ჩარლზ რენე მაკინტოში ცნობილი შოტლანდიელი არქიტექტორი, მხატვარი, აკვარელისტი, მოქანდაკე, დიზაინერი და ასევე, ბრიტანეთის გაერთიანებულ სამეფოში არტ ნუვოს მთავარი წარმომადგენელია. მან მნიშვნელოვანი გავლენა მოახდინა ევროპულ დიზაინზე. მაკინტოში იყო ყველაზე საინტერესო დიზაინერი, რომელიც მუშაობდა არტ ნუვოში, ძალიან დიდი მემკვიდრეობა დატოვა და დღევანდელი დიდი დიზაინერები სწორედ ამ მემკვიდრეობით იკვებებიან.
ცხოვრების უმეტესი ნაწილი მან გლაზგოში გაატარა. ქალაქი მდებარეობს მდინარე კლაიდის სანაპიროს გასწვრივ. ინდუსტრიული რევოლუციის დროს, ქალაქს ჰქონდა მსოფლიოში ერთ-ერთი უდიდესი მძიმე ტექნიკის წარმოება და გემთმშენებლობა. ქალაქი გაიზარდა და აყვავდა, რასაც მოჰყვა სწრაფი რეაგირება სამომხმარებლო საქონლის წარმოებისა და ხელოვნების განვითარების სახით. დიდი პოპულარობა მოიპოვა მასობრივი წარმოების საგნებმა.
ინდუსტრიულ რევოლუციასთან ერთად, მაკინტოშის დიზაინზე უდიდესი გავლენა იქონია აზიურმა სტილმა და მოდერნისტულმა იდეებმა. როდესაც გლობალიზაციის შედეგად იაპონიის იზოლაციონისტური რეჟიმი შერბილდა, იაპონელებმა მსოფლიოს საკუთარი კულტურა გაუხსნეს. იაპონური დიზაინიც დიდად პოპულარული გახდა. გლაზგოს განსაკუთრებით მჭიდრო კავშირს ამ აღმოსავლურ ქვეყანასთან განსაზღვრავდა გემთმშენებლობა. იაპონური დიზაინი უფრო ხელმისაწვდომი გახდა დასავლური სამყაროსთვის და საყოველთაო აღტაცება მოიპოვა. ამ გატაცებამ იმდენად მოიცვა ყველა, რომ გაჩნდა ახალი ტერმინი − იაპონიზმი. ამ სტილს მაკინტოშიც ეთაყვანებოდა, თავშეკავებულობისა და მხატვრული ენის სისხარტის, მარტივი ფორმებისა და ბუნებრივი მასალების გამოყენების, ფაქტურისა და მსუბუქი შუქ-ჩრდილის გამო. დასავლური სტილის ავეჯი განიხილებოდა როგორც სამშვენისი, რომელშიც ჩანს მფლობელის სიმდიდრე და ნივთის მაღალი ღირებულება იმის მიხედვით, თუ რამდენად დიდხანს იქმნებოდა იგი. იაპონური ავეჯის დიზაინი ყურადღებას ამახვილებს ორგანულ კავშირზე იმ სივრცესთან, სადაც ავეჯი უნდა იდგეს და სადაც სიმყუდროვისა და სიმშვიდის შეგრძნება უნდა შექმნას.
