2026 წლის ზამთრის ოლიმპიური თამაშების ცერემონია გაიხსნა მილანის სან სიროს სტადიონზე და პრეცადოს, ლივინიოსა და კორტინა დ’ამპეცოს არენებზე გამართული ღონისძიებებით.
გახსნის ცერემონიის მნიშვნელოვანი მოვლენა იყო- ერების აღლუმი, რომელშიც მსოფლიოს სხვადასხვა ქვეყნის სპორტსმენი მონაწილეობდა და ტრადიციული ოლიმპიური ცეცხლის ანთება.
სადღესასწაულო ღონისძიებისას სცენაზე გამოვიდნენ ისეთი ცნობილი სახეები, რომლებიც არიან: მერაია კერი, ლაურა პაუშინი, ანდრეა ბოჩელი, მატილდა დე ანჯელისი და საბრინა იმპაჩიორე HBO-ს შოუ ,,თეთრი ლოტოსი’’-დან.
ცნობილმა ამერიკელმა პოპვარსკვლავმა მერაია ქერიმ შეასრულა დომენიკო მოდუნიოს და ფრანკო მილიაჩის ცნობილი სიმღერა Nel blu, dipinto di blu, რომელიც მეტად ცნობილია, როგორც Volare.
იტალიელმა მსახიობმა საბრინა იმპაჩიორემ ცეკვის ნომერი წარაგინა დასთან ერთად, რომელიც მონაცვლეობით ჰოკეის მოთამაშეებად და 1980-იანი წლების ფერად სათხილამურო ფორმებში იყვნენ გამოწყობილნი, რაც ზამთრის ოლიმპიადის 100 წლის იუბილეს მიეძღვნა. წარმოდგენის დროს მსახიობმა მაყურებელს რამდენიმე იტალიური კლასიკური ნაწარმოები გააცნო, მათ შორის ადრიანო ჩელენტანოს 1972 წლის ჰიტი ,,Prisencolinensinainciusol’’.
მილანო-კორტინას ზამთრის ოლიმპიურ თამაშებზე 92 მონაწილე ქვეყნის 2900-ზე მეტი სპორტსმენი მიიღებს მონაწილეობას. ოლიმპიურ თამაშებზე ყველაზე მეტი სპორტსმენი, კერძოდ კი 230-ზე მეტი მოთამაშე წარმოდგენილი იქნება აშშ-დან, კანადიდან 210 მოთამაშე, ხოლო მასპინძელი ქვეყნის- იტალიის მონაწილეთა რაოდენობა 196-ს შეადგენს.
ოლიმპიური ცეცხლი ალპური სათხილამურო რბოლის ჩემპიონებმა აანთეს-მილანში ალბერტო ტომბამ და დებორა კომპანიონმა, ხოლო კორტინაში სოფია გოჯიამ, იტალიის რესპუბლიკის პრეზიდენტმა, სერჯიო მატარელამ კი თამაშები მილანო-კორტინაში ოფიციალურად გახსნილად გამოაცხადა. ოლიმპიური თამაშების ოფიციალურად გახსნას მოჰყვა ანდრეა ბოჩელის ამაღელვებელი შესრულება “Nessun dorma”– ამის პარალელურად კი სან სიროში ოლიმპიური ჩირაღდანი მიიტანეს. ამასთან, კირსტი კოვენტრი, საერთაშორისო ოლიმპიური კომიტეტის პირველი ქალი პრეზიდენტი, გახდა პირველი ქალი, რომელმაც ოლიმპიური თამაშები ოფიციალურად გახსნილად გამოაცხადა.
ოლიმპიური დროშა მილანსა და კორტინაში ჩირაღდნების დანთებამდე ჩავიდა. მილანში დროშა რვა ადამიანს ეჭირა – მათ შორის ოლიმპიელებს: ელიუდ კიპჩოგეს, რებეკა ანდრადეს, სინდი ნგამბას და პიტა ტაუფატოფუას. კორტინაში ოლიმპიური დროშის ტარება ფრანკო ნონესსა და მარტინა ვალჩეპინას დაევალათ.
