ფინეთის დედაქალაქში, ჰელსინკიში ახალი ტრენდია – სამსახურში ძილი, რომელსაც კომპანია აფინანსებს. ამ ქვეყანაში ძილისთვის ხელფასს გადაგიხდიან და ეს ხუმრობა არ არის. ფინეთის პროფკავშირებმა დაასკვნეს, რომ სამსახურში, შუადღეს ძილი არა მარტო შრომის ნაყოფიერებას, არამედ კომპანიის ფინანსურ მდგომარეობასაც აუმჯობესებს.
ფინური მედიის ინფორმაციით, ზოგი კომპანია სპეციალისტსაც კი ქირაობს, რომელიც თანამშრომლებს მოდუნებაში ეხმარება და მედიტაციას ასწავლის.
„ძნელია საკუთარ თავს მოდუნება აიძულო, მაგრამ ამის გაკეთება შუადღეს, მწვრთნელთან ერთად გაცილებით ადვილია. ამ დროს მწვრთნელს ოქროს ფასი აქვს, რადგან ის თქვენს გონებას დასვენებაში დაეხმარება, თქვენ კი ნახევარსაათიანი მინი-შვებულებით დაგასაჩუქრებთ“ – ამბობს Sofia Future Farm ცენტრის წარმომადგენელი, რომელიც „ ძილის გაკვეთილებს“ ატარებს.
სხვადასხვა კომპანიის თანამშრომლების გამოკითხვის შემდეგ ჰელსინკის პროფკავშირებში დაასკვნეს, რომ დღისით ძილი, (რომელიც კომპანიისა და მენეჯმენტის განწყობის მიხედვით, 30-დან 60 წუთამდე გრძელდება) სასარგებლოა. პროფკავშირის თანამშრომლებთან საუბრის დროს დასაქმებულები სამსახურში დაღლილობას, ფიზიკურ დისკომფორტს, ზურგისა და სახსრების ტკივილს უჩიოდნენ, რაც მათ განწყობაზე და შრომის ნაყოფიერებაზე აისახება.
ფინეთის მედიასაშუალებებმა უკვე გააშუქეს დედაქალაქში ახალი ტენდენციის გაჩენა. ჟურნალისტებს მიაჩნიათ, რომ სამსახურში ძილის ჩვევა მალე სხვა ქალაქებშიც გავრცელდება.
აღსანიშნავია, რომ სამსახურში დაძინების იდეა სხვა ქვეყნებშიც მოუვიდათ. მაგალითად, ჩინეთში ბევრი დამსაქმებელი თავის თანამშრომლებს დასვენების ოთახებით უზრუნველყოფს, სადაც დაძინება შეიძლება.
ესპანეთში სიესტას ტრადიცია არსებობს. ეს სამსახურში, შესვენების პერიოდია, როდესაც სადილის შემდეგ დაძინება შესაძლებელია.
ესპანეთის გარდა, სიესტა ამ ქვეყნებშიც მოქმედებს: ალბანეთი, ბანგლადეში, ბოსნია და ჰერცეგოვინა, ბრაზილია, ჩინეთი, კვიპროსი, საბერძნეთი, ინდოეთი, ირანი, ერაყი, ისრაელი, იტალია (სამხ.), მალტა, მავრიტანია, მონტენეგრო, ჩრდილოეთი აფრიკა, პაკისტანი, ფილიპინები, სერბეთი, ტაივანი, ვიეტნამი, სალვადორი და დომინიკელთა რესპუბლიკა.
რამდენიმე წელია, საერთაშორისო კომპანიები დღის ხანმოკლე ძილის პრაქტიკას მთელი მსოფლიოს მასშტაბით ნერგავენ. ამ მიზნით, ოფისებში სპეციალური ოთახები ეწყობა, სადაც კომფორტული ავეჯი და მყუდრო გარემოა.
ექიმები დღის ძილის იდეას მხარს უჭერენ, რადგან ის ხელს უწყობს ჯანმრთელობის აღდგენას და აუმჯობესებს შრომის ნაყოფიერებას. დღის ხანმოკლე ძილი ამცირებს არტერიულ წნევას და გულისცემას და სასარგებლო გავლენა აქვს გულ-სისხლძარღვთა სისტემის მუშაობაზე. ის აუმჯობესებს მეხსიერებას, ხელს უწყობს ახალი ინფორმაციის ათვისებას და მოვლენებს შორის კავშირის დამყარებას.
და ბოლოს, თქვენ დაიძინებდით სამსახურში?
ასევე დაგაინტერესებთ
#OK! აბაზანაში გახსნილი ოფისიდან დიდებამდე – ვინ არის მსოფლიოს ყველაზე ახალგაზრდა მილიარდერი?
