რას ნიშნავს, იყო მებაღე და რა დატვირთვა აქვს თქვენთვის? როდესაც ამ პროფესიას ირჩევთ, ბუნების სამსახურში დგახართ თუ ადამიანის?
იყო მებაღე, ნიშნავს იყო მადლიერი ადამიანი. არ შეიძლება იცხოვრო მცენარეებთან ერთად და არ გქონდეს გული მადლიერების გრძნობით სავსე, იყო მადლიერი გამჩენის, რომ ამ სამყაროს ნაწილი ხარ და გაქვს უფლება ცოტათი მაინც შეცვალო ირგვლივ გარემო, გაამშვენო, გაალამაზო, გააცოცხლო, გააფერადო.
როცა ჩვენ ვზრუნავთ მცენარეებზე, ნიშნავს თუ არა ეს იმას, რომ ვზრუნავთ საკუთარ თავზე? როგორ უნდა მივაღწიოთ ჰარმონიას?
როცა მცენარეზე ზრუნავ, რა თქმა უნდა ეს ნიშნავს, რომ ზრუნავ ადამიანზე, გარემოზე, საკუთარ თავზე. ჩვენ იმ დიდი სამყაროს ნაწილი ვართ, სადაც მცენარეს გადამწყვეტი როლი აქვს, მაგრამ ხშირად ეს გვავიწყდება. მცენარეები ხშირად უფრო ლმობიერები არიან ერთმანეთის მიმართ, ვიდრე ადამიანები.
რა უნდა გავაკეთოთ ყოველდღიურად, რომ შევცვალოთ ეკოლოგია უკეთესობისკენ?
ზომიერად უნდა ვიურთიერთოთ სამყაროსთან. მიწისგან, ტყისგან, გარემოსგან მხოლოდ კი არ უნდა მივიღოთ, გავცეთ კიდეც. იმდენი მაინც უნდა შევძლოთ, თუ იქით ვერაფერს მივცემთ, აქეთ არ წავართვათ ბუნებას. ბევრს კი არაფერს ითხოვს ჩვენგან − მთავარია უხეშად არ ჩავერიოთ, და თავის თავს თვითონ მიხედავს.
გვესაუბრეთ ბაღებზე, რომლებიც სხვა ქვეყნებში მოგზაურობისას აღმოაჩინეთ და თქვენი შთაგონების წყარო გახდა.
გამორჩეულია საფრანგეთში, სოფელ ჟივერნიში კლოდ მონეს ბაღი; ინგლისში ბევრი ბაღია, რომლის მონახულებაც დიდი სიამოვნებაა − ბრიტანელების ბაღები განუმეორებელია. ირანშიც, თუ გაგიმართლებთ და ნამდვილი მებაღე იქნება თქვენი მასპინძელი, დაუვიწყარი შთაბეჭდილებაა აღმოსავლური, დახურული ბაღები ფორთოხლის ხეებით, ფარშევანგებით, ბროწეულით, ნუშის ხეებით და შუაში აუცილებლად შადრევნით. ვეთაყვანები გერმანიაში არენსების გვარის დინასტიის ძველ სანერგეს, რომელსაც ახლა მათი შვილიშვილი − ფრაუ მაუბახი უვლის.
როგორია თქვენთვის იდეალური ბაღი? როგორ უნდა დავიწყოთ მისი გაშენება?
ადამიანი ბუნებაზე უკეთ ვერც ფერებს დაალაგებს, ვერც შეახამებს მცენარეებს და ვერც სეზონების მიხედვით ააწყობს კომპოზიციას, ამიტომ ბაღი მით უფრო მომხიბვლელი და შთამბეჭდავია, რაც უფრო ბუნებასთან მიახლოებული და მიმსგავსებულია. კარგი და გონიერი მებაღის ოსტატობაც იმაში გამოიხატება, რომ მაგალითები ბუნებიდან აიღოს. ბევრი ბაღი მინახავს, ბევრი ძალიან საინტერესო მებაღეებიც გამიცნია, მათი ნამუშევრით აღვფრთოვანებულვარ, და ბოლოს ამ დასკვნამდე მივედი.
ბაღისადმი ადამიანის ინტერესი და ბაღის გაშენების სურვილი, სამოთხეში დაბრუნების მცდელობას უკავშირდება. ადამიანმა სამოთხეში ადგილი თავისი შეცდომების გამო დაკარგა. ბაღის შექმნა კი იმ სამოთხეში დაბრუნების მცდელობაა, ზოგჯერ − შედეგიანიც.
ტექსტი: ირმა შარიქაძე
ფოტო: ირმა შარიქაძე/ნათია მახათაძე
