბილეთი გახდა. მისი პირველი მნიშვნელოვანი წარმატება Levi’s-თან კონტრაქტი იყო, რასაც Teen Vogue-ის გარეკანისთვის ფოტოსესია მოჰყვა. 2006 წელს როზი Victoria’s Secret-ის გუნდს შეუერთდა. მისმა გამორჩეულმა სილამაზემ, რომელიც ბავშვურ ნაკვთებს ქალურ ფიგურასთან აერთიანებდა, ის ინდუსტრიის ერთ-ერთ ყველაზე მოთხოვნად სახედ აქცია. როზიმ დაამტკიცა, რომ არასტანდარტულ ნაკვთებს შეუძლიათ ახალი, სასურველი იმიჯი შექმნან.
მარიან იონკმანი
მარიანი პოდიუმზე მოდელების ახალი, თანამედროვე თაობის სახეს წარმოადგენს, რომელიც სტერეოტიპებს ებრძვის. მისმა გარეგნობამ მოდის სამყაროში არაერთგვაროვანი რეაქცია გამოიწვია, თუმცა, თავად მარიანისთვის ეს დისკუსიები მეორეხარისხოვანი იყო.
თავისი უნიკალურობის მიღებით, მან წარმატებული კარიერის შექმნა შეძლო. 2018 წლიდან მუდმივად მსოფლიოს 50 საუკეთესო მოდელს შორისაა. მისი მონაწილეობა Saint Laurent-ის პარიზსა და ნიუ-იორკში ჩვენებებში იმის დასტურია, რომ ინდუსტრიამ მისი ატიპიური, გამორჩეული სილამაზე სრულად მიიღო. მისი გზა ევოლუციის ბოლო ეტაპს განასახიერებს, როდესაც უნიკალურობა გამოწვევა აღარაა და ნორმად და ღირებულებად იქცა.
დღეს მოდის სამყაროს წარმატებით იპყრობენ ადამიანები, რომლებსაც ადრე ამ სფეროში მოხვედრაზე ოცნებაც კი არ შეეძლოთ. არატრადიციული გარეგნობის მოდელები სტერეოტიპებს ამსხვრევენ და ამტკიცებენ, რომ ყველაფრის მიუხედავად, შეუძლიათ ლამაზები, სასურველები და მოთხოვნადები იყვნენ.
ასევე დაგაინტერესებთ
