გაეროს მოსახლეობის ფონდის (UNFPA) საქართველოს ოფისის და არასამთავრობო ორგანიზაციის „ვიზრუნოთ ერთად“ სოციალური კამპანიის „კაცები ზრუნავენ“ მიზანია, წაახალისოს კაცების, როგორც მზრუნველი მამებისა და მეუღლეების ჩართულობა ოჯახური კეთილდღეობისა და შვილებზე ზრუნვის საკითხებში, რათა მამაკაცებმა უფრო აქტიურად დაუჭირონ მხარი ქალთა თანასწორობას და თანაბრად გაინაწილონ საოჯახო საქმე.
OK! „კაცები ზრუნავენ“ წარმოგიდგენთ კამპანიაში ჩართულ კაცებს – მამებს, რომელთათვისაც გენდერული თანასწორობა, მზრუნველობა, ჯანსაღი გარემოს შექმნა და პასუხისმგებლობის განაწილება მნიშვნელოვან ღირებულებას წარმოადგენს.
კამპანია „კაცები ზრუნავენ“ ხორციელდება შვედეთის მთავრობისა და ევროკავშირის ფინანსური მხარდაჭერით.
ტექსტის შინაარსი წარმოადგენს ავტორების პასუხისმგებლობას და შესაძლოა, არ ასახავდეს გაეროს მოსახლეობის ფონდის, შვედეთის მთავრობის და ევროკავშირის ხედვას.
მირიან ჯუღელი
„კაცები ზრუნავენ“, თანადამფუძნებელი
ბავშვის აღზრდაში მამის ჩართულობა უაღრესად მნიშვნელოვანია, ამაზე არაერთი კვლევა და ფსიქოლოგი საუბრობს, თუმცა საქართველოში მამაკაცების ჩართულობის მნიშვნელობის შესახებ ცნობიერება საკმაოდ დაბალია. ზუსტად ამიტომ, 2014 წელს გადავწყვიტეთ შეგვექმნა კამპანია „კაცები ზრუნავენ“, რომელსაც თავდაპირველად „მამა, წიგნი წამიკითხე“ ერქვა. ჩვენი მიზანია, ქვეყნის სოციო-ეკონომიკური კონტექსტის გათვალისწინებით, ყველა მამაკაცს მივაწვდინოთ ხმა და ვაჩვენოთ ის პოზიტიური შედეგები და მაგალითები, რომელიც გენდერული თანასწორობის მიღწევაში მამაკაცთა ჩართულობას მოაქვს. ჩვენი მიზანია მშობლებსა და განსაკუთრებით მამებს ვუთხრათ, რომ საოჯახო საქმეების თანაბრად გადანაწილება დადებითად აისახება, როგორც მათსა და მათ ოჯახებზე, ასევე მთელი ქვეყნის განვითარებაზე.
