შემოდგომა წელიწადის განსაკუთრებული დროა, როცა გარეთ ხშირად წვიმს და ჰაერი სველი ფოთლების სურნელით იჟღინთება. ასეთ დროს გინდა, თბილ პლედში გაეხვიო, საყვარელ ფინჯანში ცხელი ჩაი დაისხა და საღამო კარგი ფილმის ყურებაში გაატარო. შემოდგომის ფილმებს განსაკუთრებული ხიბლი აქვთ. მათი ამოცნობა ადვილია – ოქროსფერი ფოთლები წვიმიან ქუჩებში და სუსტი შუქი სახლის ფანჯრებში. მათ ყოველთვის სევდისა და სითბოს ელფერი ახლავს – სწორედ ის გრძნობა, რომელიც საშემოდგომო განწყობის მქონე ფილმების ძებნას გვაიძულებს. გთავაზობთ 5 ფილმს, რომელიც შემოდგომის საღამოს გაგილამაზებთ.
შემოდგომა ნიუ–იორკში
2000 წელი. აშშ. რეჟისორი – ჯოან ჩენი
თუ გინდათ შემოდგომის ნიუ-იორკის ხედებით დატკბეთ, ფილმის გმირებთან ერთად ცენტრალურ პარკში გაისეირნოთ, ოქროსფერ ფოთლებში ირბინოთ, მარადისობაზე იფიქროთ და მახლობლად მდებარე კაფეში ცხელი ყავა მიირთვათ, ეს ფილმი უნდა ნახოთ. მომხიბვლელი ახალგაზრდა შარლოტას (უაინონა რაიდერი) და ქალთა გულისმპყრობლის, უილ კინის (რიჩარდ გირი) შემთხვევითი შეხვედრა მალე დიდ გრძნობად იქცევა, თუმცა, შემოდგომის რომანტიკული ატმოსფეროს მიუხედავად, ფილმის ბედნიერი დასასრულის იმედი არ უნდა გქნდეთ.
საიდუმლო ტყე
2004 წელი. აშშ. რეჟისორი შიმამალანი
ტყის შუაგულში მდებარე სოფელი კოვინგტონი ჩაკეტილი ცხოვრებით ცხოვრობს. სოფლის მაცხოვრებლები დარწმუნებულნი არიან, რომ ტყეში მითიური არსებები ბინადრობენ. მათთან დადებული შეთანხმების თანახმად, მხარეებმა ერთმანეთის ტერიტორიას და ინტერესებს პატივი უნდა სცენ, მაგრამ ყველაფერი იცვლება, როდესაც სოფლის ერთ-ერთი მაცხოვრებელი ტყეში შესვლას გადაწყვეტს.
ფილმის ფინალი სრულიად მოულოდნელია, მაგრამ მთავარი ისაა, რომ სურათი მთლიანად შემოდგომის განწყობით არის გაჟღენთილი – ყვითელი ტონებით და საიდუმლოებით სავსე ტყით.
დიდი თევზი
2003 წელი. აშშ. რეჟისორი ტიმ ბერტონი
ფილმი დენიელ უოლესის რომანის მიხედვით არის გადაღებული. მომაკვდავი მამის სანახავად მშობლიურ ქალაქში ჩასული ფილმის გმირი ცდილობს საკუთარი მშობელი უკეთ გაიცნოს. ის აგროვებს ამბებს, ლეგენდებს, მითებს, რომლებიც მამის მიერაა მოფიქრებული სხვადასხვა ფაქტზე დაყრდნობით. ნამდვილად არსებობდა თუ არა გიგანტი ადამიანი, იდუმალი ქალაქი მირაჟი და მოუხელთებელი დიდი თევზი? და საერთოდ, აქვს კი ამას მნიშვნელობა?
ეს არის ფილმი იმაზე, რომ ისტორია არასდროს მთავრდება, სანამ არსებობენ ადამიანები, რომლებსაც მისი სჯერათ.
დედინაცვალი
1998 წელი. აშშ. რეჟისორი კრის კოლამბუსი
ეს არის ფილმი საკუთარ თავისა და სხვების მიღებაზე – ყველა პრობლემით, ტკივილითა და შიშით. ჯულია რობერტსისა და სიუზან სარანდონის დუეტი საოცრად ემოციურ ფსიქოლოგიურ თამაშს გვთავაზობს. ერთი დედა და ყოფილი მეუღლეა, მეორე კი დედინაცვალი. მათ შორის დგას მამაკაცი, რომელიც ორივეს სხვადასხვანაირად უყვარს და მისი შვილები.
ეს არის ამაღელვებელი ისტორია იმის შესახებ, როგორ უნდა ვისწავლოთ სიყვარული იმ ადამიანის მიმართაც კი, რომელიც თავიდან სრულიად უცხოდ გვეჩვენება.
მთვლემარე ხეობა
2007 წელი. აშშ. რეჟისორი ტიმ ბერტონი
შემოდგომის საღამო საუკეთესო დროა ცოტა საშიში ისტორიებისთვის, და ეს ფილმი სწორედ ასეთია.
1799 წელს ახალგაზრდა ნიუ-იორკელ პოლიციელს იდუმალი მკვლელობების გამოსაძიებლად აგზავნიან. ადგილობრივი მოსახლეობის თქმით, ყველა მსხვერპლი უთავო მხედრის მახვილით დაიღუპა. პოლიციელი უნდა დარწმუნდეს, რომ ეს ლეგენდა კი არა, საშინელი სიმართლეა. აშკარა ხდება, რომ მკვლელი სხვა სამყაროდანაა, რომ დანაშაულში ჯადოქრები და სხვა ბოროტი სულები მონაწილეობენ. ცხენოსანს ტყვია არ კლავს. ის ყველას ამარცხებს, მაგრამ რა არის მისი სისასტიკის მიზეზი?
მისტიკური ლეგენდის ტიმ ბარტონისეული ინტერპრეტაცია საშუალებას გვაძლევს შემოდგომის ბურუსითა და სევდით სავსე ატმოსფეროში მთლიანად ჩავეფლოთ.
