იტალიის ჩრდილოეთით, მანტუას პროვინციაში მცხოვრები მამაკაცი დედის პენსიის მისაღებად მის ცხედარს სამი წლის განმავლობაში მალავდა – ინფორმაციას Rainews24 ავრცელებს.
მედიის ცნობით, ბორგო ვირჯილიოში მცხოვრები 57 წლის სანიტარის დედა 2022 წელს გარდაიცვალა, მაგრამ მისი პენსიის მისაღებად მამაკაცი ქალის სხეულს სამი წელი მალავდა.
სიყალბეს ფარდა მაშინ აეხადა, როდესაც ქალის პირადობის მოწმობას ვადა გაუვიდა და მამაკაცმა მისი განახლება სცადა. ის გარდაცვლილი დედის ტანსაცმელში გამოეწყო და მუნიციპალურ ოფისში მივიდა, რომ პირადობის მოწმობა განეახლებინა. მუნიციპალიტეტის თანამშრომლებმა უცნაური მოხუცის სახეზე არაბუნებრივი მაკიაჟი და პარიკი შენიშნეს და პოლიცია გამოიძახეს.
საბოლოოდ, მამაკაცის სახლში ქალის მუმიფიცირებული ცხედარი აღმოაჩინეს. გამომძიებლები ვარაუდობენ, რომ დამნაშავემ პროფესიული უნარების გამოყენებით სხეულს სითხე მოაცილა. გამოძიება ახლა გარდაცვალების მიზეზსა და დროს არკვევს. პროკურატურა სანიტარს გვამის დამალვაში, თაღლითობასა და საბუთების გაყალბებაში ადანაშაულებს.
მსგავსი შემთხვევა ადრე ისრაელშიც მოხდა – 64 წლის ქალმა 93 წლის დედის გარდაცვალება დამალა და ოჯახთან ერთად ცხედარი საკუთარი სახლის ეზოში დამარხა. ქალი უკანონოდ იღებდა დედის პენსიას, რომლის საერთო ჯამმა 18,000 შეკელი შეადგინა.