სტადიონის შუაგულში ოლიმპიური სიმბოლო ხუთ რგოლად შეიკრა, შემდეგ კი სანახაობა ოლიმპიური გუნდების აღლუმით გაგრძელდა. სცენაზე პირველი გამოვიდა ოლიმპიური თამაშების ფუძემდებელი საბერძნეთი და დასრულდა მასპინძელი იტალიის აღლუმით. ოლიმპიური დროშა ოლიმპიური ჰიმნის თანხლების პარალელურად აღიმართა მილანში და კორტინა დ’ამპეცოში. საზეიმოდ დაიდო ოლიმპიური ფიცი.
ოლიმპიადაზე საქართველოს სახელით 8 სპორტსმენი სპორტის 2 სახეობაში -ფიგურულ სრიალსა და სამთო თხილამურობაში იასპარეზებს. გახსნის ცერემონიაზე მილანში საქართველოს მედროშეები იყვნენ მოციგურავეები: ლუკა ბერულავა და დიანა დევისი, ხოლო კორტინაშში ლუკა ბეჩუკური და ნინო წიკლაური.
შეგახსენებთ, რომ ოლიმპიურ თამაშებზე საქართველოს დელეგაციას ოლიმპიური კომიტეტის პრეზიდენტი, ოლიმპიური ჩემპიონი ლერი ხაბელოვი უხელმძღვანელებს, ოლიმპიურ სოფელში მისიის ხელმძღვანელი ფიგურული ციგურაობის ფედერაციის პრეზიდენტი, სეოკ-ის აღმასრულებელი კომიტეტის წევრი მარიამ გიორგობიანი იქნება.
გახსნის ცერემონიის დროს მსახიობი შარლიზ ტერონი, რომელიც ასევე გაეროს მშვიდობის ელჩია, სიტყვით გამოვიდა, რომელიც სამხრეთ აფრიკის მოღვაწის, ნელსონ მანდელას მიერ იყო შთაგონებული:
„მშვიდობა მხოლოდ კონფლიქტის არარსებობა არ არის“, – თქვა მან. „მშვიდობა ისეთი გარემოს შექმნაა, სადაც ყველას შეუძლია აყვავება, რასის, კანის ფერის, მრწამსის, რელიგიის, სქესის, კლასის ან სხვა სოციალური განსხვავების ნიშნების მიუხედავად“.
გახსნის ცერემონიის ფარგლებში პატივი მიაგეს ლეგენდარული იტალიელი დიზაინერის, ჯორჯო არმანის ხსოვნას, რომელიც 2025 წლის სექტემბერში გარდაიცვალა. მოდელებმა არმანისთვის დამახასიათებელი თავისუფალი დგომის ფორმები წარმოადგინეს წითელ, თეთრ და მწვანე ფერებში, რითაც იტალიის დროშა სიმბოლურად გაცოცხლდა. არმანი მრავალი წლის განმავლობაში ქმნიდა იტალიის ოლიმპიური ნაკრების ფორმებს. სწორედ ამ ტრადიციისა და მემკვიდრეობის გაგრძელებად, სან-სიროს სტადიონზე, 2026 წლის ზამთრის ოლიმპიური თამაშების გახსნის ცერემონიის ფარგლებში, გაიმართა Giorgio Armani-ის სპეციალური ჩვენება.
ლეგენდარული იტალიელი დიზაინერის, ჯორჯო არმანის, ხსოვნისადმი მიძღვნილ ჩვენებაზე, რომელიც ათასობით მაყურებლის წინაშე გაიმართა, 20 წლის ცნობილი ქართველი მოდელი მაკო (მარიამ) მაჭავარიანი წარსდგა.
ოლიმპიურ თამაშებში მონაწილეობას პირველად მიიღებენ არაბთა გაერთიანებული საამიროებისა და ბენინის სპორტსმენები. არაბთა გაერიანებული საამიროებს წარმოადგენენ ალპური მოთხილამურეები 19 წლის ალექსანდერ ასტრიჯი და 29 წლის პიერა ჰადსონი, ხოლო ბენინს წარმოადგენს ასევე ალპური მოთხილამურე ნეთან ჩიბოზო.
ასევე დაგაინტერესებთ
