#OK! „პო“ – აზიური სამზარეულო ეპიკური მოგზაურობა აზიაში

„პო“ გახლავთ აზიური, სწრაფი კვების რესტორანი, რომელიც ამჟამად წარმოდგენილია თბილისში, ოთხი ფილიალით. დღის ნებისმიერ მონაკვეთში შეგიძლიათ ესტუმროთ მათ რესტორნებს ან ისარგებლოთ მათივე მიტანის სერვისით, „პო“ კი უნიკალური გემოს დამსახურებით გამოგზაურებთ ჯადოსნურ აზიაში. მათი კერძები მზადდება ყოველდღიურად ახალი, უმაღლესი ხარისხის ნედლეულით, მენიუ გამოირჩევა მრავალფეროვნებითა და ადგილზე დამზადებული ატრიისა თუ სოუსების ფართო ასორტიმენტით. დეტალური ინფორმაციის მისაღებად, OK! გაესაუბრა „პოს“ დირექტორს, მარიამ გრძელიშვილს.

მარიამ, გვიამბეთ, როგორ გაჩნდა „პოს“ შექმნის იდეა.

„პოს“ დამფუძნებლები ხშირად სტუმრობდნენ სხვადასხვა ქვეყანას საქმიანი ვიზიტით, მათ განსაკუთრებულ ყურადღებას კი აზიური სამზარეულო იპყრობდა. ერთგვარი ჰობი მალე ახალ ბიზნესიდეად ჩამოყალიბდა და მიღებული მრავალფეროვანი გამოცდილებით შეძლეს ქართველი მომხმარებლისათვის ჯერ კიდევ უცხო, საუკეთესო აზიური კერძები შეეთავაზებინათ. 2018 წელს თბილისში ჩვენი პირველი ფილიალის გახსნას მომხმარებლების მხრიდან დიდი ინტერესი მოჰყვა და სულ მალე უკვე დიდი პოპულარობითაც სარგებლობდა. მოთხოვნის ზრდამ გვიბიძგა გაგვეფართოებინა წარმოება და დღესდღეობით „პო“ ოთხი ფილიალით გახლავთ წარმოდგენილი ბაზარზე.

მომხმარებლის ნდობის მოპოვება ჩვენს ერთ-ერთ მთავარ ღირებულებას წარმოადგენს. სწორედ ამიტომ, ე.წ. ღია სამზარეულო ჩვენი ფილიალების მთავარი კონცეფცია გახდა, რაც თითოეულ მომხმარებელს აძლევს შესაძლებლობას, თვალი ადევნოს სრულ პროცესს – შეკვეთის მიღებიდან კერძის მომზადებამდე.

დამეთანხმებით, პროფესიონალი შეფების გარეშე შეუძლებელია შექმნა იდეალური გემო. სწორედ ამიტომ, ჩვენ დიდი ყურადღებით ვარჩევთ მათ და ძალიან ვამაყობთ, რომ „პო“ საუკეთესო მზარეულების ერთგვარ ნავსაყუდლად იქცა. თამამად შეგვიძლია განვაცხადოთ, რომ ჩვენი მზარეულების მიერ მომზადებული კერძები უეჭველად მოგაგონებთ სადღაც, ტაილანდსა თუ ვიეტნამში განცდილ გემოს.

გაგვაცანით თქვენი მენიუ.

ჩვენი მენიუ უჩვეულო მრავალფეროვნებით გამოირჩევა. წარმოდგენილი გვაქვს როგორც ატრიის (ე.წ. ნუდლსის), ასევე წვნიანების, სალათების, როლების, სუშის, გარნირების ფართო არჩევანი. ჩვენს მენიუში შეხვდებით ისეთ კერძებს, როგორიცაა: ფად თაი, სფინგ როლი, ტომ იამი, ქათმის მკერდი/ფრთები ტაილანდურად, საქონლის ხორცი ვიეტნამურად და უამრავი სხვა საინტერესო აზიური კერძი.

აღსანიშნავია, რომ ჩვენი მენიუ მაქსიმალურად არის ადაპტირებული მომხმარებლის გემოვნებასთან. ე.წ. ვოკ მენიუს შეძენისას, მომხმარებელს აქვს შესაძლებლობა, აირჩიოს მისთვის სასურველი ინგრედიენტები: გარნირი, სოუსი, ხორცის სახეობა, ბოსტნეული, ტოპინგი.

