მსოფლიოში მეორე უმდიდრესი ადამიანი, ჯეფ ბეზოსი და ყოფილი ჟურნალისტი ლორენ სანჩესი ქორწილისთვის ემზადებიან, რომელიც ამ თვის ბოლოს გაიმართება და სამი დღის განმავლობაში, 24-დან 27 ივნისამდე გაგრძელდება.
წყვილი ამ მნიშვნელოვან დღეს ვენეციაში აღნიშნავს, ხოლო საზეიმო ცერემონია სან-ჯორჯო-მაჯორეს კუნძულზე, წმინდა გიორგის ეკლესიაში გაიმართება.
61 წლის ბეზოსი და 55 წლის სანჩესი 2023 წლის მაისში დაინიშნენ. წყვილმა ერთმანეთი მაშინ გაიცნო, როდესაც ჯეფ ბეზოსი თავისი კოსმოსური პროექტისთვის აეროგადაღების სპეციალისტს ეძებდა და მოყვარული პილოტი ლორენ სანჩესი აღმოაჩინა. ამ დროს სანჩესი ჰოლივუდის აგენტ პატრიკ უაიტსელზე იყო დაქორწინებული, ბეზოსს კი ცნობილ მწერალ მაკენზი სკოტთან 25 წლიანი ქორწინება აკავშირებდა.
2019 წელს ჯეფ ბეზოსის და მაკენზი სკოტის ქორწინება ოფიციალურად დაასრულდა. ეს ისტორიაში ერთ-ერთ ყველაზე ძვირადღირებული განქორწინება გახდა – შეთანხმების შედეგად მაკენზიმ Amazon-ის დაახლოებით 35,6 მილიარდი დოლარის აქციები მიიღო.
ბეზოსი და სკოტი ერთმანეთს საოცრად მშვიდად დაშორდნენ. ერთობლივ განცხადებაში ყოფილმა მეუღლეებმა ერთმანეთს ერთად გატარებული წლებისთვის მადლობა გადაუხადეს და აღნიშნეს, რომ მეგობრებად დარჩებიან და შვილებს ერთობლივად აღზრდიან. „მადლიერი ვარ წარსულისთვის და მოუთმენლად ველი მომავალს“, – დაწერა მაკენზიმ.
გავრცელებული ინფორმაციით, ჯეფ ბეზოსის და ლორენ სანჩესის ქორწილში დაახლოებით 200 სტუმარს ელოდებიან. მოწვეულთა შორის არიან: კიმ კარდაშიანი, ოპრა უინფრი, ლეონარდო დიკაპრიო, ორლანდო ბლუმი და მისი საცოლე კეტი პერი, ივანკა ტრამპი და მისი მეუღლე ჯარედ კუშნერი, ასევე აშშ-ის პრეზიდენტი დონალდ ტრამპი მეუღლესთან, მელანიასთან ერთად.
ღონისძიებებისათვის ბეზოსმა ვენეციის ხუთი საუკეთესო სასტუმრო დაიქირავა: Aman Venice, Danieli, Belmond Hotel Cipriani, St. Regis Venice და Gritti Palace.
Aman Canal Grand Hotel
სასტუმრო მე-16 საუკუნის ვენეციურ სასახლეში მდებარეობს. შენობაში ნახავთ სტუკოს დეკორაციებს, ფრესკებს, მარმარილოს კიბეებსა და ხის ჭერებს. კედლებზე აბრეშუმი ან ტყავია გადაკრული, რაც უძველესი ტრადიციის ნაწილს წარმოადგენს.
ბეზოსისა და სანჩესის სტუმრებისთვის ღია იქნება, როგორც სასახლის დარბაზები, ასევე რესტორანი Arva, სადაც მათ სეზონური პროდუქტებით მომზადებულ კერძებს შესთავაზებენ.
სასტუმროს წარმომადგენლების განმარტებით, Aman Venice სრულად დაცულია ტურისტული ნაკადებისგან და მაქსიმალურ კონფიდენციალურობას უზრუნველყოფს, რაც იმას ნიშნავს, რომ წყვილი და მათი სტუმრები ღონისძების განმავლობაში განმარტოებას შეძლებენ.
Danieli
Hotel Danieli სან – მარკოს მოედანთან ახლოს მდებარეობს და ყველაზე დიდი სასტუმროა იმ ხუთიდან, რომელიც ბეზოსმა დაი ქირავა. სასტუმრო სამ ისტორიულ შენობაშია განთავსებული. მთავარი შენობა – Palazzo Dandolo, მე-14 საუკუნეშია აგებული და ოდესღაც ვენეციელი დოჯების ოჯახს ეკუთვნოდა. დანარჩენი ორი შენობა მე – 19 და მე – 20 საუკუნეებს განეკუთვნება და ერთ დიდ კომპლექსად არის გაერთიანებული.
სასტუმროს სივრცეები გაფორმებულია ვენეციური გოთიკისა და ბაროკოს სტილში. შენობაში შემორჩენილია ორიგინალური კიბეები, ვიტრაჟები და ანტიკვარული კოლექციები.
Belmond Cipriani
Belmond Hotel Cipriani ჯუდეკას კუნძულზე მდებარეობს. ამ სასტუმროში მდებარეობს ქალაქში ერთადერთი ოლიმპიური აუზის ზომის ღია აუზი.
აუზის ირგვლივ ტერიტორია იდეალური სივრცეა წვეულებების მოსაწყობად. გარდა ამისა, სასტუმროში რამდენიმე რესტორანი მუშაობს და მათგან ერთი მიშლენის ვარსკვლავის მფლობელია.
Gritti Palace
სასტუმრო, რომელიც Aman Venice-ის მსგავსად, პირდაპირ გრანდ-კანალზე (დიდი არხი) დგას. შენობა მე – 15 საუკუნეს მიეკუთვნება. ისტორიულად, ის პიზანების ცნობილი არისტოკრატული ოჯახის წარმომადგენლებს ეკუთვნოდა, ხოლო მოგვიანებით ვენეციელი დოჯის, ანდრეა გრიტის საკუთრება გახდა. მე – 19 საუკუნეში შენობა სასტუმროდ გადააკეთეს.
სასახლის ისტორიულ დარბაზებში ტარდება კერძო სადილები, ფურშეტები და მიღებები. ინტერიერში შენარჩუნებულია ფრესკები, გობელენები, მინა და ანტიკვარული ავეჯი. სასტუმროს ხშირად იყენებენ პატარა ქორწილებისთვის, პრეზენტაციებისთვის, ხოლო ვენეციური კინოფესტივალის დროს აქ მაღალი რანგის ვარსკვლავები ჩერდებიან.
St. Regis
სასტუმრო ქალაქის ცენტრში, გრანდ – კანალის სანაპიროზეა. მიუხედავად ისტორიული არქიტექტურისა, შენობის შიგნით თანამედროვე და დახვეწილი დიზაინია.
სასტუმროს ერთ-ერთი მთავარი ლოკაციაა ტერასა Ginori. როგორც ვებსაიტზეა აღნიშნული, ეს სივრცე შესაფერისია ღია ცის ქვეშ გამართული წვეულებებისა და მცირე კონცერტებისთვის. სასტუმროდან იშლება ულამაზესი ხედები წმინდა მარიამის ბაზილიკაზე, აკადემიის ხიდსა და ლაგუნაზე.
