„ატელიე არშიას“ ისტორია მრავალ წელს ითვლის და ყოველი ახალი დღის მიმართ მეტი ამბიციითა და იდეით სავსე მიდგომა აქვს. მთავარი მიზანი კი მომხმარებლებისთვის მრავალფეროვანი, ხარისხიანი და განსხვავებული პროდუქტის შეთავაზებაა. როდიდან დაიწყო „არშიამ“ ბაზარზე ოპერირება, როგორ გაჩნდა იდეა, და სხვა საინტერესო თემებზე, OK!-ის ატელიეს დამფუძნებლები − ლელა და თეა წიკლაურები უამბობენ.
როდიდან დაიწყო „ატელიე არშიამ“ ბაზარზე ოპერირება?
ლელა პროფესიით ფიზიკოსია, თუმცა ბავშვობიდანვე გატაცებული იყო ხატვითა და მოდით. 1997 წლიდან, მისი სადებიუტო გამოსვლიდან დღემდე, ჰობის თავისი ძირითადი საქმიანობის სახე შესძინა. 2004 წელს „მის საქართველოს“ კონკურსზე წარდგენილი იყო მისი ნამუშევრები, რისთვისაც მიანიჭეს ნომინაცია − „ყველაზე ელეგანტური“, და მას შემდეგ ბევრმა შეიყვარა ლელა წიკლაურის საქორწილო და საღამოს კაბები. უკვე წელიწადზე მეტია, რაც ბრენდი „არშია“ ჩამოვაყალიბეთ და ამ სახელით ვოპერირებთ ქართულ ბაზარზე.
როგორ გაჩნდა იდეა?
როგორც ვახსენე, ამ ბაზარზე დიდი ხანია რაც ვარსებობთ და მრავალი წლისა და გამოცდის შემდეგ მივხვდით, რომ გამორჩეული და საინტერესო პროდუქტისთვის უბრალოდ სახელი და გვარი არ კმარა. ყველაფერი დაიწყო საქორწილო და საღამოს კაბების მოდის დიზაინით, თუმცა პანდემიის გამო, სხვა აუცილებლობები გაჩნდა. ამიტომ, საჭიროსა და საიმედოს, კომფორტი და სილამაზეც შევძინეთ. აქედან გაჩნდა ჩვენი პირბადეების იდეაც, რომელიც სილამაზესთან ერთად, დაცვის ფუნქციითა და კომფორტულობით გამოირჩევა.
ნიშა, რომელიც სხვებისგან გამოგარჩევთ…
„არშია“ არ არის უბრალოდ ატელიე, რომელიც სამოსის ვორქშოფად შეიძლება მივიჩნიოთ. ეს არის სრულფასოვანი და დამოუკიდებელი მოდური ხელოვნების ბრენდი, რომელიც ზრუნავს კომფორტზე, ესთეტიკასა და პრაგმატულობაზე. ამ სამი თვისებიდან ჩვენ არ ვაკეთებთ არც კომპრომისსა და არც არჩევანს. ჩვენს ყოველ პატარა ნივთს აუცილებლად ახლავს ეს სამი თვისება.
გვესაუბრეთ უპირატესობებზე.
ჩვენი უპირატესობაა მომხმარებლის თავისუფლება და ჩვენი მოქნილობა. რადგან სრულიად დამოუკიდებელი და არც ისე კორპორაციული ბუნება გვაქვს, შეგვიძლია ყურადღება უწყვეტად დავუთმოთ თითოეულ მომხმარებელს. შესაბამისად, ყოველ მათგანს შეუძლია დღის ნებისმიერ დროს დაგვიკავშირდეს და ზედმეტი ფორმალობის გარეშე, გვესაუბროს საკუთარ საჭიროებებსა და სურვილებზე.
გვიამბეთ „არშიას“ ხარისხზე.
ხარისხი „არშიას“ ფუნდამენტური თვისებაა. მრავალი გვიანი ღამე და ადრინდელი დილა ყოფილა, მხოლოდ იმისთვის, რომ ეს თვისება არ დაკარგულიყო. არ აქვს მნიშვნელობა, რამდენად დატვირთული ან თავისუფალია ატელიე − მთავარია ხარისხი.
მიტანის სერვისი…
პანდემიიდან გამომდინარე, ჩაკეტილ ქალაქში საკურიერო მომსახურების აუცილებლობა გაჩნდა და ჩვენი მომხმარებლისთვის ეს კომფორტიც გავითვალისწინეთ.
სამომავლო გეგმები…
სამომავლო გეგმები დიდი გვაქვს. ვიღებთ შემოთავაზებებს უცხოეთიდან. იმედს ვიტოვებთ, რომ შევძლებთ ჩვენი იდეების სრულად განხორციელებას.