ვინაიდან აზიური სამზარეულოს ერთ-ერთი მთავარი ხიბლი სოუსებში იმალება, ჩვენ მათ მომზადებაზე დიდ დროსა და რესურსს ვხარჯავთ. ამჟამად მენიუში წარმოდგენილია ცხრა სახეობის სოუსი, როგორიცაა მაგალითად: ოსაკა, კიოტო, „პოს“ საფირმო სოუსი, სეული, მეხიკო და ა.შ.

ასევე აღსანიშნავია, რომ ატრია ჩვენს საწარმოში, ადგილზე მზადდება და სწორედ ეს ანიჭებს მას გამორჩეულობას. განსაკუთრებული ყურადღებით ვარჩევთ კერძებში გამოყენებულ ხორცსა და ზღვის პროდუქტებს, გარდა ამისა, არც ვეგეტარიანელ მომხმარებლებს ვტოვებთ უყურადღებოდ და მათთვისაც გვაქვს არაერთი დასახელების გემრიელი კერძი.

ჩვენს მენიუში განსაკუთრებულ ადგილს იკავებს იაპონური სუში. ეს მიმართულება დიდი ხანი არ არის, რაც დავამატეთ და უკვე დიდი მოთხოვნით სარგებლობს. ჩვენთვის უპირატესია, მომხმარებლებს შევთავაზოთ უმაღლესი ხარისხისა და გემოვნური თვისებების მქონე კერძები.

რით გამოირჩევა „პო“ კონკურენტებისგან?

„პო“ გამოირჩევა ადგილზე დამზადებული ატრიისა და სოუსების დიდი არჩევანით. მომხმარებლებს აქვთ შესაძლებლობა, „ვოკ მენიუ“ საკუთარი გემოვნებით შეუკვეთონ ან შეარჩიონ მზა რეცეპტით მომზადებული კერძები. ნიშანდობლივია, რომ ჩვენ კერძების მოსამზადებლად რამდენიმე წუთი გვჭირდება. შესაბამისად, ლანჩზე გასულ მომხმარებელს შეუძლია შეუკვეთოს და სწრაფად მიიღოს სასურველი კერძი.

სულ რამდენიმე კვირაა შევქმენით ჩვენი აპლიკაცია, რომელიც მომხმარებლებს აძლევს შესაძლებლობას, ისარგებლონ ჩვენი უფასო მიტანის სერვისით და ე.წ. ქეშბექის საშუალებით, გადახდილი თანხის ნაწილი დაიბრუნონ.

კიდევ რა სახის სერვისებს სთავაზობთ მომხმარებლებს?

„პო“ მომხმარებლებს სთავაზობს მაქსიმალურად გამარტივებულ საკომუნიკაციო საშუალებებს. მათ შეუძლიათ დაგვიკავშირდნენ ცხელ ხაზზე, შეუკვეთონ აპლიკაციით, მოგვწერონ ჩვენს სოციალურ ქსელებში. ჩვენ მაქსიმალურად ვცდილობთ ინდივიდუალურად გავითვალისწინოთ მომხმარებლის გემოვნება და შევურჩიოთ მისთვის სასურველი კერძი. ამასთან, დიდ ყურადღებას ვაქცევთ შეფუთვას, ზედმიწევნით ვიცავთ ეტიკეტის ნორმებს, რათა ჩვენი მომხმარებლებისათვის მაქსიმალურად კომფორტული იყოს ნებისმიერ სივრცეში კერძის მირთმევა.

რას გვეტყვით თქვენი სამომავლო გეგმების შესახებ?

ბოლო დროს ძალიან გაიზარდა მოთხოვნა ჩვენი ფილიალების რეგიონებში გახსნასთან დაკავშირებით, რაც ჩვენს სამომავლო გეგმებზეც აისახება. პანდემიის დამარცხების შემდეგ, უფრო აქტიურად შევძლებთ ამ მიმართულებით მუშაობას. უახლოეს მომავალში კი ვგეგმავთ თბილისში კიდევ ორი ახალი ფილიალის გახსნას, დანარჩენ დეტალებს კი სიურპრიზად დავტოვებთ.

მისამართები:

თბილისი

პეტრე ქავთარაძის ქუჩა #37 ა;

ბახტრიონის ქუჩა #11 ბ;